AKP ភ្នំពេញ ថ្ងៃទី១៧ ខែកញ្ញា ឆ្នាំ២០២៦ ​​​-- ​ក្រោមការគាំទ្រ និងឧបត្ថម្ភពីការិយាល័យទីភ្នាក់ងារសហប្រតិបត្តិការអន្តរជាតិកូរ៉េ (KOICA) ប្រចាំនៅកម្ពុជា សមាគមអតីតម្មសិក្សាការីកម្ពុជា-កូរ៉េ(ស.អ.ក.ក-CAMKAA) សមាគមអតីតនិស្សិតខ្មែរពីសាធារណរដ្ឋកូរ៉េ (KAAC)សមាគមអតីតសិក្ខាកាមរបស់កូហ្វីកម្ពុជា (KOFIH Global Alumni-KGA)និងវិទ្យាស្ថានបច្ចេកវិទ្យាកម្ពុជា(ITC) បានសហការរៀបចំសិក្ខាសាលាចែករំលែកចំណេះដឹងក្រោមប្រធានបទ “បច្ចេកវិទ្យាកំពុងឈានមុខ និងនវានុវត្តន៍សម្រាប់វិស្វករកម្ពុជាជំនាន់ថ្មី” នាថ្ងៃទី១៦ ខែកញ្ញា ឆ្នាំ២០២៦ នៅវិទ្យាស្ថានបច្ចេកវិទ្យាកម្ពុជា(ITC)។ ព្រឹត្តិការណ៍នេះ ក៏មានការចូលរួមពីនិស្សិត អ្នកស្រាវជ្រាវ អ្នកសិក្សា មន្ត្រីរាជការ អតីតនិស្សិត និងភាគីពាក់ព័ន្ធផ្នែកបច្ចេកវិទ្យាប្រមាណ ១៥០នាក់ ដើម្បីចែករំលែក និងសិក្សាស្វែងយល់អំពីបច្ចេកវិទ្យាកំពុងឈានមុខ ដែលរួមចំណែកដ៏មានសក្តានុពលឆ្ពោះទៅរកការពង្រឹងឌីជីថល និងការអភិវឌ្ឍប្រកបដោយចីរភាពរបស់កម្ពុជា។

ថ្លែងក្នុងពិធីបើក លោកស្រី លី​​ សេជីន-Lee Sejin អនុប្រធានការិយាល័យ KOICA ប្រចាំប្រទេសកម្ពុជា បានគូសបញ្ជាក់ពីសារៈសំខាន់ដែលកំពុងកើនឡើងនៃវិទ្យាសាស្ត្រ បច្ចេកវិទ្យា និងនវានុវត្តន៍សម្រាប់កំណើនសេដ្ឋកិច្ច និងការអភិវឌ្ឍប្រកបដោយចីរភាព។ លោកស្រីបានសង្កត់ធ្ងន់លើតួនាទីដ៏សំខាន់នៃស្ថាប័នឧត្តមសិក្សាដូចជាវិទ្យាស្ថានបច្ចេកវិទ្យាកម្ពុជា(ITC) ក្នុងការបំពាក់បំប៉នវិស្វករ អ្នកវិទ្យាសាស្ត្រ និងអ្នកស្រាវជ្រាវនាពេលអនាគត ឱ្យមានចំណេះដឹង ជំនាញ និងផ្នត់គំនិតនវានុវត្តន៍ដែលចាំបាច់សម្រាប់បដិវត្តន៍ឧស្សាហកម្មទីបួន។

ជាមួយគ្នានេះ ឯកឧត្តម អ៊ឹម សួរ ប្រធានសមាគមអតីតម្មសិក្សាការីកម្ពុជា-កូរ៉េ(ស.អ.ក.ក-CAMKAA) និងជាអគ្គលេខាធិការរង ក្រុមប្រឹក្សាអភិវឌ្ឍន៍កម្ពុជា (CDC)បានលើកឡើងថា អនាគតនៃការអភិវឌ្ឍបច្ចេកវិទ្យារបស់កម្ពុជា គឺស្ថិតនៅក្នុងដៃរបស់យុវជនជំនាន់ថ្មី ហើយកម្ពុជា ត្រូវការយុវជនដែលមានសមត្ថភាព ចំណេះដឹង ជំនាញស្រាវជ្រាវ ស្មារតីច្នៃប្រឌិត និងភាពក្លាហានក្នុងការសាកល្បងគំនិតថ្មីៗ។ ឯកឧត្តមសង្ឃឹមថា សិក្ខាសាលានៅថ្ងៃនេះ នឹងមិនបញ្ចប់ត្រឹមការចែករំលែកចំណេះដឹងក្នុងបន្ទប់នេះទេ ប៉ុន្តែនឹងក្លាយជាចំណុចចាប់ផ្តើមនៃគំនិតថ្មី ការស្រាវជ្រាវថ្មី គម្រោងថ្មី កិច្ចសហការថ្មី និងនវានុវត្តន៍ថ្មីៗ ដែលអាចរួមចំណែកដល់ការអភិវឌ្ឍសង្គម និងសេដ្ឋកិច្ចកម្ពុជា។

សូមជម្រាបជូនថា សិក្ខាសាលានេះមានការធ្វើបទបង្ហាញឯកទេសដោយអ្នកស្រាវជ្រាវ និងអ្នកជំនាញជនជាតិកម្ពុជា រួមទាំងអតីតនិស្សិតឧបត្ថម្ភដោយ KOICA និងអតីតនិស្សិតកម្មវិធីអាហារូបករណ៍រដ្ឋាភិបាលកូរ៉េ (GKS)។ បណ្ឌិត វ៉ាលី ដូណា បានបង្ហាញអំពីកម្មវិធីស្រាវជ្រាវលើវិស័យមនុស្សយន្ត យន្តហោះគ្មានមនុស្សបើក(ដ្រូន) និងបញ្ញាសិប្បនិម្មិត (AI) សាស្ត្រាចារ្យរង បណ្ឌិត ស្រ៊ីវ ថារិទ្ធ បានចែករំលែកទស្សនទានពីប្រព័ន្ធអេកូឡូស៊ីបច្ចេកវិទ្យា និងការស្រាវជ្រាវរបស់ប្រទេសកូរ៉េ និងលោក លោក អ៊ុ វ៉ាន់ថារិទ្ធ បានពិភាក្សាអំពីភាពជាសហគ្រិនបច្ចេកវិទ្យា អាជីវកម្មចាប់ផ្តើមអាជីវកម្ម (Startups) នវានុវត្តន៍ និងឱកាសការងារ។ លោក ភែល ភារុណ និង បណ្ឌិត អៃ សុងហ៊ាង បានស្វែងយល់អំពីបញ្ញាសិប្បនិម្មិត (AI) និងបច្ចេកវិទ្យាឌីជីថលក្នុងវិស័យអប់រំ។ ចំណែក បណ្ឌិត ឡាយ ងាបឆុង បានបង្ហាញអំពីការផ្លាស់ប្តូរឌីជីថលនៃការផ្ទៀងផ្ទាត់ការទាមទារសំណងសុខភាព ដើម្បីបង្កើនប្រសិទ្ធភាព និងការផ្តល់សេវាសាធារណៈ។

កម្មវិធីនេះ ក៏បានលើកឡើងផងដែរអំពីភាពជាដៃគូរវាងកូរ៉េ និងកម្ពុជាដែលមានរយៈពេលយូរមកហើយក្នុងការអភិវឌ្ឍធនធានមនុស្ស និងកម្មវិធីពង្រឹងសមត្ថភាពនិងវឌ្ឍនភាពសម្រាប់ថ្ងៃស្អែក (CIAT) របស់ទីភ្នាក់ងារ KOICA។ សមាគមអតីតនិស្សិតកម្មសិក្សាការីដូចជា សមាគមអតីតម្មសិក្សាការីកម្ពុជា-កូរ៉េ​ (ស.អ.ក.ក-CAMKAA) សមាគមអតីតនិស្សិតខ្មែរពីសាធារណរដ្ឋកូរ៉េ (KAAC)សមាគមអតីតសិក្ខាកាមរបស់កូហ្វីកម្ពុជា (KOFIH Global Alumni-KGA)បន្តពង្រឹងបណ្តាញវិជ្ជាជីវៈ និងចែករំលែកចំណេះដឹងដែលទទួលបានតាមរយៈការអប់រំ និងការបណ្តុះបណ្តាលអន្តរជាតិ ដោយពង្រីកឥទ្ធិពលនៃកិច្ចសហប្រតិបត្តិការកូរ៉េ-កម្ពុជា ទៅកាន់សហគមន៍កម្ពុជាឱ្យកាន់តែទូលំទូលាយ។

សិក្ខាសាលានេះ បានបញ្ជាក់ជាថ្មីនូវការប្តេជ្ញាចិត្តរួមគ្នាចំពោះនវានុវត្តន៍ ការផ្លាស់ប្តូរចំណេះដឹង និងការអភិវឌ្ឍមូលធនមនុស្ស ដោយគាំទ្រដល់កិច្ចខិតខំប្រឹងប្រែងរបស់កម្ពុជាក្នុងការរៀបចំខ្លួនសម្រាប់វិស្វករ អ្នកស្រាវជ្រាវ និងថ្នាក់ដឹកនាំបច្ចេកវិទ្យាជំនាន់ថ្មី។ អនាគតមិនមែនគ្រាន់តែជារឿងដែលត្រូវរង់ចាំនោះទេ ប៉ុន្តែវាគឺជាអ្វីដែលវិស្វករវ័យក្មេងរបស់កម្ពុជាអាចជួយរៀបចំផែនការ សាងសង់ និងបង្កើតឡើងបាន៕

ដោយ៖ រិទ្ធី, ប្រភព៖ KOICA