AKP សៀមរាប ថ្ងៃទី២៨ ខែសីហា ឆ្នាំ២០២៦--ឯកឧត្តម មាស ម៉ូនីកា អនុរដ្ឋលេខាធិការក្រសួងសាធារណការ និងដឹកជញ្ជូន បានថ្លែងថា ការអភិវឌ្ឍសេវាដឹកជញ្ជូនចម្រុះទាំងរដ្ឋ និងឯកជន ឱ្យមានភាពទំនើប សុវត្ថិភាព ផាសុកភាព និងមានបរិយាបន្ន គឺជាអាទិភាពដ៏សំខាន់មួយរបស់រាជរដ្ឋាភិបាល និងក្រសួងសាធារណការ និងដឹកជញ្ជូនក្នុងគោលបំណងលើកកម្ពស់គុណភាពសេវាដឹកជញ្ជូន និងសម្រួលដល់ការធ្វើដំណើររបស់ប្រជាពលរដ្ឋគ្រប់រូប។

ការលើកឡើងនេះ ធ្វើឡើងក្នុងសិក្ខាសាលារកធាតុចូលស្តីពី «ការកែសម្រួលប្រកាសស្តីពីសញ្ញាសម្គាល់រថយន្តធ្វើអាជីវកម្មដឹកជញ្ជូន និងការរចនាជាសកល និងការអភិវឌ្ឍប្រកបដោយបរិយាបន្នក្នុងសេវាដឹកជញ្ជូនអ្នកដំណើរតាមផ្លូវគោក និងផ្លូវដែក» ដែលរៀបចំដោយក្រសួងសាធារណការ និងដឹកជញ្ជូន នៅខេត្តសៀមរាប នាព្រឹកថ្ងៃទី២៨ ខែសីហា ឆ្នាំ២០២៦។

ឯកឧត្តម មាស ម៉ូនីកា បានបញ្ជាក់ថា ក្រសួងកំពុងយកចិត្តទុកដាក់ជាពិសេសលើការលើកកម្ពស់បរិយាបន្នសម្រាប់មនុស្សចាស់ និងជនមានពិការភាព ដើម្បីឱ្យពួកគាត់អាចប្រើប្រាស់សេវាដឹកជញ្ជូន និងធ្វើដំណើរបានដោយងាយស្រួល សុវត្ថិភាព និងស្មើភាពដោយមិនទុកឱ្យក្រុមជនងាយរងគ្រោះណាមួយនៅឆ្ងាយពីការអភិវឌ្ឍសង្គមឡើយ។

ឯកឧត្តមបន្ថែមថា ការរៀបចំលិខិតបទដ្ឋានគតិយុត្តពាក់ព័ន្ធនឹងការដឹកជញ្ជូន គឺជាចំណែកដ៏សំខាន់ក្នុងការជំរុញការអភិវឌ្ឍសេដ្ឋកិច្ចសង្គម និងចូលរួមសម្រេចគោលដៅរបស់រាជរដ្ឋាភិបាល ក្នុងការប្រែក្លាយកម្ពុជាទៅជាប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងប្រទេសមានចំណូលខ្ពស់នៅឆ្នាំ២០៥០៕

ដោយ ឃុត សៅ