AKP ព្រះសីហនុ ថ្ងៃទី១៦ ខែកញ្ញា ឆ្នាំ២០២៦ --
ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទបានគូសបញ្ជាក់ថា ក្នុងរយៈពេល ៨ ខែដំបូងនៃឆ្នាំ២០២៦ នេះ កម្ពុជា បាននាំចេញអង្ករទៅកាន់ប្រទេសហ្វីលីពីនបានចំនួន ១២២ ១០២ តោន ដែលស្មើនឹងជាង ១៥.៤% នៃបរិមាណនាំចេញអង្ករសរុប ៧៩២ ២១២ តោន។ ការគូសបញ្ជាក់របស់ឯកឧត្ដមរដ្ឋមន្រ្ដីបែបនេះ ក្នុងឱកាសអញ្ជើញចូលរួមពិធីសម្ពោធជាផ្លូវការ “ការដឹកជញ្ជូនអង្ករ ១០ ០០០ តោន តាមផ្លូវទឹកដោយនាវាដឹកទំនិញរាយ” រវាងក្រុមហ៊ុន City Rice និង Dilai Trading ដើម្បីនាំចេញដោយផ្ទាល់ពីព្រះរាជាណាចក្រកម្ពុជាទៅកាន់សាធារណរដ្ឋហ្វីលីពីន នាព្រឹកថ្ងៃទី១៦ ខែកញ្ញា ឆ្នាំ២០២៦ នៅកំពង់ផែស្វយ័តព្រះសីហនុ។

ឯកឧត្តម ឌិត ទីណា បានថ្លែងបញ្ជាក់ថា តាមការបញ្ជាក់ពីសហព័ន្ធអង្ករកម្ពុជា (CRF) ជាមួយនឹងកិច្ចសន្យាទិញសម្រាប់ខែកញ្ញា ដល់ខែធ្នូ ឆ្នាំ២០២៦ ចំនួនអង្ករនាំចេញទៅហ្វីលីពីន នឹងកើន ៨៧ ៣៤៤ តោន បន្ថែមទៀត ធ្វើឱ្យការនាំចេញសរុបទៅហ្វីលីពីន ក្នុងឆ្នាំ២០២៦ នេះ កើនឡើងដល់ប្រមាណ ២០៩ ៤៤៦ តោន។ ឯកឧត្ដមរដ្ឋមន្រ្ដីបានលើកឡើងថា នេះជាការកើនឡើងជាង ៣៤ ដងបើធៀបទៅនឹងឆ្នាំ២០២៥ ហើយជាកម្លាំងចលករយ៉ាងសំខាន់ក្នុងការជំរុញការនាំចេញអង្ករសរុបរបស់កម្ពុជាឱ្យឈានទៅសម្រេចបានលើសពី ១ លានតោន នៅក្នុងឆ្នាំ២០២៦ នេះ ដែលជាការបំបែកឯកទគ្គកម្មថ្មី បន្ទាប់ពីសម្រេចបាន ៩៤០ ៣២១ តោន កាលពីឆ្នាំ២០២៥។ ឯកឧត្ដមរដ្ឋមន្ដ្រីក៏បានអះអាងផងដែរថា៖ «សមិទ្ធផលនេះគឺកើតចេញពីកិច្ចសហការយ៉ាងជិតស្និទ្ធជាមួយ ឯកឧត្តមរដ្ឋមន្ត្រីក្រសួងកសិកម្មហ្វីលីពីន Francisco P.Tiu Laurel Jr. រួមទាំងវិស័យឯកជន និងស្ថាប័នរដ្ឋាភិបាលពាក់ព័ន្ធផ្សេងទៀត ជាពិសេសការសម្របសម្រួលការរៀបចំវេទិការទំនាក់ទំនងផ្គូរផ្គងវិស័យឯកជន B2B បានរួមចំណែកយ៉ាងសំខាន់ក្នុងលទ្ធផលជាក់ស្តែងនេះ»។

ជាមួយគ្នានេះ ឯកឧត្ដមរដ្ឋមន្រ្ដីបានបញ្ជាក់បន្ថែមថា ការសម្ពោធការដឹកជញ្ជូន ១០ ០០០ តោន តាមរយៈមធ្យោបាយថ្មីដោយក្រុមហ៊ុន City Rice និង Dilai Trading ក៏នឹងរួមចំណែកក្នុងកិច្ចខិតខំប្រឹងប្រែងជំរុញនាំចេញអង្ករដោយផ្ទាល់ទៅកាន់ទីផ្សារប្រទេសហ្វីលីពីន ផងដែរ។ ទន្ទឹមនេះ មធ្យោបាយនាវាទំនិញរាយ ឬ Bulk Carrier គឺអនុញ្ញាតឱ្យមានការដឹកជញ្ជូនអង្ករដោយមិនចាំបាច់ប្រើប្រាស់ទូរកុងតឺន័រ តាមរយៈការលើកស្ទូចបាវអង្ករចូលក្នុងឃ្លុបទំនិញរបស់នាវា ដែលមធ្យោបាយនេះ គឺជួយកាត់បន្ថយការចំណាយនិងពេលវេលាដឹកជញ្ជូន ហើយលើកកម្ពស់ភាពប្រកួតប្រជែងរបស់វិស័យអង្គរកម្ពុជា។ ឯកឧត្ដមរដ្ឋមន្រ្ដីបានអះអាងថា៖ «នេះគឺជាការចាប់ផ្តើមថ្មីមួយសម្រាប់វិស័យអង្ករកម្ពុជា ដោយការដឹកជញ្ជូនតាមរយៈនាវាដឹកទំនិញរាយ នឹងបង្កើនសមត្ថភាពការនាំចេញអង្ករតាមផ្លូវទឹកបន្ថែមទៀតពីលើការដឹកជញ្ជូនតាមនាវាកុងតឺន័រ។ មធ្យោបាយនេះ ជួយបង្កើនប្រសិទ្ធភាព បង្កើនភាពប្រកួតប្រជែងរបស់អង្ករកម្ពុជា លើទីផ្សារអន្តរជាតិ កាត់បន្ថយចំណាយ និងពេលវេលាដឹកជញ្ជូន និងធានានូវការផ្គត់ផ្គង់អង្ករដែលមានគុណភាពខ្ពស់ទៅទីផ្សារហ្វីលីពីន ប្រកបដោយស្ថិរភាព។»
ក្នុងឱកាសនោះ ឯកឧត្ដមរដ្ឋមន្រ្ដីក៏បានឱ្យដឹងទៀតថា កិច្ចខិតខំប្រឹងប្រែងរួមគ្នារវាងស្ថាប័នរដ្ឋ និងវិស័យឯកជន គឺជាសសរទ្រូងដ៏រឹងមាំក្នុងការបើកទ្វារទីផ្សារអន្តរជាតិ និងរុញច្រានវិស័យកសិកម្មកម្ពុជា ឱ្យកាន់តែរីកចម្រើន និងបំបែកឯកទគ្គកម្មជាបន្តបន្ទាប់នៅពេលអនាគត៕

ដោយ៖ រិទ្ធី, ប្រភព៖ ក្រសួងកសិកម្ម រុក្ខាប្រមាញ់ និងនេសាទ