AKP បន្ទាយមានជ័យ ថ្ងៃទី៣០ ខែ កញ្ញា ឆ្នាំ២០២៦--ក្រសួងធនធានទឹក និងឧតុនិយម រួមជាមួយអាជ្ញាធរខេត្តបន្ទាយមានជ័យ បានចុះពិនិត្យនិងវាយតម្លៃស្ថានភាពទឹកជំនន់ដល់ទីតាំងជាក់ស្តែងនៅក្ងុងតំបន់ដែលទទួលរងផលប៉ះពាល់ដោដោយសារគ្រោះធម្មជាតិនេះ។

កាលពីរសៀលថ្ងៃទី២៩ ខែកញ្ញា ឆ្នាំ២០២៦ ឯកឧត្តម ចាន់ ស៊ីណាត រដ្ឋលេខាធិការ ក្រសួងធនធានទឹក និងឧតុនិយម បានដឹកនាំក្រុមការងារបច្ចេកទេស ចុះពិនិត្យ និងវាយតម្លៃប្រព័ន្ធធារាសាស្ត្រដោយផ្ទាល់ នៅក្នុងភូមិសាស្ត្រស្រុកមង្គលបូរី ខេត្តបន្ទាយ មានជ័យ ដោយមានការអមដំណើរពីលោក ឃ្លោក នួយ អភិបាលរងខេត្តបន្ទាយមានជ័យ (តំណាងឯកឧត្តម អ៊ុំ រាត្រី អភិបាល ខេត្ត) អាជ្ញាធរមូលដ្ឋាន និងកងកម្លាំងប្រដាប់អាវុធ។

បេសកកម្មនេះបានផ្តោតលើចំណុចអន្តរាគមន៍គន្លឹះចំនួន ២ ទីតាំង រួមមាន ស្ថានភាពទឹកជំនន់ និងប្រព័ន្ធធារាសា ស្ត្រនៅភូមិប្រឡាយចារ ឃុំចំណោម និងសំណង់ធារាសាស្ត្រពោធិ៍ពីរដើម នៅឃុំរហាត់ទឹក ស្រុកមង្គលបូរី។ 

ទីតាំងទាំងនេះប្រៀបដូចជា «បំពង់ក» នៃប្រព័ន្ធរំដោះទឹក និងគ្រប់គ្រងលំហូរទឹកជំនន់ចេញពីតំបន់បង្កបង្កើនផល។ 

ក្នុងការចុះពិនិត្យផ្ទាល់នេះ ឯកឧត្តម ចាន់ ស៊ីណាត បានផ្តល់អនុសាសន៍ណែនាំយ៉ាងម៉ឺងម៉ាត់ និងទាន់ពេលវេលាទៅកាន់មន្ត្រីជំនាញថា«មន្ត្រីជំនាញត្រូវបន្តតាមដានស្ថានភាពទឹកជាប្រចាំ និងត្រៀមលក្ខណៈបច្ចេកទេសឱ្យបានស្រេចបាច់ជាមុន ដើម្បីអន្តរាគមន៍បើកទ្វារទឹក រំដោះទឹក និងជួសជុលទំនប់ ឬប្រឡាយដែលរងការខូចខាតឱ្យបានទាន់ពេលវេលា។ យើងមិនត្រូវរង់ចាំរហូតដល់បញ្ហារីករាលដាលធ្ងន់ធ្ងរ ទើបចាប់ផ្តើមអន្តរាគមន៍នោះឡើយ»។    

ប្រសាសន៍ណែនាំនេះបានឆ្លុះបញ្ចាំងយ៉ាងច្បាស់ពីវិធានការ «ការពារជាមុន និងឆ្លើយតបឱ្យបានឆាប់រហ័ស» ដើម្បីធានាថាកម្រិតទឹកជំនន់នឹងមិនបង្កការលិចលង់ ឬបំផ្លិចបំផ្លាញដល់ផលដំណាំស្រែចម្ការ និងទ្រព្យសម្បត្តិរបស់ប្រជាពលរដ្ឋក្នុងទ្រង់ទ្រាយធំនោះទេ។

ជាការឆ្លើយតប និងបញ្ជាក់ពីជំហរត្រៀមខ្លួនជាស្រេច លោក ឃ្លោក នួយ អភិបាលរងខេត្តបន្ទាយមានជ័យ បានលើកឡើងពីកិច្ចសហការយ៉ាងជិតស្និទ្ធរវាងរដ្ឋបាលខេត្ត និងក្រសួងជំនាញថា «អាជ្ញាធរខេត្ត និងមន្ទីរជំនាញពាក់ព័ន្ធ បានត្រៀមកម្លាំង និងសម្ភារៈរួចជាស្រេចក្នុងការសហការជាមួយក្រសួង ដើម្បីតាមដានការព្យាករណ៍អាកាសធាតុ និងកម្រិតកម្ពស់ទឹកជានិច្ច។ ការបញ្ជូនព័ត៌មានបានលឿន និងទាន់ពេលវេលា គឺជាសោភារៈសំខាន់ក្នុងការការពារសុវត្ថិភាពជូនប្រជាពលរដ្ឋ»។

ជាមួយគ្នានេះ លោកអភិបាលរងខេត្ត ក៏បានផ្ញើសារអំពាវនាវដោយទទូចដល់បងប្អូនប្រជាពលរដ្ឋដែលរស់នៅតាមបណ្តោយស្ទឹង ប្រឡាយ និងតំបន់ទំនាប ឱ្យបង្កើនការប្រុងប្រយ័ត្នខ្ពស់ និងបន្តតាមដានព័ត៌មានវិវត្តនៃស្ថានភាពទឹកជាប្រចាំ ដើម្បីអាចរៀបចំផែនការការពារគ្រួសារ និងទ្រព្យសម្បត្តិបានទាន់ពេលវេលា។

សារដែលទទួលបានពីបេសកកម្មចុះពិនិត្យផ្ទាល់នៅស្រុកមង្គលបូរីលើកនេះ គឺការបញ្ជាក់ថា ការគ្រប់គ្រងគ្រោះ មហន្តរាយទឹកជំនន់ មិនអាចពឹងផ្អែកតែលើការប៉ាន់ស្មាននោះទេ ប៉ុន្តែត្រូវផ្សារភ្ជាប់រវាង ទិន្នន័យជាក់ស្តែងនៅទីវាល បូក សមត្ថភាពបច្ចេកទេស បូក ការសម្របសម្រួលអន្តរស្ថាប័នយ៉ាងរលូន។ ការវាយតម្លៃ និងរៀបចំផែនការអន្តរាគមន៍មុនពេលគ្រោះអាសន្នមកដល់ គឺជាខែលការពារដ៏រឹងមាំបំផុតសម្រាប់ជីវភាពរស់នៅ និងសេដ្ឋកិច្ចរបស់ប្រជាកសិករកម្ពុជា៕

ដោយ ៖ឈុនសារ៉ាត