AKP ភ្នំពេញ ថ្ងៃទី ២៩ ខែកញ្ញា ឆ្នាំ ២០២៦--ក្រសួងបរិស្ថាន តាមរយៈគម្រោង CamAdapt បានរៀបចំសិក្ខាសាលាពិគ្រោះយោបល់ថ្នាក់ខេត្ត ស្តីពី «សេចក្តីព្រាងផែនការសកម្មភាពបន្សុំានឹងការប្រែប្រួលអាកាសធាតុនៅតំបន់ឆ្នេរសមុទ្រនៃប្រទេសកម្ពុជា»។                   

គួរបញ្ជាក់ផងដែរថា ក្នុងសិក្ខាសាលាដែលបានរៀបចំឡើងនៅថ្ងៃទី២៨ ខែកញ្ញា ឆ្នាំ២០២៦ នៅខេត្តកំពតនេះមានការពិភាក្សាផ្តោតលើការពិនិត្យសេចក្តីព្រាងផែនការ និងកំណត់ សកម្មភាពបន្សុំាដែលជាអាទិភាព ដោយផ្អែកលើបរិបទ តម្រូវការ និងបទពិសោធន៍របស់សហគមន៍នៅតំបន់ឆ្នេរ។ ជាលទ្ធផល អ្នកចូលរួមបានផ្តល់ធាតុចូល មតិយោបល់ និងសំណើរជាក់ស្តែង ដើម្បីពង្រឹងខ្លឹមសារ និងកំណត់អាទិភាពនៃសកម្មភាពបន្សុំា។
        
ក្នុងការចេញផ្សាយរបស់ខ្លួន គម្រោង CamAdapt បានឱ្យដឹងថា ចំពោះធាតុចូលទាំងនេះនឹងត្រូវយកមកពិចារណា ដើម្បី កែលម្អ និងធ្វើបច្ចុប្បន្នភាពសេចក្តីព្រាងផែនការនឹងការប្រែប្រួលអាកាសធាតុ ឱ្យកាន់តែសមស្របនឹងបរិបទ និងតម្រូវការរបស់សហគមន៍នៅតំបន់ឆ្នេរសមុទ្រកម្ពុជា។          
សម្រាប់សិក្ខាសាលានេះគេឃើញមានការចូលរួមជាអធិបតីពីសំណាក់ ឯកឧត្តម មាស សុផល អនុរដ្ឋលេខាធិការ ក្រសួងបរិស្ថាន ក្រៅពីនេះក៏មានវត្តមានតំណាងរដ្ឋបាលខេត្ត មន្ទីរបរិស្ថានខេត្ត មន្ទីរកសិកម្ម រុក្ខាប្រមាញ់ និងនេសាទខេត្ត អង្គការស្បៀង និងកសិកម្មនៃសហប្រជាជាតិ (FAO) ដៃគូអភិវឌ្ឍន៍ សហគមន៍នេសាទ និងសហគមន៍តំបន់ការពារធម្មជាតិចំនួន ១០ ។    
គួរបញ្ចាក់ថា គម្រោង CamAdapt គឺជាគម្រោងយុទ្ធសាស្ត្ររយៈពេល ៥ ឆ្នាំ ដែលបង្កើតឡើងក្នុងគោលបំណងជួយដល់សហគមន៍នេសាទតាមតំបន់ឆ្នេរឱ្យសម្របខ្លួនទៅនឹងការប្រែប្រួលអាកាសធាតុ ស្តារប្រព័ន្ធអេកូឡូស៊ីសមុទ្រ និងលើកកម្ពស់ជីវភាពរស់នៅរបស់ប្រជានេសាទឱ្យមានចីរភាព៕

ដោយ មករា