AKP ភ្នំពេញ ថ្ងៃ២៧ ខែសីហា ឆ្នាំ២០២៦--រយៈពេលត្រឹមតែមួយសប្តាហ៍ ពោលគឺគិតចាប់ពីថ្ងៃទី០៦ ដល់ថ្ងៃទី១២ ខែសីហា ឆ្នាំ២០២៦ មន្រ្តីឧទ្យានុរក្សនៅតាមមន្ទីរបរិស្ថាននានា បានសហការជាមួយអាជ្ញាធរពាក់ព័ន្ធ អង្គការដៃគូ រួមជាមួយប្រជាពលរដ្ឋ អ្នកស្រឡាញ់បរិស្ថាន និងអង្គការសមាគមសង្គមស៊ីវិល បង្ក្រាបបទល្មើសក្នុងតំបន់ការពារធម្មជាតិបានចំនួនសរុប ៣៣ករណី និងបានកសាងសំណុំរឿងចំនួន ០៤ករណីបញ្ជូនទៅតុលាការ។

ក្រសួងបរិស្ថានបានឱ្យដឹងនៅថ្ងៃទី២៦ ខែសីហា ឆ្នាំ២០២៦ ថា ក្រុមការងារជំនាញ បានចាប់ឃាត់ រក្សាទុកវត្ថុតាងនៅតាមស្នាក់ការក្នុងតំបន់ការពារធម្មជាតិ រួមមាន រថយន្តចំនួន ០១គ្រឿង គោយន្ត/រ៉ឺម៉កចំនួន ០៦គ្រឿង រណាយន្តចំនួន ២៥គ្រឿង កាំភ្លើងកែច្នៃចំនួន ០៣ដើម និងអន្ទាក់ចំនួន ៦៨ខ្សែ។ ក្នុងពេលជាមួយគ្នានេះ ក្រុមការងារបានដកហូតឈើចំនួន ១៨,៤៣ម៉ែត្រគូប និងបង្កាបការទន្រ្ទានដីព្រៃធ្វើជាកម្មសិទ្ធិខុសច្បាប់ចំនួន ២,៧០ហិកតា។

សូមបញ្ជាក់ថា ក្រសួងបរិស្ថានបានដាក់ចេញនូវវិធានការយ៉ាងម៉ឺងម៉ាត់ក្នុងការអនុវត្តច្បាប់ និងមិនមានការលើកលែង ដើម្បីបង្ក្រាបបទល្មើសធនធានធម្មជាតិ និងពង្រឹងប្រសិទ្ធភាព នៃការគ្រប់គ្រងការពារធនធានធម្មជាតិ និងការពង្រីកគម្របបៃតងនៅតាមតំបន់ការពារធម្មជាតិទាំង ៧៣កន្លែងទូទាំងប្រទេស។

ជាមួយគ្នានេះ ដើម្បីពង្រឹងការគ្រប់គ្រងធនធានធម្មជាតិនៅឧទ្យានជាតិព្រះសុរាម្រិត-កុសមៈ «គីរីរម្យ» ក្នុងភូមិសាស្រ្តខេត្តកំពង់ស្ពឺ ឱ្យមានប្រសិទ្ធភាពខ្ពស់ និងគោរពតាមបទបញ្ជាសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ក្រសួងបរិស្ថានបានបន្តធ្វើការរួមគ្នាជិតស្និទ្ធជាមួយក្រសួង ស្ថាប័នពាក់ព័ន្ធ អាជ្ញាធរមូលដ្ឋានគ្រប់ថ្នាក់ អង្គការដៃគូ សាលាដំបូងខេត្ត អង្គការ សមាគម សង្គមស៊ីវិល និងប្រជាពលរដ្ឋ នៅតាមសហគមន៍មូលដ្ឋាន ដើម្បីទប់ស្កាត់បទល្មើសព្រៃឈើ និងធានានិរន្តរភាពបរិស្ថាននៅក្នុងតំបន់ការពារធម្មជាតិ។

ក្នុងពេលជាមួយគ្នានេះ ក្រសួងបានជំរុញឱ្យការចុះល្បាតកាន់តែមានប្រសិទ្ធភាព ដោយផ្តោតលើការស្រាវជ្រាវ ប្រមូលភស្តុតាង រៀបចំឯកសារឱ្យបានច្បាស់លាស់ ដើម្បីបញ្ជូនទៅតុលាការ មានន័យថា រាល់ជនល្មើស ដូចជាកាប់ព្រៃឈើ ឬទន្ទ្រានដីព្រៃខុសច្បាប់ ត្រូវបញ្ជូនទៅតុលាការដើម្បីឃុំខ្លួន និងចាត់វិធានការច្បាប់ទាំងស្រុង។

នៅក្នុងក្រមបរិស្ថាន និងធនធានធម្មជាតិ ចំពោះបទល្មើសពាក់ព័ន្ធនឹងការគ្រប់គ្រងតំបន់ការពារធម្មជាតិ មាត្រា៨៥០ ចំណុច គ បានចែងថា កាប់ ផ្តួល រំលំ គ្រៀវ ចងរឹត បំពុល ធ្វើឱ្យរបួស ធ្វើឱ្យខូចខាត គាស់រម្លើង រុករាន ឬបំផ្លាញព្រៃឈើ និងរុក្ខជាតិព្រៃ ដែលស្ថិតក្នុងចំណាត់ថ្នាក់ទី៥ និងទី៦ នៃចំណាត់ថ្នាក់ប្រភេទរុក្ខជាតិព្រៃ ដោយគ្មានការអនុញ្ញាត នឹងត្រូវដាក់ពន្ធនាគារពី ១ឆ្នាំ ទៅ ៥ឆ្នាំ និងពិន័យជាប្រាក់ពី ១០០.០០០.០០០រៀល ទៅ ៥០០.០០០.០០០រៀល៕

ដោយ៖ មករា