AKP ភ្នំពេញ ថ្ងៃទី៣ ខែកញ្ញា ឆ្នាំ២០២៦--ក្រសួងអប់រំ យុវជន និងកីឡា បានសម្តែងនូវការកោតសរសើរចំពោះស្មារតីតស៊ូរបស់សិស្សនៅខេត្តជាប់ព្រំដែនទោះឆ្លងកាត់សង្គ្រាម ប៉ុន្តែអត្រានៃការប្រឡងជាប់សញ្ញាបត្រមធ្យមសិក្សាទុតិយភូមិ សម័យប្រឡង៖ ១០ សីហា ២០២៦ គឺមិនចាញ់ខេត្តផ្សេងទៀតឡើយ ក្នុងនោះខេត្តឧត្តរមានជ័យមានអត្រាសិស្សប្រឡងជាប់ប្រមាណ ៨៩.៤៤% ខេត្តព្រះវិហារ ៨៧.៩៦% និងខេត្តបន្ទាយមានជ័យ ៨៤.៣៧% ដែលជាអត្រាមួយដ៏ល្អ។ 

សូមជម្រាបថា ក្រសួងអប់រំ យុវជន និងកីឡា កាលពីព្រឹកថ្ងៃទី២ ខែកញ្ញា ឆ្នាំ២០២៦ បានប្រកាសនៅទូទាំងប្រទេសនូវលទ្ធផលនៃការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង៖ ១០ សីហា ២០២៦ ដោយបានឱ្យដឹងថា មានបេក្ខជនប្រឡងជាប់សរុបចំនួន ១២៥ ៩៧៥នាក់ ត្រូវជា ៨៤.០៦% នៃបេក្ខជនប្រឡងសរុបនៅទូទាំងប្រទេស ដោយក្នុងចំណោមបេក្ខជនដែលប្រឡងជាប់ទាំងចំនួន ១២៥ ៩៧៥នាក់នេះ ក្នុងនោះមានអ្នកដែលទទួលបាននិទ្ទេស A មានចំនួន ២ ០២២នាក់ និទ្ទេស B ចំនួន ៨ ៨៤៨នាក់ និទ្ទេស C ចំនួន ២៣ ៤២២ នាក់ និទ្ទេស D ចំនួន ៤៤ ៨៦៩នាក់ និងនិទ្ទេស E ចំនួន ៤៦ ៨១៤នាក់ ហើយភ្លាមៗនេះដែរ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត បានប្រកាសផ្តល់អាហារូបករណ៍ដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិតចំនួន ៤ ៦៥០កន្លែងសម្រាប់ថ្នាក់បរិញ្ញាបត្ររង ថ្នាក់បរិញ្ញាបត្រ និងថ្នាក់បរិញ្ញាបត្រជាន់ខ្ពស់ ឆ្នាំសិក្សា២០២៦-២០២៧ ដោយឆ្លងកាត់ការប្រឡង និងមិនឆ្លងកាត់ការប្រឡងដោយចាប់ផ្តើមទទួលពាក្យចាប់ពីថ្ងៃជូនដំណឹងនេះតទៅ៕

ដោយ៖ ចាន់ សុភឿន (ប្រភព៖ ក្រសួងអប់រំ)