AKP កំពង់ធំ ថ្ងៃទី០៥ ខែកញ្ញា ឆ្នាំ២០២៦--ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹកនិងឧតុនិយមនិងជាប្រធានក្រុមការងារចុះមូលដ្ឋានស្រុកស្ទោងបានលើកឡើងថា សំណង់ហេដ្ឋារចនាសម្ព័ន្ធ និងការអភិវឌ្ឍន៍ព្រមទាំងការលើកកម្ពស់ជីវភាពពលរដ្ឋជាការគិតគូយកចិត្តទុកដាក់ខ្ពស់ពីសំណាក់សម្ដេចតេជោ ហ៊ុន សែន ។
ឯកឧត្តមរដ្ឋមន្ត្រីបានលើកឡើងដូច្នេះ នៅក្នុងឱកាសជួបសំណេះសំណាលសួរសុខទុក្ខមេគ្រួសារបក្ស ក្នុងឃុំទ្រា ស្រុកស្ទោង ខេត្តកំពង់ធំនាព្រឹកថ្ងៃទី០៥ ខែកញ្ញា ឆ្នាំ២០២៦។

ឯកឧត្តមបានសង្កត់ធ្ងន់ថា ក្នុងនាមសម្ដេចតេជោ ក្នុងនាមសម្ដេចធិបតី និងក្នុងនាមគណបក្សប្រជាជនកម្ពុជា ឯកឧត្តមនឹងខិតខំបន្តបេសកកម្ម កសាងអភិវឌ្ឍមូលដ្ឋាន ជាពិសេស សំណង់ហេដ្ឋារចននាសម្ព័ន្ធព្រមទាំងប្រព័ន្ធ ធារាសាស្រ្តថ្មីៗបន្ថែមទៀត ដើម្បីលើកកម្ពស់សុខុមាលភាព និងជីវភាពពលរដ្ឋក្នុងស្រុកស្ទោង ឱ្យកាន់តែប្រសើរឡើងថែមទៀត ស្របតាមគោលនយោបាយ និងយុទ្ធសាស្ត្ររបស់រាជរដ្ឋាភិបាលអាណត្តិទី៧ ក្រោមការដឹកនាំដ៏ប៉ិនប្រសព្វរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក្រោមម្លប់សុខសន្តិភាព។

ជាមួយគ្នានេះឯកឧត្តម ថោ ជេដ្ឋា បាន កោតសរសើរខ្ពស់ដល់លោក ផាង វី ប្រធានក្រុមការងារចុះមូលដ្ឋានឃុំទ្រា និងលោក សាយ គឹមឡម អភិបាលស្រុកស្ទោង និងសហការី ដែលបានរួបរួមសហការក្នុងការកសាងអភិវឌ្ឍមូលដ្ឋាន ជាពិសេសការចុះជួបសំណេះសំណាល និងឧបត្ថម្ភគាំទ្រស្បៀងដល់ប្រជាពលរដ្ឋដូចភ្លៀងរលឹមជាអាទិការកសាងជួសជុលផ្លូវលំជូនពលរដ្ឋធ្វើដំណើរបានងាយស្រួលជាងមុន ការកសាងជួសជុលប្រព័ន្ធប្រឡាយស្រោចស្រព ការជីកស្រះទឹក ដាក់បំពាក់សូឡាបំភ្លឺនៅពេលយប់ ការជួបសំណេះសំណាលឧបត្ថម្ភគាំទ្រលើកទឹកចិត្តក្រុមគ្រួសារវីរៈកងទ័ពជួរមុខ ជនភៀសសឹកសម្របសម្រួលប្រជាពលរដ្ឋក្នុងការពិនិត្យព្យាបាលជំងឺដោយឥតគិតថ្លៃ ការរៀបចំសង្ក្រាន្តឆ្នាំថ្មី ការប្រគេនទៀនព្រះវស្សា និងទេយ្យទាន ការឧបត្ថម្ភគាំទ្រដល់ស្ត្រីមានផ្ទៃពោះ ស្ត្រីទើបសម្រាល និងចូលរួមថវិកា និងគ្រឿងឧបភោគបរិភោគដល់ក្រុមគ្រួសារសព ព្រមទាំងសកម្មភាពយ៉ាងសកម្មជាច្រើនទៀត។

លើសពីនេះឯកឧត្តមបានជំរុញចលនា ស្មារតីគាំទ្រស្រឡាញ់បរិស្ថាន ចលនាលំនៅឋានស្អាត ការរួមគ្នាដាំដើមឈើថ្មីៗអស់ពីលទ្ធភាព ដើម្បីស្ដារឆ្លើយតបទៅនឹងកំណើនកម្ដៅបរិយាកាសសកល និងបាតុភូតផ្សេងៗ។
គួរបញ្ជាក់ផងដែរថា ការសំណេះសំណាលនៅក្នុងឱកាសនេះមានសមាជិកសមាជិកាមេគ្រួសារបក្ស ក្រុមការងារគណបក្សស្រុក យុវជនគណបក្សឃុំ ចូលរួមប្រមាណជាជិត៣ពាន់នាក់ ហើយឯកឧត្តមបានឧបត្ថម្ភក្នុងម្នាក់នូវថវិកាចំនួន២ម៉ឺនរៀលនិងមី១កេស៕

ដោយ ស៊ុម វណ្ណា