AKP ភ្នំពេញ ថ្ងៃទី២ ខែតុលា ឆ្នាំ២០២៦--កម្មករនិយោជិតនៅកម្ពុជាបានបង្ហាញទស្សនៈថា ការដំឡើងប្រាក់ឈ្នួលអប្បបរមាសម្រាប់ឆ្នាំ២០២៧ ទោះបីជាមានចំនួនមិនច្រើនក៏ដោយ ក៏ប្រសើរជាងការមិនមានការដំឡើង ខណៈពួក គាត់ចង់ឱ្យការដំឡើងប្រាក់ឈ្នួលធ្វើឡើងក្នុងកម្រិតសមស្រប ដើម្បីរក្សាស្ថិរភាពការងារ និងជៀសវាងផលប៉ះពា ល់ដល់ឱកាសការងាររបស់កម្មករ និងការវិនិយោគបន្ថែមមកកម្ពុជា។

លោកកាន់ ស៊ីថន ធ្វើការងារនៅក្នុងរោងចក្រមួយនៅរាជធានីភ្នំពេញ បានលើកឡើងថា ប្រាក់ឈ្នួលគឺជាប្រភពចំណូលសំខាន់សម្រាប់ជីវភាពប្រចាំថ្ងៃ ប៉ុន្តែការដំឡើងប្រាក់ឈ្នួលក៏គួរតែពិចារ ណារួមជាមួយស្ថានភាពសេដ្ឋកិច្ច សមត្ថ ភាពរបស់សហគ្រាស និងលទ្ធភាពរក្សាការងារឱ្យកម្មករបានយូរអង្វែងផងដែរ។

លោក ស៊ី ថន បាននិយាយថា៖ «បើទោះបីជាដំឡើងតិចឬក៏ច្រើន យើងក៏នៅតែអបអរសាទរព្រោះនេះជាលទ្ធភាពរបស់កម្ពុជា ហើយយើងមើល អ្នកជិត ខាងយើងក៏មិនលើសយើងប៉ុន្មានដែរ អញ្ចឹងបើទោះបីតិចឬក៏ច្រើន យើង ទាមទារយកស្ថិរភាពការងារ និរន្តរភាពការងារវិញល្អប្រសើរជាង»។

ជាមួយនេះ កម្មករម្នាក់ទៀតគឺលោក ដិប សុភា បានលើកឡើងថា អ្វីដែលកម្មករត្រូវការ មិនមែនមានតែការដំឡើងប្រាក់ឈ្នួលប៉ុណ្ណោះទេ ប៉ុន្តែថែមទាំងការងារដែលមានស្ថិរភាព បរិយាកាសការងារល្អ និងអត្ថប្រយោជន៍ផ្សេងៗដែលអាចជួយកាត់បន្ថយបន្ទុកចំណាយក្នុងជីវភាពប្រចាំថ្ងៃ។

លោកថ្លែងថា៖ «សម្រាប់ខ្ញុំពាក់ព័ន្ធការដំឡើងប្រាក់ខែ យើងត្រូវគិតមើលដែរ យើងគិតមើលតើខាងថៅកែគាត់ទៅរួចឬអត់ពេលដែលយើងទាមទារខ្ពស់ អ៊ីចឹងយើងទាមទារប្រាក់ខែមួយដែលសមរម្យទាំងថៅកែគាត់ទទួលយកបានទាំងអស់គ្នា មួយទៀតយើងចង់បានប្រាក់ខែឡើងហើយអាចរក្សាការងារឱ្យនៅយូរអង្វែងតទៅមុខទៀត»។

បងប្អូនកម្មករនិយោជិតបញ្ជាក់បន្ថែមថា ការដំឡើងប្រាក់ឈ្នួលក្នុងកម្រិតសមស្រប អាចជួយបង្កើនប្រាក់ចំណូល និងសម្រួលជីវភាព ខណៈការរក្សាការងារឱ្យបានជាប់លាប់ គឺជាមូលដ្ឋានសម្រាប់ធានាប្រាក់ចំណូលរបស់កម្មករ និងគ្រួសារ។

មិនតែប៉ុណ្ណោះ ការមានការងារធ្វើជាប្រចាំ និងទទួលបានប្រាក់ឈ្នួលកើនឡើងតាមស្ថានភាពសេដ្ឋកិច្ច គឺជាចំណុចសំខាន់មួយក្នុងការធានាជីវភាពគ្រួសារ និងការរក្សាឱកាសការងារសម្រាប់ពេលបច្ចុប្បន្ន និងយុវជនជំនាន់ក្រោយទៀត៕ដោយ៖ ប៊ុនរិទ្ធ, ប្រភព៖ ក្រសួងការងារ