AKP ភ្នំពេញ ថ្ងៃទី៨ ខែកញ្ញា ឆ្នាំ២០២៦ -- ក្នុងក្របខ័ណ្ឌបេសកកម្មការទូតនៅប្រទេសរ៉ូម៉ានី ឯកឧត្តម ជា ច័ន្ទបរិបូរណ៌ ឯកអគ្គរាជទូតវិសាមញ្ញ និងពេញសមត្ថភាពនៃព្រះរាជាណាចក្រកម្ពុជា ប្រចាំប្រទេសរ៉ូម៉ានី បានជួបពិភាក្សាការងារជាមួយលោកវិស្វករ Iuliu Stocklosa ប្រធានសភាពាណិជ្ជកម្ម និងឧស្សាហកម្មទីក្រុងប៊ូការ៉េស (Bucharest Chamber of Commerce and Industry – CCIB) ដើម្បីជំរុញកិច្ចសហប្រតិបត្តិការលើវិស័យសេដ្ឋកិច្ច ពាណិជ្ជកម្ម និងវិនិយោគរវាងប្រទេសទាំងពីរឱ្យកាន់តែទូលំទូលាយថែមទៀត។ ក្នុងជំនួបពិភាក្សានេះ ក៏មានការអញ្ជើញចូលរួមពីលោក Mihai Andritoiu កុងស៊ុលកិត្តិយសនៃព្រះរាជាណាចក្រកម្ពុជា ប្រចាំប្រទេសរ៉ូម៉ានី នាថ្ងៃទី៧ ខែកញ្ញា ឆ្នាំ២០២៦ នៅទីក្រុងប៊ូការ៉េស ប្រទេសរ៉ូម៉ានី ផងដែរ។

ក្នុងជំនួបនេះ ភាគីទាំងពីរបានផ្លាស់ប្តូរទស្សនៈយ៉ាងទូលំទូលាយអំពីការពង្រឹងទំនាក់ទំនងសេដ្ឋកិច្ច ពាណិជ្ជកម្ម និងវិនិយោគរវាងកម្ពុជា និងរ៉ូម៉ានី ជាពិសេសការបង្កើតទំនាក់ទំនងដោយផ្ទាល់រវាងសភាពាណិជ្ជកម្ម សហគ្រាស និងវិស័យឯកជននៃប្រទេសទាំងពីរ។

ក្នុងឱកាសនោះ ឯកឧត្តម ជា ច័ន្ទបរិបូរណ៌ បានគូសបញ្ជាក់ថា កម្ពុជា និងរ៉ូម៉ានី មានទំនាក់ទំនងមិត្តភាពជាប្រពៃណីយូរអង្វែង ហើយក្នុងបរិបទសេដ្ឋកិច្ចសកលបច្ចុប្បន្ន គួរបន្តប្រែក្លាយមូលដ្ឋានមិត្តភាពដ៏ល្អនេះទៅជា កិច្ចសហប្រតិបត្តិការសេដ្ឋកិច្ចដែលមានខ្លឹមសារ និងផ្តល់ផលប្រយោជន៍ជាក់ស្តែងដល់ប្រទេសទាំងពីរ។ ឯកឧត្ដមបានលើកឡើងផងដែរថា ចំណុចសំខាន់មួយដែលត្រូវបានលើកយកមកពិភាក្សា គឺការស្វែងរកលទ្ធភាពបង្កើតបណ្តាញផ្គត់ផ្គង់ នាំចូល ស្តុក និងចែកចាយគ្រឿងឧបភោគ បរិភោគ និង ផលិតផលកម្ពុជា តាមរយៈប្រទេសរ៉ូម៉ានី ដើម្បីផ្គត់ផ្គង់ជូនប្រជាជនខ្មែរដែលកំពុងរស់នៅ សិក្សា និងធ្វើការនៅតាម បណ្តាប្រទេសអឺរ៉ុប។ ឯកឧត្ដមបន្ដថា គំនិតនេះមានគោលដៅធ្វើឱ្យប្រជាជនខ្មែរនៅអឺរ៉ុប អាចទទួលបានផលិតផលពីមាតុភូមិកាន់តែងាយស្រួល និងក្នុងតម្លៃសមរម្យ ព្រមទាំងអាចពង្រីកទីផ្សារទៅកាន់អ្នកប្រើប្រាស់អឺរ៉ុបដែលមានចំណាប់អារម្មណ៍លើផលិតផលកសិកម្ម និងម្ហូបអាហារអាស៊ី។

ទន្ទឹមនេះ ផលិតផលដែលមានសក្តានុពល រួមមាន អង្ករ ម្រេចកំពត គ្រាប់ស្វាយចន្ទី ផ្លែឈើស្ងួត ផលិតផលកសិកម្មកែច្នៃ គ្រឿងទេស ទឹកជ្រលក់ មី និងផលិតផលម្ហូបអាហារបែបខ្មែរ ព្រមទាំងទំនិញប្រើប្រាស់ផ្សេងៗដែលមានតម្រូវការក្នុងសហគមន៍ខ្មែរនៅអឺរ៉ុប។

ឯកឧត្ដមឯកអគ្គរាជទូតបានលើកឡើងថា ក្នុងន័យនេះ កិច្ចសហការជាមួយ CCIB និងបណ្តាញធុរកិច្ចរ៉ូម៉ានី អាចជួយតភ្ជាប់អ្នកផលិត និងអ្នកនាំចេញកម្ពុជា ជាមួយអ្នកនាំចូល ឃ្លាំងស្តុក ក្រុមហ៊ុនដឹកជញ្ជូន អ្នកចែកចាយ និងបណ្តាញលក់រាយនៅអឺរ៉ុប។ ឯកឧត្ដមបានបញ្ជាក់ថា នេះអាចជាជំហានមួយឆ្ពោះទៅរកការបង្កើត ខ្សែសង្វាក់ផ្គត់ផ្គង់ផលិតផលកម្ពុជា–អឺរ៉ុប ដែលមានស្ថិរភាព និងអាចអភិវឌ្ឍន៍បានក្នុងរយៈពេលវែង។ ទន្ទឹមនឹងការបម្រើតម្រូវការរបស់សហគមន៍ខ្មែរ គោលដៅរយៈពេលវែងគឺជំរុញផលិតផលកម្ពុជាដែលមានគុណភាពឱ្យចូលទៅក្នុងទីផ្សារអឺរ៉ុបកាន់តែទូលំទូលាយ ដើម្បីបង្កើនការនាំចេញ បង្កើតទីផ្សារថ្មីសម្រាប់កសិករ និងសហគ្រាសកម្ពុជា និងលើកកម្ពស់ស្លាកសញ្ញា “Made in Cambodia” នៅលើទីផ្សារអន្តរជាតិ។

ជាមួយគ្នានេះ ឯកឧត្តមឯកអគ្គរាជទូតក៏បានលើកឡើងពីសក្តានុពលរបស់កម្ពុជា ក្នុងការធ្វើជាចំណុច តភ្ជាប់សម្រាប់ធុរកិច្ចរ៉ូម៉ានី ទៅកាន់ទីផ្សារអាស៊ាន ខណៈរ៉ូម៉ានី ក្នុងនាមជាសមាជិកសហភាពអឺរ៉ុប អាចជាដៃគូដ៏មានសក្តានុពលសម្រាប់ជួយតភ្ជាប់ផលិតផល និងសហគ្រាសកម្ពុជា ទៅកាន់បណ្តាញទីផ្សារអឺរ៉ុប។

ឯកឧត្តម ជា ច័ន្ទបរិបូរណ៌ ឯកអគ្គរាជទូតវិសាមញ្ញ និងពេញសមត្ថភាពនៃព្រះរាជាណាចក្រកម្ពុជា ប្រចាំប្រទេសរ៉ូម៉ានី និងលោកវិស្វករ Iuliu Stocklosa ប្រធានសភាពាណិជ្ជកម្ម និងឧស្សាហកម្មទីក្រុងប៊ូការ៉េស ប្រទេសរ៉ូម៉ានី ក៏បានពិភាក្សាផងដែរអំពីវិស័យដែលមានសក្តានុពលសម្រាប់កិច្ចសហប្រតិបត្តិការ រួមមាន កសិកម្ម និងកសិឧស្សាហកម្ម ការកែច្នៃម្ហូបអាហារ ពាណិជ្ជកម្ម ទេសចរណ៍ បច្ចេកវិទ្យា ឧស្សាហកម្ម ថាមពល ការដឹកជញ្ជូន ការអប់រំ និងការបណ្តុះបណ្តាលវិជ្ជាជីវៈ។

ក្នុងឱកាសនោះ ឯកឧត្តម ជា ច័ន្ទបរិបូរណ៌ បានលើកទឹកចិត្តឱ្យ CCIB ជួយផ្សព្វផ្សាយព័ត៌មានអំពីបរិយាកាសធុរកិច្ច សក្តានុពលសេដ្ឋកិច្ច និងឱកាសវិនិយោគនៅកម្ពុជា ទៅកាន់សមាជិក និងបណ្តាញធុរកិច្ចរបស់ខ្លួន ព្រមទាំងជំរុញការផ្លាស់ប្តូរគណៈប្រតិភូធុរកិច្ច និងការរៀបចំជំនួប Business-to-Business (B2B) រវាងក្រុមហ៊ុននៃប្រទេសទាំងពីរ។ ឯកឧត្ដមឯកអគ្គរាជទូត បានបន្ថែមថា លោក Mihai Andritoiu កុងស៊ុលកិត្តិយសកម្ពុជា ប្រចាំប្រទេសរ៉ូម៉ានី មានតួនាទីសំខាន់ក្នុងការជួយតភ្ជាប់ស្ថានទូតជាមួយសហគមន៍ធុរកិច្ចរ៉ូម៉ានី សម្របសម្រួលទំនាក់ទំនងរវាងក្រុមហ៊ុននៃប្រទេសទាំងពីរ និងជួយជំរុញគំនិតសហប្រតិបត្តិការឱ្យឈានទៅរកការអនុវត្តជាក់ស្តែង។

បើតាមឯកឧត្ដមឯកអគ្គរាជទូត ជំនួបនេះ ឆ្លុះបញ្ចាំងពីការជំរុញការទូតសេដ្ឋកិច្ចរបស់កម្ពុជា ដោយមិនត្រឹមតែផ្តោតលើការទាក់ទាញវិនិយោគប៉ុណ្ណោះទេ ប៉ុន្តែថែមទាំងស្វែងរកទីផ្សារថ្មីសម្រាប់ផលិតផលកម្ពុជា បង្កើតបណ្តាញចែកចាយនៅអឺរ៉ុប និងភ្ជាប់ផលិតផលពីកសិករ និងសហគ្រាសកម្ពុជា ទៅកាន់សហគមន៍ខ្មែរ និងអ្នកប្រើប្រាស់អឺរ៉ុប។ ឯកឧត្ដម ឯកអគ្គរាជទូតបានសង្កត់ធ្ងន់ថា៖ «គោលដៅចុងក្រោយ គឺប្រែក្លាយទំនាក់ទំនងមិត្តភាពកម្ពុជា–រ៉ូម៉ានី ទៅជាភាពជាដៃគូសេដ្ឋកិច្ចដែលអាចវាស់វែងបាន តាមរយៈពាណិជ្ជកម្ម ការវិនិយោគ ការតភ្ជាប់ធុរកិច្ច និងការនាំផលិតផលខ្មែរទៅកាន់ទីផ្សារអឺរ៉ុបកាន់តែទូលំទូលាយ»៕

ដោយ៖ រិទ្ធី, ប្រភព៖ ឯកអគ្គរាជទូតកម្ពុជា ប្រចាំប្រទេសរ៉ូម៉ានី