AKP ភ្នំពេញ ថ្ងៃទី៣០ ខែកញ្ញា ឆ្នាំ២០២៦ -- រដ្ឋមន្ត្រីការបរទេសអ៊ីរ៉ង់លោក អាបាស់ អារ៉ាកឈី បាននិយាយកាលពីពេលថ្មីៗនេះថាអ្នកសម្របសម្រួលមកពីប្រទេសកាតានឹងបង្ហាញគំនិតថ្មីៗដល់សហរដ្ឋអាមេរិក ដែលបានពិភាក្សាជាមួយទីក្រុងតេអេរ៉ង់ អំពីវិធីបំពេញលក្ខខណ្ឌរបស់អ៊ីរ៉ង់សម្រាប់ការបើកច្រកសមុទ្រហ័រមុសឡើងវិញ ដោយលោកបានបន្ថែមថា ការឆ្លើយតបចុងក្រោយពីទីក្រុងវ៉ាស៊ីនតោនអាចនឹងទទួលបានក្នុងពេលឆាប់ៗនេះ។

ថ្លែងទៅកាន់អ្នកសារព័ត៌មានអ៊ីរ៉ង់នៅទីក្រុងញូវយ៉ក លោក អារ៉ាកឈីបាននិយាយថា លោកបានជួបជាមួយអ្នកសម្របសម្រួលកាតាម្តងទៀតហើយបានពិភាក្សាអំពីវិធីដែលអាចធ្វើទៅបាន ដើម្បីសម្រួលដល់ការអនុវត្តលក្ខខណ្ឌរបស់ទីក្រុងតេអេរ៉ង់។

យោងតាមទីភ្នាក់ងារព័ត៌មានផ្លូវការ IRNA លោកបាននិយាយថា«ពួកគេមានគំនិតមួយចំនួន ហើយយើងបានពិភាក្សាអំពីរបៀបស្វែងរកវិធីដើម្បីបំពេញលក្ខខណ្ឌរបស់អ៊ីរ៉ង់ និងរបៀបដែលលក្ខខណ្ឌទាំងនោះអាចត្រូវបានអនុវត្ត»។

លោក អារ៉ាកឈី បាននិយាយថា គំនិតទាំងនោះនឹងត្រូវលើកឡើងជាមួយភាគីសហរដ្ឋអាមេរិក ហើយបន្ទាប់មកការឆ្លើយតបចុងក្រោយរបស់ទីក្រុងវ៉ាស៊ីនតោននឹងត្រូវបញ្ជូនបន្តទៅកាន់ទីក្រុងតេអេរ៉ង់។

លោក អារ៉ាកឈី បាននិយាយថា លោកនឹងចាកចេញពីទីក្រុងញូវយ៉កទៅកាន់ទីក្រុងតេអេរ៉ង់ក្នុងរយៈពេលប៉ុន្មានម៉ោងទៀត ហើយអ្នកសម្របសម្រួលកាតានឹងបញ្ជូនការឆ្លើយតបរបស់សហរដ្ឋអាមេរិកមកវិញនៅពេលដែលទទួលបានព័ត៌មាននោះ។

លោកបាននិយាយថា ការផ្លាស់ប្តូរព័ត៌មានតាមរយៈអ្នកសម្របសម្រួលកាតា និងប៉ាគីស្ថាននៅតែបន្តដំណើរការ ប៉ុន្តែវាបានក្លាយជាកិច្ចការដ៏សំខាន់និងស៊ីជម្រៅជាងមុន បន្ទាប់ពីមានសំណើចុងក្រោយរបស់អ៊ីរ៉ង់។

លោក អារ៉ាកឈី បាននិយាយថា ទីក្រុងតេអេរ៉ង់ក៏បានប្រើប្រាស់កិច្ចប្រជុំរបស់ខ្លួននៅទីក្រុងញូវយ៉ក ដើម្បីបញ្ជូនសារទៅកាន់ទីក្រុងវ៉ាស៊ីនតោន និងសហគមន៍អន្តរជាតិ អំពីលក្ខខណ្ឌដែលខ្លួនអះអាងថាត្រូវតែបំពេញដើម្បីឱ្យច្រកសមុទ្រហ័រមុសអាចបើកដំណើរការឡើងវិញបាន៕

ដោយ៖ យា ចិន្ដាខន្ដី (ប្រភព៖ AA-AKP)