AKP ពោធិ៍សាត់ ថ្ងៃទី១ ខែតុលា ឆ្នាំ២០២៦--សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជាបានថ្លែងថា ដើមឡើយខេត្តពោធិ៍សាត់ គឺជាតំបន់ដែលមានសង្គ្រាមស៊ីវិល ប៉ុន្តែក្រោមនយោបាយឈ្នះឈ្នះរបស់សម្តេចតេជោ ខេត្តនេះមានការរីកចម្រើនឆាប់រហ័សជាមួយនិងសក្តានុពលខ្ពស់ សម្រាប់ការទាក់ទាញការវិនិយោគ និងការអភិវឌ្ឍ។ ផ្លូវលេខ៥៥ អតីតផ្លូវលេខ៥៦ គឺមានប្រវត្តិប្រយុទ្ធគ្នាយ៉ាងខ្លាំងក្លាពី១៩៧៩ ដល់ទសវត្សរ៍ទី៩០ តែឥឡូវនេះវាក្លាយទៅជាផ្លូវមួយដែលមានការអភិវឌ្ឍ និងការរីកចម្រើនយ៉ាងច្រើន។ ការលើកឡើងរបស់សម្តេចធិបតី នាយករដ្ឋមន្ត្រីដូចនេះ ក្នុងពិធីសម្ពោធបើកឱ្យប្រើប្រាស់ជាផ្លូវការផ្លូវជាតិលេខ១០ ក្រោមក្របខ័ណ្ឌហិរញ្ញប្បទានសហប្រតិបត្តិការពីរដ្ឋាភិបាលនៃសាធារណរដ្ឋប្រជាមានិតចិន និងក្របខ័ណ្ឌថវិកាជាតិ នៅស្រុកវាលវែង ខេត្តពោធិ៍សាត់ នាព្រឹកថ្ងៃទី១ ខែតុលា ឆ្នាំ២០២៦។

សម្តេចមហាបវរធិបតី ហ៊ុន ម៉ាណែត បានគូសបញ្ជាក់ថា ការសាងសង់ផ្លូវជាតិលេខ១០នេះ គឺជាការសម្រេចចិត្តដ៏ត្រឹមត្រូវរបស់សម្តេចតេជោ ដែលជំរុញការតភ្ជាប់រវាងតំបន់ភាគពាយ័ព្យ និងតំបន់ឆ្នេរសមុទ្រភាគនិរតីនៃប្រទេសកម្ពុជា។ ផ្លូវជាតិលេខ១០ដ៏ថ្មីសន្លាងនេះត្រូវបានបើកការដ្ឋានសាងសង់កាលពីឆ្នាំ២០២០ ក្រោមអធិបតីភាពសម្តេចតេជោ និងឯកឧត្តម វ៉ាង វិនធាន អតីតឯកអគ្គរដ្ឋទូតចិនប្រចាំកម្ពុជា ហើយទន្ទឹមនេះរដ្ឋាភិបាលចិនក៏បាន និងកំពុងផ្តល់ហិរញ្ញប្បទានកិច្ចសហប្រតិបត្តិការជាច្រើនដល់ការកសាងអភិវឌ្ឍន៍វិស័យដឹកជញ្ជូន និងឡូជីស្ទិកនៅកម្ពុជាផងដែរ ដែលខ្លះបានបើកការដ្ឋានសាងសង់ ខ្លះទៀតកំពុងសាងសង់ និងសាងសង់រួច។ សម្តេចនាយករដ្ឋមន្ត្រីបានយកឱកាសនេះថ្លែងអំណរគុណយ៉ាងជ្រាលជ្រៅដល់ប្រជាជន និងរដ្ឋាភិបាលចិន ដែលបានជួយសាងសង់ផ្លូវជាតិលេខ១០ និងជួយគាំទ្រដល់ការអភិវឌ្ឍនៅកម្ពុជាលើគ្រប់វិស័យនៅក្នុងគ្រប់កាលៈទេសៈ ហើយក៏សូមថ្លែងអំណរគុណផងដែរដល់ថ្នាក់ដឹកនាំចិនដែលបានសន្យាបន្តផ្តល់ជំនួយឥតសំណង និងឥណទានសម្បទានដល់កម្ពុជា ព្រមទាំងលើកកម្ពស់ការវិនិយោគ និងកិច្ចសហប្រតិបត្តិការសេដ្ឋកិច្ចឲ្យកាន់តែខ្លាំងក្លា ជាពិសេសជំរុញការបន្ស៊ីគ្នារវាងគំនិតផ្តួចផ្តើមខ្សែក្រវ៉ាត់ និងផ្លូវ និងយុទ្ធសាស្ត្របញ្ចកោណ សំដៅគាំទ្រដល់កិច្ចសហប្រតិបត្តិការឈ្នះឈ្នះ ព្រមទាំងពង្រឹងភាពជាដៃគូ និងកិច្ចសហប្រតិបត្តិការល្អ ដែលនឹងរួមចំណែកដល់ការគាំទ្រកិច្ចសហប្រតិបត្តិការត្បូងពេជ្រ កម្ពុជា-ចិន និងការកសាងសហគមន៍ជោគវាសនារួម កម្ពុជា-ចិន គ្រប់រដូវកាល ក្នុងយុគសម័យថ្មីប្រកបដោយគុណភាពខ្ពស់ កម្រិតខ្ពស់ និងស្តង់ដារ។

សម្តេចបានលើកឡើងថា ផ្លូវជាតិលេខ១០នេះ ត្រូវបានសាងសង់ជាប្រភេទផ្លូវ DBST Highway Grade III និងជាប្រភេទផ្លូវចាក់បេតុងសរសៃដែក ដែលមានគន្លងធ្វើចរាចរណ៍ពីរគន្លងទៅមក ដោយគន្លងផ្លូវជាតិលេខ១០នេះ ក៏រួមបញ្ចូលការសាងសង់ស្ពានខ្ពស់ជាងគេនៅកម្ពុជាដែលមានកម្ពស់៩០ម៉ែត្រ ដោយប្រើប្រាស់ថវិកាជាតិជាង ២៥លានដុល្លារអាម៉េរិក និងត្រូវប្រសិទ្ធនាមថា «ស្ពានតេជោសន្តិភាពឫស្សីជ្រុំ» ដើម្បីគោរពដឹងគុណយ៉ាងជ្រាលជ្រៅបំផុតដល់វីរភាពរបស់សម្តេចតេជោ ហ៊ុន សែន អតីតនាយករដ្ឋមន្ត្រី និងបច្ចុប្បន្នជាប្រធានព្រឹទ្ធសភា នៃព្រះរាជាណាចក្រកម្ពុជា ចំពោះការបង្រួបបង្រួមជាតិ និងការដឹកនាំប្រទេសពីបាតដៃទទេរហូតដល់មានការអភិវឌ្ឍលើគ្រប់វិស័យ និងបន្តរីកចម្រើនឥតឈប់ឈរទោះក្នុងកាលៈទេសៈលំបាកយ៉ាងណាក៏ដោយ។ សម្តេចធិបតីនាយករដ្ឋមន្ត្រីគូសបញ្ជាក់ថា គម្រោងនេះនឹងផ្តល់ផលប្រយោជន៍ផ្នែកសេដ្ឋកិច្ចខ្ពស់ តាមរយៈការកាត់បន្ថយពេលវេលា ថ្លៃដឹកជញ្ជូន តាមទិសពាយ័ព្យ បង្កើនទេសចរណ៍ និងកាលានុវត្តភាពផ្សេងៗ។ ជាក់ស្តែង គម្រោងផ្លូវជាតិលេខ១០ នេះកាត់បន្ថយការដឹកជញ្ជូនប្រមាណ ៣០៦គីឡូម៉ែត្រប្រសិនបើគិតពីខេត្តបាត់ដំបងទៅកោះកុង ប្រមាណ ២៣០គីឡូម៉ែត្រប្រសិនបើគិតពីខេត្តពោធិ៍សាត់ទៅកោះកុង និងប្រមាណ ៣៧២គីឡូម៉ែត្រ គិតពីខេត្តប៉ៃលិនទៅខេត្តកោះកុង។ នេះគឺជាចម្ងាយផ្លូវដែលត្រូវកាត់បន្ថយ ហើយចម្ងាយផ្លូវដែលត្រូវកាត់បន្ថយ គឺវាប្រែទៅជាការកាត់បន្ថយថ្លៃដឹកជញ្ជូនទំនិញ និងការធ្វើដំណើររបស់បងប្អូនប្រជាពលរដ្ឋ ដោយឥឡូវនេះអ្នកពោធិ៍សាត់បើចង់ទៅលេងកំពង់សោម មិនបាច់ទៅកាត់ភ្នំពេញទៀតទេ គឺត្រូវចាក់ពីនេះទៅដល់ផ្លូវលេខ៤៨ ឡើងទៅផ្លូវជាតិលេខ៤ គឺផ្លូវល្បឿនលឿន ភ្នំពេញ-កំពង់សោម ហើយត្រឡប់មកវិញដូចគ្នា ដែលពីមុនត្រូវទៅដល់ភ្នំពេញសិន ហើយបានឡើងផ្លូវជាតិលេខ៤ ឡើងទៅកំពង់សោម៕

ដោយ៖ ចាន់ សុភឿន