AKP ភ្នំពេញ ថ្ងៃទី៣០ ខែកញ្ញា ឆ្នាំ២០២៦–ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា និងជាប្រធានគណៈកម្មាធិការទទួលស្គាល់គុណភាពអប់រំនៃកម្ពុជា ថ្ងៃទី២៩ ខែកញ្ញា ឆ្នាំ២០២៦ បានដឹកនាំកិច្ចប្រជុំស្ដីពីស្ដង់ដាជាតិសម្រាប់ការទទួលស្គាល់គុណភាពអប់រំកម្រិតគ្រឹះស្ថានឧត្តមសិក្សា និងកម្រិតកម្មវិធីដែលបានកែលម្អ ដោយផ្អែកលើលក្ខណវិនិច្ឆ័យ AUN-QA ជាគោល ដោយមានការចូលរួមពីសំណាក់ ឯកឧត្តម លោកជំទាវ ថ្នាក់ដឹកនាំក្រសួងអប់រំ យុវជន និងកីឡា អគ្គលេខាធិការដ្ឋាននៃគណៈកម្មាធិការទទួលស្គាល់គុណភាពអប់រំនៃកម្ពុជា (គ.ទ.ក/ACC) និងអគ្គនាយកដ្ឋានឧត្តមសិក្សា និងភាគីពាក់ព័ន្ធ។

កិច្ចប្រជុំនេះបានពិនិត្យពិភាក្សាលើរបៀបវារៈ រួមមាន ១. វឌ្ឍនភាពការងាររៀបចំកែលម្អស្ដង់ដាជាតិ និងសៀវភៅណែនាំសម្រាប់ការទទួលស្គាល់គុណភាពអប់រំកម្រិតគ្រឹះស្ថានឧត្តមសិក្សា និងកម្រិតកម្មវិធី ដោយផ្អែកលើលក្ខណវិនិច្ឆ័យ AUN-QA ជាគោល ២. វឌ្ឍនភាពការងារលើកកម្ពស់ប្រព័ន្ធធានាគុណភាពអប់រំផ្ទៃក្នុងរបស់គ្រឹះស្ថានឧត្តមសិក្សាឆ្លើយតបទៅនឹងលក្ខណវិនិច្ឆ័យ AUN-QA ៣. ការចូលរួមមតិយោបល់លើសេចក្ដីព្រាងដែលបានកែលម្អរួចរាល់ ដោយផ្អែកលើលក្ខណវិនិច្ឆ័យ AUN-QA ជាគោល។

តបតាមអនុសាសន៍ណែនាំរបស់ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី នាឱកាសសន្និបាតអប់រំឆ្នាំ២០២៥ និងការលើកទិសដៅបន្តឆ្នាំ២០២៦ អគ្គលេខាធិការដ្ឋាននៃគណៈកម្មាធិការទទួលស្គាល់គុណភាពអប់រំនៃកម្ពុជា (គ.ទ.ក/ACC) បានធ្វើការបន្ស៊ីគ្នារវាងស្ដង់ដាជាតិសម្រាប់ការទទួលស្គាល់គុណភាពអប់រំកម្រិតគ្រឹះស្ថានឧត្តមសិក្សា ជាមួយនឹងលក្ខណវិនិច្ឆ័យកម្រិតគ្រឹះស្ថានឧត្តមសិក្សារបស់ AUN-QA នឹងធ្វើការបន្ស៊ីគ្នារវាងស្ដង់ដាជាតិសម្រាប់ការទទួលស្គាល់គុណភាពអប់រំកម្រិតកម្មវិធី ជាមួយនឹងលក្ខណវិនិច្ឆ័យកម្រិតកម្មវិធីរបស់ AUN-QA ព្រមទាំងបានរៀបចំកិច្ចប្រជុំពិគ្រោះយោបល់ថ្នាក់ជាតិ និងការប្រៀបធៀបជាមួយនឹងក្របខណ្ឌធានាគុណភាពអាស៊ានជាច្រើនលើក ដើម្បីកែលម្អរហូតឈានដល់ការសម្រេចបាននូវសេចក្ដីព្រាងស្ដង់ដាជាតិសម្រាប់ការទទួលស្គាល់គុណភាពអប់រំកម្រិតគ្រឹះស្ថានឧត្តមសិក្សា និងកម្រិតកម្មវិធី។ ជាលទ្ធផល សូចនាករនីមួយៗនៃស្ដង់ដារបស់គណៈកម្មាធិការទទួលស្គាល់គុណភាពអប់រំនៃកម្ពុជាដែលបានកែលម្អ គឺដូចគ្នាទាំងស្រុងទៅនឹងសូចនាករនៃលក្ខណវិនិច្ឆ័យ AUN-QA និងលើសសូចនាករមួយចំនួនដែលមានស្រាប់។

ក្នុងកិច្ចប្រជុំនេះ ឯកឧត្តមបណ្ឌិតសភាចារ្យ ហង់ជួន ណារ៉ុន បានណែនាំឱ្យក្រុមការងារបន្តយកចិត្តទុក ដាក់សហការគ្នារៀបចំប្រព័ន្ធសម្រាប់ការអនុវត្តឆ្លើយតបនឹងស្ដង់ដាថ្មីនេះ ដោយត្រូវសហការជាមួយអ្នកឯកទេសរបស់ AUN-QA និងត្រូវចាប់ផ្ដើមអនុវត្តសាកល្បងជាមួយសាកលវិទ្យាល័យគោលដៅមួយចំនួន និងត្រៀមរៀបចំកិច្ចប្រជុំជាមួយវិស័យឯកជន ដើម្បីផ្សព្វផ្សាយពីស្ដង់ដាជាតិថ្មីសម្រាប់ការទទួលស្គាល់គុណភាពអប់រំកម្រិតគ្រឹះស្ថានឧត្តមសិក្សា និងកម្រិតកម្មវិធីដែលបានកែលម្អរួច ដោយផ្អែកលើលក្ខណវិនិច្ឆ័យ AUN-QA ជាគោលនេះឱ្យបានទូលំទូលាយ៕

ដោយ៖ ចាន់ សុភឿន (ប្រភព៖ ក្រសួងអប់រំ)