AKP កណ្ដាល ថ្ងៃទី៤ ខែកញ្ញា ឆ្នាំ២០២៦ -- ឯកឧត្តម គួច ចំរើន អភិបាលខេត្តកណ្ដាល បានក្រើនរំលឹកដល់អាជ្ញាធរក្រុង ស្រុក និងកងកម្លាំងមានសមត្ថកិច្ចគ្រប់លំដាប់ថ្នាក់ ត្រូវបន្តយកចិត្តទុកដាក់ខ្ពស់ក្នុងការរក្សាសន្តិសុខ សណ្តាប់ធ្នាប់សាធារណៈ និងលុបបំបាត់រាល់បទល្មើសល្បែងស៊ីសងខុសច្បាប់គ្រប់រូបភាព ជាពិសេស ល្បែងភ្នាល់តាមប្រព័ន្ធអ៊ីនធឺណិត (Online Betting) ដែលអាចបង្កផលប៉ះពាល់ធ្ងន់ធ្ងរដល់សន្តិសុខ សណ្តាប់ធ្នាប់សង្គម និងជីវភាពប្រជាពលរដ្ឋ ដែលអាចបំផ្លាញខ្លួនទៅជាបញ្ហាឆបោកតាមប្រព័ន្ធអនឡាញ (Online Scam) ដែលជារឿងមួយដែលយើងគ្រប់គ្នាត្រូវ តែយកចិត្តទុកដាក់ និងបន្តតាមដានជាប្រចាំ។

ឯកឧត្តម គួច ចំរើន មានប្រសាសន៍ដូចនេះនៅថ្ងៃទី៤ ខែកញ្ញា ឆ្នាំ២០២៦ នៅពេលអញ្ជើញបើកកិច្ចប្រជុំបូកសរុបលទ្ធផលការងារប្រចាំខែសីហា និងលើកទិសដៅការងារប្រចាំខែកញ្ញា ឆ្នាំ២០២៦ របស់រដ្ឋបាលខេត្តកណ្ដាល ដោយមានការអញ្ជើញចូលរួមពីអភិបាលរងខេត្ត មន្ទីរ អង្គភាពជុំវិញខេត្ត កងកម្លាំងមានសមត្ថកិច្ច និងមន្ត្រីពាក់ព័ន្ធជាច្រើនរូប ដើម្បីពិនិត្យ វាយតម្លៃលទ្ធផលការងារដែលសម្រេចបាន និងកំណត់វិធានការអនុវត្តការងារសំខាន់ៗឱ្យកាន់តែមានប្រសិទ្ធភាព។ឯកឧត្តមបន្តថា ចំពោះករណីល្បែងភ្នាល់តាមប្រព័ន្ធអ៊ីនធឺណិត (Online Betting) បានកំណត់ ត្រឹមថ្ងៃទី៣០ ខែកញ្ញា ឆ្នាំ២០២៦ ជាឱសានុវាទចុងក្រោយ សម្រាប់គ្រប់កាស៊ីណូទាំងអស់ក្នុងខេត្តកណ្ដាលត្រូវបញ្ឈប់មិនឱ្យមានល្បែងនេះជាដាច់ខាត ហើយចាប់ពីថ្ងៃទី១ ខែតុលា ឆ្នាំ២០២៦ តទៅ អាជ្ញាធរ និងកងកម្លាំងមានសមត្ថកិច្ចនឹងចុះត្រួតពិនិត្យ និងអនុវត្តវិធានការតាមច្បាប់ដោយផ្ទាល់នៅតាមទីតាំងកាស៊ីណូនានាក្នុងខេត្ត ដោយមិនមានការលើកលែង ឬយោគយល់ឡើយ។

ពាក់ព័ន្ធនឹងសុវត្ថិភាពចរាចរណ៍ផ្លូវគោក ឯកឧត្តមអភិបាលខេត្តបានណែនាំឱ្យកងកម្លាំងមានសមត្ថកិច្ច ត្រូវចុះត្រួតពិនិត្យ និងរឹតបន្តឹងការអនុវត្តច្បាប់ចរាចរណ៍ផ្លូវគោកនៅតាមដងផ្លូវនានាក្នុងខេត្ត ព្រមទាំងចាត់វិធានការផាកពិន័យ ចំពោះអ្នកដែលមិនគោរពច្បាប់ ស្របតាមការណែនាំរបស់ក្រសួងមហាផ្ទៃ ជាពិសេស ត្រូវយកចិត្តទុកដាក់ត្រួតពិនិត្យយានយន្តដឹកទំនិញដែលមានលក្ខណៈសំពីងសំពោង ដែលអាចបង្កគ្រោះថ្នាក់ដល់អ្នកប្រើប្រាស់ផ្លូវ។ 

សម្រាប់ការគ្រប់គ្រងសំរាម និងអនាម័យបរិស្ថាន ឯកឧត្តមអភិបាលខេត្តបានស្នើដល់អាជ្ញាធរក្រុង-ស្រុក ត្រូវខិតខំចាត់វិធានការឱ្យបានម៉ឺងម៉ាត់ចំពោះការចោលសំរាមពាសវាលពាសកាល ត្រូវបន្តដាក់កាមេរ៉ាសុវត្ថិភាពនៅតាមគោលដៅសំខាន់ៗ និងពង្រីកការដាក់កាមេរ៉ាឱ្យបានកាន់តែច្រើន ដើម្បីតាមដាន និងផាកពិន័យអ្នកចោលសំរាមពាសវាលពាសកាល ក្នុងគោលបំណងកែប្រែឥរិយាបថ និងបញ្ឈប់ការចោលសំរាមមិនត្រឹមត្រូវ។ ទន្ទឹមនឹងនេះ អាជ្ញាធរគ្រប់ក្រុង-ស្រុក ត្រូវបន្តយកចិត្តទុកដាក់រៀបចំសណ្តាប់ធ្នាប់តាមដងផ្លូវ ដោយត្រូវពិនិត្យ និងចាត់វិធានការចំពោះសំយ៉ាប តូប ឬសំណង់ផ្សេងៗដែលសង់រំលោភចូលចំណីផ្លូវ ព្រមទាំងពិនិត្យ និងចាត់វិធានការចំពោះអ្នកប្រមូល ឬយកភាស៊ីតាមទីផ្សារ ដែលអនុវត្តមិនស្របតាមបទប្បញ្ញត្តិ។ លើវិស័យបេឡាជាតិសន្តិសុខសង្គម (ប.ស.ស.) ឯកឧត្តមអភិបាលខេត្ត បានណែនាំឱ្យសាខា ប.ស.ស. ខេត្ត ត្រូវខិតខំធ្វើបច្ចុប្បន្នភាពបណ្ណ ប.ស.ស. ជូនមន្ត្រីរាជការ ដើម្បីធានាឱ្យការទទួលបានសេវាសន្តិសុខសង្គមមានភាពងាយស្រួល និងទាន់ពេលវេលា។

ដោយឡែកចំពោះ ការអនុវត្តគម្រោងនានានៅមូលដ្ឋាន ឯកឧត្តមអភិបាលខេត្តបានណែនាំឱ្យទីចាត់ការផែនការវិនិយោគខេត្ត ជួយសម្របសម្រួលរៀបចំវគ្គបណ្តុះបណ្តាលជំនាញបច្ចេកទេសពាក់ព័ន្ធនិងការងារសាងសង់ និងនីតិវិធីផ្សេងៗ ដើម្បីពង្រឹងសមត្ថភាពមន្ត្រីជំនាញនៅថ្នាក់ក្រុង-ស្រុក សំដៅធានាឱ្យការអនុវត្តការងារមានគុណភាព តម្លាភាព ស្របតាមបទដ្ឋានបច្ចេកទេស និងទាន់ពេលវេលា។ ជាមួយគ្នានេះ រាល់គម្រោងអភិវឌ្ឍន៍មូលដ្ឋាន ត្រូវរៀបចំផែនការ និងឯកសារឱ្យបានច្បាស់លាស់ ត្រឹមត្រូវ និងទាន់ពេលវេលា ដើម្បីធានាឱ្យការអនុវត្តគម្រោងមានប្រសិទ្ធភាព និងឆ្លើយតបទៅនឹងតម្រូវការរបស់ប្រជាពលរដ្ឋ៕

ដោយ ណយ នឿន (ប្រភព៖ រដ្ឋបាលខេត្តកណ្តាល)