AKP កណ្ដាល ថ្ងៃទី៤ ខែកញ្ញា ឆ្នាំ២០២៦ -- ឯកឧត្តម គួច ចំរើន អភិបាលខេត្តកណ្តាល កាលពីរសៀលថ្ងៃទី០៣ ខែកញ្ញា ឆ្នាំ២០២៦ បានអញ្ជើញដឹកនាំកិច្ចប្រជុំ ដើម្បីដាក់បទបញ្ជា និងណែនាំផ្ទាល់ដល់តំណាងក្រុមហ៊ុនកាស៊ីណូចំនួន ០៥ទីតាំង ស្ថិតក្នុងស្រុកលើកដែក និងក្រុងសំពៅពូន ឱ្យបញ្ឈប់រាល់សកម្មភាពភ្នាល់តាមប្រព័ន្ធអនឡាញ (Online Betting) ជាកំហិត។

កិច្ចប្រជុំនេះបានរៀបចំឡើងនៅសាលាខេត្តកណ្តាល ដោយមានការអញ្ជើញចូលរួមពីសំណាក់អភិបាលរងខេត្ត មន្ទីរអង្គភាពពាក់ព័ន្ធ កងកម្លាំងមានសមត្ថកិច្ច អាជ្ញាធរមូលដ្ឋានស្រុកលើកដែក និងក្រុងសំពៅពូន ព្រមទាំងម្ចាស់ទីតាំង និងតំណាងក្រុមហ៊ុនកាស៊ីណូទាំង០៥ ដោយផ្ទាល់។

នៅក្នុងឱកាសនោះ ឯកឧត្តមអភិបាលខេត្ត បានគូសបញ្ជាក់ថា ការលុបបំបាត់ និងបង្ក្រាបរាល់បទល្មើសល្បែងស៊ីសងខុសច្បាប់គ្រប់រូបភាព ជាពិសេសល្បែងភ្នាល់តាមប្រព័ន្ធអ៊ីនធឺណិត អនឡាញ (Online Betting) ដែលជាប្រភពបង្កផលប៉ះពាល់យ៉ាងធ្ងន់ធ្ងរដល់សន្តិសុខ សណ្តាប់ធ្នាប់សង្គម និងជីវភាពរស់នៅរបស់ប្រជាពលរដ្ឋ។ ដើម្បីធានាបាននូវប្រសិទ្ធភាពនៃការអនុវត្ត ឯកឧត្តមបានកំណត់កាលបរិច្ឆេទដាក់ឱសានុវាទចុងក្រោយ ត្រឹមថ្ងៃទី៣០ ខែកញ្ញា ឆ្នាំ២០២៦ ហើយចាប់ពីថ្ងៃទី០១ ខែតុលា ឆ្នាំ២០២៦ តទៅ អាជ្ញាធរមានសមត្ថកិច្ចនឹងចុះត្រួតពិនិត្យ និងអនុវត្តវិធានការច្បាប់ដោយផ្ទាល់នៅតាមទីតាំងកាស៊ីណូទាំងនោះ ដោយគ្មានការលើកលែង ឬយោគយល់ឡើយ គឺគ្រប់កាស៊ីណូទាំងអស់ក្នុងខេត្ត ត្រូវតែគោរព និងអនុវត្តតាមការកំណត់ពេលវេលានេះ ដោយគ្មានការលើកលែង ហើយកាស៊ីណូទាំងអស់ត្រូវបានអនុញ្ញាតឱ្យមានតែអតិថិជនដែលមកលេងដោយផ្ទាល់ដល់ទីតាំងប៉ុណ្ណោះ។

ឯកឧត្តម គួច ចំរើន ក៏បានអំពាវនាវដល់អាជ្ញាធរស្រុកលើកដែក និងក្រុងសំពៅពូន និងកងកម្លាំងសមត្ថកិច្ចគ្រប់ជាន់ថ្នាក់ ត្រូវបន្តតាមដាន ស្រាវជ្រាវ និងក្តាប់ព័ត៌មានឱ្យបានជាប់ជាប្រចាំ ដើម្បីធានាថា បន្ទាប់ពីដាច់ខែកញ្ញានេះទៅ ខេត្តកណ្តាលនឹងក្លាយជាខេត្តគំរូមួយដែលគ្មានសកម្មភាពល្បែងស៊ីសងតាមអនឡាញ (Online Betting) ឡើយ៕

ដោយ៖ ណយ នឿន (ប្រភព៖ រដ្ឋបាលខេត្តកណ្តាល)