AKP ទីក្រុងប៉េកាំង, ប្រទេសចិន ថ្ងៃទី២៩ ខែកញ្ញា ឆ្នាំ២០២៦--
វគ្គបណ្តុះបណ្តាលអន្តរជាតិស្តីពី «ប្រព័ន្ធផ្សព្វផ្សាយថ្មី ដើម្បីជំរុញការអភិវឌ្ឍឧស្សាហកម្មប្រកបដោយគុណភាពខ្ពស់ សម្រាប់បណ្តាប្រទេសអាស៊ាន» បានបិទបញ្ចប់ដោយជោគជ័យបន្ទាប់ពីដំណើរការយ៉ាងសកម្មរយៈពេល ១៤ថ្ងៃពេញ ចាប់ពីថ្ងៃទី១៥ ដល់ថ្ងៃទី២៨ ខែកញ្ញា ឆ្នាំ២០២៦។
វគ្គបណ្តុះបណ្តាលដ៏មានសារៈសំខាន់នេះ រៀបចំឡើងដោយក្រុមហ៊ុន China Broadcasting International Economic and Technical Cooperation Co., Ltd. (CBIC) ក្រោមការឧបត្ថម្ភពីក្រសួងពាណិជ្ជកម្មចិន និងដឹកនាំសម្របសម្រួលដោយនាយកដ្ឋានអន្តរជាតិ នៃអគ្គនាយកដ្ឋានវិទ្យុ និងទូរទស្សន៍ជាតិចិន (NRTA) ដែលសិក្ខាមមកពីប្រព័ន្ធផ្សព្វផ្សាយនៃបណ្តាប្រទេសអាស៊ាន។
ក្នុងពិធីបិទវគ្គដ៏មានអត្ថន័យនេះ លោក He Dongbo អគ្គនាយករងនៃក្រុមហ៊ុន China International Radio, Film & Television Co., Ltd.(CBIC) បានថ្លែងស្វាគមន៍យ៉ាងកក់ក្តៅ និងកោតសរសើរចំពោះសិក្ខាកាមទាំងអស់ ដែលបានចំណាយពេល ១៤ថ្ងៃ ពេញក្នុងការសិក្សាស្រាវជ្រាវ ផ្លាស់ប្តូរបទពិសោធន៍ និងក្រេបជញ្ជក់ចំណេះដឹងពីគ្នាទៅវិញទៅមក។ អំឡុងពេល ១៤ថ្ងៃនេះសិក្ខាកាមបានស្តាប់ការបកស្រាយពីវាគ្មិន និងអ្នកជំនាញលើប្រធានបទសំខាន់ៗជាច្រើន ដូចជានិន្នាការសេដ្ឋកិច្ចឌីជីថល ការអនុវត្តបច្ចេកវិទ្យាថ្មី (AI, VR, AR) ការគ្រប់គ្រងមាតិកាសារព័ត៌មាន ការវិភាគគោលនយោបាយ និងការវិភាគករណីសិក្សាឆ្លងដែន ព្រមទាំងបានចុះទស្សនកិច្ចសិក្សានៅតាមស្ថាប័ន និងតំបន់វប្បធម៌សំខាន់ៗផងដែរ។

លោក He Dongbo ក៏បានសម្តែងការអរគុណយ៉ាងជ្រាលជ្រៅដល់ថ្នាក់ដឹកនាំ ក្រុមការងាររៀបចំ និងអ្នកជំនាញទាំងអស់ ដែលបានខិតខំប្រឹងប្រែងអស់ពីលទ្ធភាព ដើម្បីធានាឱ្យវគ្គបណ្តុះបណ្តាលនេះដំណើរការទៅដោយរលូន ទទួលបានលទ្ធផលផ្លែផ្កា និងបង្កើតបានជាចំណងមិត្តភាពដ៏ល្អប្រសើរ។ លោកបានសង្ឃឹមថា បទពិសោធន៍ ករណីសិក្សា និងចំណងមិត្តភាពដែលទទួលបានពីវគ្គបណ្តុះបណ្តាលនេះ នឹងត្រូវយកទៅអនុវត្តប្រកបដោយប្រសិទ្ធភាពក្នុងភារកិច្ចការងាររៀងៗខ្លួន ដើម្បីបន្តជំរុញការអភិវឌ្ឍវិស័យសារព័ត៌មាននៅតំបន់អាស៊ាន ក៏ដូចជារួមចំណែកពង្រឹងកិច្ចសហប្រតិបត្តិការរវាងប្រទេសចិន និងអាស៊ានឱ្យកាន់តែស៊ីជម្រៅថែមទៀត។
សូមជម្រាបជូនថា បន្ទាប់ពីបញ្ចប់បណ្តុះបណ្តាលនេះ ក៏មានការប្រគល់វិញ្ញាបនបត្រ និងវត្ថុអនុស្សាវរីយ៍ រួមទាំង USB Drive ដែលផ្ទុកនូវវីដេអូ រូបថត និងឯកសារសិក្សារយៈពេល ១៤ថ្ងៃកន្លងមក ជូនដល់សិក្ខាកាមម្នាក់ៗ ព្រមទាំងការថតរូបជុំគ្នា ប្រកបដោយក្តីនឹករលឹក និងស្នាមញញឹមនៃមិត្តភាពដ៏ល្អជាប្រពៃណីរវាងចិន និងប្រទេសអាស៊ាន៕

ដោយ៖ ទូច វលក័្ខណ