AKP ភ្នំពេញ ថ្ងៃទី០១ ខែកញ្ញា ឆ្នាំ២០២៦ -- ប្រទេសសិង្ហបុរីកំពុងពិចារណាដាក់ចេញនូវដែនកំណត់ប្រចាំថ្ងៃទៅលើការប្រើប្រាស់ប្រព័ន្ធផ្សព្វផ្សាយសង្គមសម្រាប់យុវវ័យ រួមជាមួយនឹងវិធានការចាំបាច់ផ្សេងទៀតដែលមានគោលបំណងទប់ស្កាត់មុខងារញៀន និងអន្តរកម្មអនឡាញដែលអាចបង្កគ្រោះថ្នាក់ដែលពាក់ព័ន្ធនឹងអ្នកដែលមានអាយុក្រោម ១៨ឆ្នាំ។

រដ្ឋមន្ត្រីក្រសួងអភិវឌ្ឍន៍ឌីជីថល និងព័ត៌មានសិង្ហបុរី លោកស្រី ចូសហ្វីន តេអូ បាននិយាយនៅក្នុងបទសម្ភាសន៍មួយជាមួយប្រព័ន្ធផ្សព្វផ្សាយមួយ ដូចដែលបានរាយការណ៍ដោយសារព័ត៌មាន The Straits Times ដែលជាសារព័ត៌មានប្រចាំថ្ងៃជាភាសាអង់គ្លេសក្នុងស្រុកថា វិធានការនេះអាចជួយណែនាំនូវចំណុចបញ្ឈប់ដោយធម្មជាតិបាន។

លោកស្រីបាននិយាយថា ការកំណត់ពេលវេលាសម្រាប់ការប្រើប្រាស់វេទិកាជាក់លាក់មួយ អាចជាមធ្យោបាយមួយក្នុងការដោះស្រាយជាមួយនឹងការប្រើប្រាស់ដោយគ្មានដែនកំណត់ ដោយលោកស្រីបានបន្ថែមថា ការកំណត់ពេលវេលាប្រើប្រាស់ប្រព័ន្ធផ្សព្វផ្សាយប្រចាំថ្ងៃកំពុងត្រូវបាន«ពិភាក្សាយ៉ាងយកចិត្តទុកដាក់»។

លោកស្រីរដ្ឋមន្ត្រីបានបង្ហាញថា ការផ្លាស់ប្តូរច្បាប់នឹងត្រូវដាក់ជូននៅដើមឆ្នាំ២០២៧ ដើម្បីសម្រួលដល់ការអនុវត្តតាមរយៈការត្រួតពិនិត្យអាយុ។

កាលពីថ្ងៃទី២៣ ខែសីហា នាយករដ្ឋមន្ត្រីសិង្ហបុរី លោក ឡរេនស៍ វ៉ុងបាននិយាយនៅក្នុងសុន្ទរកថាជួបជុំទិវាជាតិឆ្នាំ២០២៦ របស់លោកថា វេទិកាប្រព័ន្ធផ្សព្វផ្សាយសង្គមដែលចង់មានអ្នកប្រើប្រាស់អាយុក្រោម ១៨ឆ្នាំនៅក្នុងប្រទេស ត្រូវតែដាក់ចេញនូវការការពារដ៏រឹងមាំជាងមុន ដើម្បីការពារពួកគេពីការប្រៀបធៀបមិនល្អ និងភាពឯកោក្នុងសង្គម ដែលជាការផ្លាស់ប្តូរពីការពឹងផ្អែកតែលើការទទួលខុសត្រូវរបស់ឪពុកម្តាយ និងការគ្រប់គ្រងខ្លួនឯងរបស់វេទិកាទាំងនោះឆ្ពោះទៅរកអន្តរាគមន៍ផ្នែកច្បាប់យ៉ាងម៉ឺងម៉ាត់៕

ដោយ៖ យា ចិន្ដាខន្ដី (ប្រភព៖ VNA)