AKP ភ្នំពេញ ថ្ងៃទី១៥ ខែកញ្ញា ឆ្នាំ២០២៦-- ឯកឧត្តម ប៊ិន ត្រឈៃ រដ្ឋមន្ត្រីក្រសួង ផែនការ បានអនុញ្ញាតឱ្យលោកស្រី Sandra Bernklau តំណាងមូលនិធិសហប្រជាជាតិសម្រាប់ប្រជាជន (UNFPA) ប្រចាំកម្ពុជា ចូលជួបសម្តែងការគួរសម និងពិភាក្សាការងារ  នាព្រឹកថ្ងៃទី១៥ ខែកញ្ញា ឆ្នាំ២០២៦ នៅទីស្តីការក្រសួងផែនការ ។ ជំនួបនេះបានផ្តោតលើកិច្ចសហប្រតិបត្តិការក្នុងការពង្រឹងទិន្នន័យ និងចំណោលប្រជាជន ដើម្បីគាំទ្រការរៀបចំ និងអនុវត្តគោលនយោបាយឆ្លើយតបនឹងការបម្រែបម្រួលប្រជាសាស្ត្ររបស់កម្ពុជា។

លោកស្រី Sandra Bernklau បានជម្រាបជូនអំពីផែនការយុទ្ធសាស្ត្រថ្មីរបស់ UNFPA ដែលយកចិត្តទុកដាក់កាន់តែខ្លាំងលើបញ្ហាប្រជាជន ទិន្នន័យ និងការគាំទ្រប្រទេសនានាឱ្យត្រៀមខ្លួនសម្រាប់ការបម្រែបម្រួលប្រជាសាស្ត្រ។ លោកស្រីក៏បានលើកឡើងពីការងាររួមពាក់ព័ន្ធនឹងការធ្វើចំណោលប្រជាជន គណនីលំហូរអន្តរជំនាន់ (NTA) និងការត្រៀមរៀបចំជំរឿនប្រជាជនឆ្នាំ២០២៩ ព្រមទាំងកិច្ចសហការលើការរៀបចំឯកសារសង្ខេបស្តីអំពីគោលនយោបាយផងដែរ។

ឯកឧត្តមរដ្ឋមន្ត្រីបានលើកឡើងថាការរៀបចំគោលនយោបាយប្រជាជនត្រូវផ្អែកលើទិន្នន័យថ្មី ដែលមានគុណភាព និងអាចជឿទុកចិត្តបាន ហើយត្រូវយកទិន្នន័យទាំងនោះទៅប្រើប្រាស់ក្នុងការអនុវត្តជាក់ស្តែង។ ក្រុមការងារបច្ចេកទេសត្រូវ សហការជាមួយ UNFPA ប្រើប្រាស់លទ្ធផលអង្កេតចន្លោះជំរឿនប្រជាជនឆ្នាំ២០២៤ ដើម្បីរៀបចំចំណោលប្រជាជនឱ្យបានច្បាស់លាស់ ស្របតាមស្តង់ដារអន្តរជាតិ។ ការងារនេះមានសារៈសំខាន់សម្រាប់ការយល់ដឹងអំពីល្បឿននៃការឈានទៅរកសង្គមវ័យចាស់ និងការកំណត់វិធានការឆ្លើយតបក្នុងរយៈពេលខ្លី មធ្យម និងវែង។ ជាមួយគ្នានោះដែរឯកឧត្តមរដ្ឋមន្ត្រីក៏បានផ្តល់អនុសាសន៍ឱ្យសិក្សាបទពិសោធន៍របស់ប្រទេសដែលបានសម្របខ្លួនប្រកបដោយជោគជ័យទៅនឹងកំណើនប្រជាជនវ័យចាស់ ដើម្បីជាមូលដ្ឋានសម្រាប់កែសម្រួលគោលន យោបាយឱ្យសមស្របនឹងបរិបទកម្ពុជា។

ឯកឧត្តមបានលើកឡើងពីសារៈសំខាន់នៃវិធានការគាំទ្រគ្រួសារ និងការថែទាំកុមារ រួមទាំងគម្រោងរៀបចំកន្លែងថែទាំកុមារនៅក្រសួងផែនការ។ ជាមួយគ្នានេះ លោកស្រី Sandra Bernklau បានស្នើឱ្យពិចារណាសិក្សាបន្ថែមអំពីតម្រូវការ និងឧបសគ្គរបស់យុវជនក្នុងការបង្កើតគ្រួសារ និងការមានកូន ដើម្បីឱ្យវិធានការគាំទ្រឆ្លើយតបនឹងតម្រូវការជាក់ស្តែង។ ចំពោះការងារបន្ត ឯកឧត្តមរដ្ឋមន្ត្រីបានឯកភាពលើការសហការជាមួយក្រសួងសេដ្ឋកិច្ច និងហិរញ្ញវត្ថុ លើការងារគណនីលំហូរអន្តរជំនាន់ (NTA) និងគណនីលំហូរពេលវេលាអន្តរជំនាន់ (NTTA) ហើយបានស្នើសុំការគាំទ្រពីអ្នកជំនាញអន្តរជាតិ ដើម្បីពង្រឹងសមត្ថភាពក្រុមការងារ។

លោកស្រីបានជម្រាបថា សំណើគម្រោងតំបន់សម្រាប់គាំទ្រការងារនេះនៅកម្ពុជា ឡាវ និងវៀតណាម កំពុងស្ថិតក្នុងដំណាក់កាលរៀបចំចុងក្រោយ ដោយគ្រោងផ្តល់ជំនួយបច្ចេកទេស និងឱកាសផ្លាស់ប្តូរបទពិសោធន៍រវាងប្រទេសទាំងបី។ ឯកឧត្តមក៏បានណែនាំឱ្យ UNFPA សហការជាមួយវិទ្យាស្ថានជាតិស្ថិតិ ពិនិត្យទិដ្ឋភាពបច្ចេកទេស និងលទ្ធភាពហិរញ្ញវត្ថុសម្រាប់ជំរឿនប្រជាជនឆ្នាំ២០២៩ ផងដែរ៕

ដោយ៖ ពេជ្រ សំអឿន ,ប្រភព៖ក្រសួងផែនការ