AKP បន្ទាយមានជ័យ ថ្ងៃទី២៦ ខែសីហា ឆ្នាំ២០២៦--«បណ្ណកម្មសិទ្ធិដីធ្លី» មិនមែនគ្រាន់តែជាក្រដាសផ្លូវការមួយសន្លឹកសម្រាប់បញ្ជាក់អំពីកម្ម សិទ្ធិលើអចលនវត្ថុនោះទេ ប៉ុន្តែជាសិទ្ធិស្របច្បាប់ពេញលេញ ជាខែលការពារទ្រព្យសម្បត្តិ របស់ប្រជាពលរដ្ឋ និងជាទ្រព្យសកម្មដ៏មានតម្លៃដែលអាចយកទៅប្រើប្រាស់ជាមូលដ្ឋានសម្រាប់ ការអភិវឌ្ឍសេដ្ឋកិច្ចគ្រួសារ។ នេះជាការគូសបញ្ជាក់របស់ ឯកឧត្តម អ៊ុ រាត្រី អភិបាលនៃ គណៈអភិបាលខេត្តបន្ទាយមានជ័យ ក្នុងពិធីចែកវិញ្ញាបនបត្រសម្គាល់ម្ចាស់អចលនវត្ថុចំនួន ៦ ០២៥ បណ្ណ ជូនប្រជាពលរដ្ឋនៅភូមិពន្លៃ ឃុំពន្លៃ ស្រុកភ្នំស្រុក នាព្រឹកថ្ងៃទី២៦ ខែសីហា ឆ្នាំ២០២៦នេះ។

ពិធីនេះត្រូវបានរៀបចំឡើងដោយមន្ទីររៀបចំដែនដី នគរូបនីយកម្ម សំណង់ និងសុរិយោដី ខេត្តបន្ទាយមានជ័យ និងរដ្ឋបាលស្រុកភ្នំស្រុក នៅវត្តពន្លៃ ភូមិពន្លៃ ឃុំពន្លៃ ស្រុកភ្នំស្រុក ក្រោមអធិបតីភាព ឯកឧត្តម អ៊ុ រាត្រី ដោយមានការចូលរួមពីមន្ត្រីជំនាញ អាជ្ញាធរមូលដ្ឋាន និងប្រជាពលរដ្ឋដែលជាម្ចាស់អចលនវត្ថុ។

ថ្លែងក្នុងឱកាសនោះ ឯកឧត្តម អ៊ុ រាត្រី បានគូសបញ្ជាក់ថា ការផ្តល់វិញ្ញាបនបត្រ សម្គាល់ម្ចាស់អចលនវត្ថុនាពេលនេះ មានសារៈសំខាន់យ៉ាងខ្លាំងសម្រាប់ប្រជាពលរដ្ឋ ព្រោះវាមិន ត្រឹមតែជួយបញ្ចប់ក្តីព្រួយបារម្ភពាក់ព័ន្ធនឹងសិទ្ធិកាន់កាប់ដីធ្លី ឬបញ្ហាវិវាទដែលអាចកើតមាន នោះទេ ប៉ុន្តែថែមទាំងជាការទទួលស្គាល់កម្មសិទ្ធិស្របច្បាប់ ដែលត្រូវបានការពារដោយ ច្បាប់យ៉ាងរឹងមាំ។

ឯកឧត្តមអភិបាលខេត្តបានមានប្រសាសន៍ថា បណ្ណកម្មសិទ្ធិទាំងនេះគឺជាផ្លែផ្កាកើតចេញ ពីនយោបាយគិតគូរពីប្រជាជនជាចម្បងរបស់រាជរដ្ឋាភិបាល ក្រោមការដឹកនាំដ៏ឈ្លាសវៃ និងប្រកប ដោយគតិបណ្ឌិតរបស់សម្តេចមហាបវរធិបតី ហ៊ុន ម៉ាណែត។ វាជាបង្អែកសេដ្ឋកិច្ចដ៏រឹងមាំ ដែលបងប្អូនអាចយកទៅប្រើប្រាស់ជាទុនបម្រុង ដើម្បីពង្រីកមុខរបរ បង្កើនប្រាក់ចំណូល និងលើកកម្ពស់លំនឹងជីវភាពគ្រួសារឱ្យកាន់តែប្រសើរឡើងពីមួយថ្ងៃទៅមួយថ្ងៃ។

តាមរយៈប្រសាសន៍នេះ ឯកឧត្តម អ៊ុ រាត្រី បានបង្ហាញថា ការចេញបណ្ណកម្មសិទ្ធិដីធ្លីមាន អត្ថប្រយោជន៍លើសពីការបញ្ជាក់សិទ្ធិកាន់កាប់ ពោលគឺវាអាចក្លាយជាផ្នែកមួយនៃមូលដ្ឋានទ្រព្យ សម្បត្តិដែលជួយឱ្យប្រជាពលរដ្ឋមានលទ្ធភាពរៀបចំផែនការសេដ្ឋកិច្ចគ្រួសារ ពង្រីកមុខរបរ និងបង្កើនជីវភាពរស់នៅឱ្យកាន់តែប្រសើរ។

ជាមួយគ្នានេះ ឯកឧត្តម អ៊ុ រាត្រី បានសម្តែងការកោតសរសើរ និងវាយតម្លៃខ្ពស់ ចំពោះមន្ត្រីជំនាញនៃមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្ត ព្រមទាំង អាជ្ញាធរដែនដីគ្រប់លំដាប់ថ្នាក់ដែលបានខិតខំបំពេញភារកិច្ចយ៉ាងសកម្ម ទាំងយប់ទាំងថ្ងៃ ដើម្បីសម្រេចការងារចេញបណ្ណកម្មសិទ្ធិជូនប្រជាពលរដ្ឋបានជាបន្តបន្ទាប់។
ឯកឧត្តមអភិបាលខេត្តបានចាត់ទុកការងារចុះបញ្ជីដីធ្លី និងការផ្តល់បណ្ណកម្មសិទ្ធិជូន ប្រជាពលរដ្ឋថា ជាការងារដែលត្រូវការភាពច្បាស់លាស់ តម្លាភាព និងការទទួលខុសត្រូវខ្ពស់ ពីមន្ត្រីជំនាញ និងអាជ្ញាធរគ្រប់លំដាប់ថ្នាក់ ដើម្បីធានាថា សិទ្ធិស្របច្បាប់របស់ប្រជា ពលរដ្ឋត្រូវបានការពារ និងផ្តល់សេវាសាធារណៈប្រកបដោយប្រសិទ្ធភាព។

ទន្ទឹមនឹងការផ្តល់បណ្ណកម្មសិទ្ធិ ឯកឧត្តម អ៊ុ រាត្រី ក៏បានផ្តាំផ្ញើដល់ប្រជាពលរដ្ឋ ដែលទទួលបានបណ្ណនៅថ្ងៃនេះ ឱ្យយកចិត្តទុកដាក់រក្សាទុកបណ្ណកម្មសិទ្ធិឱ្យបានល្អ ចៀសវាង ការខូចខាត ការបាត់បង់ ឬការប្រគល់ទៅឱ្យជនខិលខូចដោយមិនមានការប្រុងប្រយ័ត្ន។ ជាពិសេស ត្រូវប្រើប្រាស់ទ្រព្យសម្បត្តិ និងសិទ្ធិស្របច្បាប់ដែលខ្លួនទទួលបាននេះ ប្រកបដោយ ការទទួលខុសត្រូវ និងគិតគូរដល់ផលប្រយោជន៍រយៈពេលវែងរបស់គ្រួសារ។

ក្នុងឱកាសនេះ ប្រជាពលរដ្ឋបានសម្តែងនូវសេចក្តីសោមនស្សរីករាយ និងថ្លែងអំណរគុណ យ៉ាងជ្រាលជ្រៅចំពោះ សម្តេចមហាបវរធិបតី ហ៊ុន ម៉ាណែត ព្រមទាំងថ្នាក់ដឹកនាំ និងអាជ្ញាធរ ខេត្តបន្ទាយមានជ័យ ដែលបានយកចិត្តទុកដាក់លើការផ្តល់សេវាសាធារណៈ និងដោះស្រាយ បញ្ហាដែលពាក់ព័ន្ធដោយផ្ទាល់ជាមួយជីវភាពរស់នៅរបស់ប្រជាពលរដ្ឋនៅមូលដ្ឋាន។

ការចែកវិញ្ញាបនបត្រសម្គាល់ម្ចាស់អចលនវត្ថុចំនួន ៦ ០២៥ បណ្ណ នៅភូមិពន្លៃ នាពេលនេះ ដូច្នេះ មិនត្រឹមតែជាពិធីប្រគល់បណ្ណកម្មសិទ្ធិមួយលើកប៉ុណ្ណោះទេ ប៉ុន្តែជាសក្ខីភាពមួយនៃ ការពង្រឹងសិទ្ធិស្របច្បាប់លើទ្រព្យសម្បត្តិ ការកាត់បន្ថយហានិភ័យវិវាទដីធ្លី និងការបង្កើន មូលដ្ឋានទ្រព្យសម្បត្តិសម្រាប់ប្រជាពលរដ្ឋ ដើម្បីឱ្យពួកគាត់អាចរស់នៅប្រកបដោយភាពស្ងប់សុខ និងប្រើប្រាស់ទ្រព្យសម្បត្តិរបស់ខ្លួនជាមូលដ្ឋានសម្រាប់កសាងជីវភាព និងអនាគតកាន់ តែប្រសើរ៕

ដោយ ឈុន សារ៉ាត