AKP កំពង់ធំ ថ្ងៃទី៧ ខែតុលា ឆ្នាំ២០២៦-- ឧត្តមសេនីយ៍ទោ សោម ស៊ុន មេបញ្ជាការតំបន់ប្រតិបត្តិការសឹករង និងជាអនុប្រធានអចិន្ត្រៃយ៍នៃគណៈកម្មការការពារទប់ស្កាត់ និងបង្ក្រាបបទល្មើសធនធានធម្មជាតិខេត្តកំពង់ធំ អមដំណើរដោយលោក អោង ប៊ុនធឿន ប្រធានមន្ទីរបរិស្ថានខេត្ត នាព្រឹកថ្ងៃទី៧ ខែតុលា ឆ្នាំ២០២៦ បានដឹកនាំសហការី រួមជាមួយអាជ្ញាធរដែនដីនិងប្រជាសហគមន៍ ចំនួន១៣៦នាក់ (ស្រី១៨នាក់) រួមគ្នាដាំស្ដារព្រៃឈើឡើងវិញនៅសហគមន៍តំបន់ការពារធម្មជាតិជាំម្រេចស្ថិតនៅដែនជម្រកសត្វព្រៃបឹងពែរក្នុងភូមិសាស្ត្រភូមិតាឡែក ឃុំសាលាវិស័យ ស្រុកប្រាសាទបល្ល័ង្ក ខេត្តកំពង់ធំ។

លោក អោង ប៊ុនធឿន បានបញ្ជាក់ថា ព្រៃសហគមន៍តំបន់ការពារធម្មជាតិជាំម្រេច មានផ្ទៃដីទំហំ២៩០៨ហិកតា ហើយកន្លងទៅនេះមានជនខិលខូចបានលួចកាប់រានទន្ទ្រានដីព្រៃយកអាស្រ័យផលអស់មួយចំនួនប៉ុន្តែក្នុងនោះត្រូវក៏បានស្ថាប័នជំនាញបរិស្ថាន រួមជាមួយរដ្ឋបាលស្រុក ខេត្តធ្វើការដកហូតមួយចំនួនយកមកធ្វើជាសម្បត្តិរដ្ឋវិញ។ ថ្ងៃនេះផ្ទៃដីសហគមន៍ចំនួន៩ហិកតាត្រូវបានសហគមន៍ មន្ទីរបរិស្ថាន គណៈកម្មការគ្រប់គ្រងការពារទប់ស្កាត់និងបង្ក្រាបទល្មើសធនធានធម្មជាតិខេត្តកំពង់ធំ រួមគ្នាជាមួយអាជ្ញាធរដែនដីធ្វើការដាំស្ដារព្រៃឈើឡើងវិញដែលមានកូនឈើប្រភេទគ្រញូងចំនួន៥៧០០ដើម។

ឧត្តមសេនីយ៍ទោ សោម ស៊ុន បានគូសបញ្ជាក់ថា អស់រយៈពេលជាង២៨ខែក្នុងកិច្ចប្រតិបត្តិការ ការពារ ទប់ស្កាត់និងបង្ក្រាបទល្មើសធនធានធម្មជាតិនៅក្នុងខេត្តកំពង់ធំ។ គណៈកម្មការការពារ ទប់ស្កាត់ និងបង្ក្រាបទល្មើសធនធានធម្មជាតិខេត្ត បានដំណើរការប្រតិបត្តិការដោយប្រើប្រាស់កម្លាំងចម្រុះនៅថ្ងៃទី០១ខែ ឧសភា ឆ្នាំ២០២៤ រហូតដល់បច្ចុប្បន្ន ដោយបានរកឃើញ និងដកហូតដីព្រៃឈើ ដែលក្រុមជនល្មើសលួចកាប់ទន្ទ្រាននាបណ្ដាឆ្នាំកន្លងទៅ មុនខែឧសភាឆ្នាំ២០២៤បានជាង ៤.៣០០ហិកតាស្មើនឹង៣៤៦ទីតាំងផ្សេងៗគ្នា នៅក្នុងខេត្តកំពង់ធំ ហើយផ្ទៃដីទាំងនេះ ត្រូវបានដកហូតមកជាសម្បត្តិរដ្ឋ ក្នុងនោះផ្ទៃដីមួយចំនួនត្រូវបានដាំស្ដារព្រៃឈើឡើងវិញនិងមួយចំនួនទៀតបានដុះលូតលាស់ព្រៃឈេីធម្មជាតិ ដេីម្បីទុកសម្រាប់ឱ្យកូនចៅយើងនៅជំនាន់ក្រោយៗទៀត។

ក្នុងឱកាសនោះ ឧត្តមសេនីយ៍ទោ សោម ស៊ុន និងលោក អោង ប៊ុនធឿន បានដឹកនាំកងកម្លាំចម្រុះ រួមជាមួយអាជ្ញាធរដែនដី និងប្រជាពលរដ្ឋនៅក្នុងសហគមន៍ ដាំស្ដារព្រៃឈើឡើងវិញនិងបានសំណូមពរដល់ប្រជាពលរដ្ឋនិងប្រជាសហគមន៍ទាំងអស់ត្រូវរួមគ្នាថែរក្សា ការពារធនធានធម្មជាតិរបស់យើង ឱ្យនៅគង់វង្សសម្រាប់សង្គមជាតិយើង និងបានអំពាវនាវសុំឱ្យប្រជាពលរដ្ឋទាំងអស់ មេត្តាបោះបង់ចោលនៅការលួចកាប់រានទន្ទ្រានដីព្រៃឈើយកដីធ្វើចម្ការធ្វើជាកម្មសិទ្ធិ និងការលួចកាប់ឈើ និងដឹកជញ្ជូនឈើខុសច្បាប់ ដែលនាំឱ្យមានទោសទណ្ឌដល់ខ្លួន៕

ដោយ ស៊ុម វណ្ណា