AKP ភ្នំពេញ ថ្ងៃទី២៨ ខែសីហា ឆ្នាំ២០២៦ -- សេចក្ដីប្រកាសទីក្រុងភ្នំពេញត្រូវបានអនុម័តនាថ្ងៃទី២៨ ខែសីហា ឆ្នាំ២០២៦ នៅក្នុងសន្និសីទប្រធានសភានៃអន្តរសភាលើកទី២ (ISC-2) នៅរាជធានីភ្នំពេញ ព្រះរាជាណាចក្រកម្ពុជា ដោយប្រធានសភា និងតំណាងសភាមកពីតំបន់ផ្សេងៗជុំវិញពិភពលោក បានជួបជុំគ្នានៅក្នុងសន្និសីទនេះ ចាប់ពីថ្ងៃទី២៦ ដល់ថ្ងៃទី២៨ ខែសីហា ឆ្នាំ២០២៦។

ក្នុងសេចក្ដីប្រកាសទីក្រុងភ្នំពេញបានឱ្យដឹងថា ប្រធានសភានៃអន្តរសភាលើកទី២ គាំទ្រការបន្តការពង្រីកប្រសិទ្ធភាព និងចីរភាពរយៈពេលវែង នៃសន្និសីទប្រធានសភានៃអន្តរសភា។ ក្នុងន័យនេះ គឺលើកទឹកចិត្តឱ្យសភាដែលចូលរួម លេខាធិការដ្ឋាន ISC និងសមាជិកស្ថាបនិករបស់ ISC បន្តការពិគ្រោះយោបល់ ដើម្បីទទួលស្វាគមន៍សភាចំនួនកាន់តែច្រើន និងរៀបចំយន្តការដែលមានលក្ខណៈ ជាក់ស្តែង បរិយាបន្ន បត់បែនបាន និងព្រមព្រៀងគ្នាទៅវិញទៅមក ដើម្បីពង្រឹងបន្ថែមនូវនិរន្តរភាពស្ថាប័ន ការសម្របសម្រួលប្រតិបត្តិការ ការទទួលស្គាល់នៃតួនាទីស្នូល និងការអភិវឌ្ឍរយៈពេលវែងរបស់ISC។ ក្នុងសេចក្ដីប្រកាសបានបញ្ជាក់ថា៖ «យើងខ្ញុំ សូមស្វាគមន៍ និងថ្លែងអំណរគុណសាធារណរដ្ឋឥណ្ឌូណេស៊ី ក្នុងការធ្វើជាម្ចាស់ផ្ទះនៃសន្និសីទ ប្រធានសភាអន្តរសភាលើកទី៣ (ISC-3) នៅឆ្នាំ២០២៧ និងសូមបង្ហាញការគាំទ្រយ៉ាងពេញទំហឹងរបស់យើងចំពោះសភាជាន់ខ្ពស់នៃសាធារណរដ្ឋឥណ្ឌូណេស៊ី ក្នុងការបន្តជំរុញវឌ្ឍនភាព និងសមិទ្ធផលដែលបានបង្កើតឡើងតាមរយៈសន្និសីទនេះ»។

ក្នុងសន្និសីទប្រធានសភានៃអន្តរសភាលើកទី២ ក៏បានបញ្ជាក់ជាថ្មីថា កិច្ចសហប្រតិបត្តិការអន្តរជាតិ និងពហុភាគីនិយម នៅតែជាមូលដ្ឋានដែលមិនអាច ខ្វះបានសម្រាប់សន្តិភាព សន្តិសុខ និងការអភិវឌ្ឍប្រកបដោយចីរភាព។ សេចក្ដីប្រកាសបានបន្ថែមថា៖ «ដោយការរួបរួមគ្នាប្រកបដោយដោយការទទួលខុសត្រូវរបស់យើង ដើម្បីទទួលបានពិភពលោកមួយដែល មានចីរភាព យុត្តិធម៌ និងសមធម៌កាន់តែប្រសើរ សម្រាប់មនុស្សជំនាន់នេះ និងអនាគត យើងខ្ញុំប្តេជ្ញាបន្តធ្វើ ការរួមគ្នា ដើម្បីគោរព និងលើកកម្ពស់ការដោះស្រាយវិវាទដោយសន្តិវិធីស្របតាមច្បាប់អន្តរជាតិ ពង្រឹងការទូតសភានិងចូលរួមចំណែកកសាងពិភពលោកមួយប្រកបដោយសន្តិភាព បរិយាបន្ន យុត្តិធម៌និងវិបុលភាពកាន់តែប្រសើរ៕

ដោយ ទេស ច័ន្ទសុធារី