AKP បន្ទាយមានជ័យ ថ្ងៃទី២៦ ខែសីហា ឆ្នាំ២០២៦--ដើម្បីឆ្លើយតបទៅនឹងតម្រូវការទីផ្សារ និងការលើកកម្ពស់សុវត្ថិភាពម្ហូបអាហារ មន្ទីរកសិកម្ម រុក្ខាប្រមាញ់ និងនេសាទ ខេត្តបន្ទាយមានជ័យ សហការជាមួយអគ្គនាយកដ្ឋានក្សេត្រសាស្ត្រ បានរៀបចំសិក្ខាសាលាស្តីពី «ស្តង់ដារការអនុវត្តកសិកម្មល្អ (CamGAP) និងនីតិវិធីនៃការផ្តល់វិញ្ញាបនបត្រលើដំណាំស្វាយ និងបន្លែ» កាលពីថ្ងៃទី២៥ ខែសីហា ឆ្នាំ២០២៦ ដើមី្បពង្រឹងខ្សែច្រវាក់ផលិតកម្មកសិកម្មប្រកបដោយចីរភាព ក្រោមវត្តមាន លោក រុន សុផាន់ណារ៉ា អនុប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តបន្ទាយមានជ័យ ដោយមានការសម្របសម្រួលពីមន្ត្រីគម្រោងថ្នាក់ខេត្ត និងក្រុមការងារអនុវត្តគម្រោងនៃអគ្គនាយកដ្ឋានក្សេត្រសាស្ត្រ។ សិក្ខាសាលាដែលរៀបចំឡើងនៅព្រះវិហារស្ត្រីគ្រីស្ទបរិស័ទដំណឹងល្អខ្មែរផ្សារថ្មី ក្រុងសិរីសោភ័ណ នេះ មានការចូលរួមយ៉ាងកុះករពីតំណាងសហគមន៍កសិកម្ម អាជីវករ អ្នកលក់បន្លែ ព្រមទាំងអ្នកលក់ជី និងថ្នាំកសិកម្ម សរុបចំនួន ៧៧នាក់ (ក្នុងនោះស្ត្រី ៣៣នាក់)។

ក្នុងពិធីបើកសិក្ខាសាលា លោក រុន សុផាន់ណារ៉ា បានគូសបញ្ជាក់យ៉ាងច្បាស់ពីសារសំខាន់នៃការអនុវត្តស្តង់ដារ CamGAP ដែលជាកាតាលីករយ៉ាងសំខាន់ក្នុងការផ្លាស់ប្តូរមុខមាត់វិស័យកសិកម្មក្នុងខេត្ត។ លោកបានមានប្រសាសន៍ថា សិក្ខាសាលានេះមានគោលបំណងចម្បងក្នុងការបង្កើនការយល់ដឹងឱ្យកាន់តែស៊ីជម្រៅអំពីស្តង់ដារ CamGAP លើដំណាំស្វាយ និងបន្លែ ដល់គ្រប់ភាគីពាក់ព័ន្ធទាំងអស់ក្នុងខ្សែច្រវាក់ផលិតកម្ម។ យើងផ្តោតលើការគាំទ្រដល់បងប្អូនកសិករ តាមរយៈការលើកកម្ពស់ស្តង់ដារគុណភាព និងសុវត្ថិភាពផលិតផល ដើម្បីបង្កើនសមត្ថភាពប្រកួតប្រជែងទាំងនៅលើទីផ្សារក្នុងស្រុក និងទីផ្សារនាំចេញ ដែលជាគ្រឹះយ៉ាងរឹងមាំក្នុងការលើកកម្ពស់ជីវភាពរស់នៅរបស់ប្រជាពលរដ្ឋឱ្យកាន់តែប្រសើរឡើង។

ចំណុចសំខាន់ៗដែលបានលើកឡើងក្នុងសិក្ខាសាលា រួមមាន ការតម្រង់ទិសកសិករឱ្យយល់ដឹងពីបច្ចេកទេសដាំដុះប្រកបដោយសុវត្ថិភាព ការគ្រប់គ្រងការប្រើប្រាស់ជី និងថ្នាំកសិកម្មឱ្យបានត្រឹមត្រូវតាមបច្ចេកទេស ដើម្បីធានាថាផលិតផលស្វាយ និងបន្លែគ្មានសារធាតុគីមីឥទ្ធិពលអវិជ្ជមាន។ ការណែនាំលម្អិតអំពីជំហាន និងលក្ខខណ្ឌតម្រូវក្នុងការស្នើសុំវិញ្ញាបនបត្រទទួលស្គាល់គុណភាព CamGAP ពីក្រសួងកសិកម្ម ដែលជាលិខិតឆ្លងដែនផ្លូវការសម្រាប់ផលិតផលកសិកម្ម ក្នុងការវាយលុកទីផ្សារទំនើប និងការនាំចេញទៅបរទេស។ ការបង្កើតបណ្តាញទំនាក់ទំនងជិតស្និទ្ធរវាងអ្នកផលិត (កសិករ/សហគមន៍) អ្នកផ្គត់ផ្គង់ធាតុចូល អ្នកលក់ជី-ថ្នាំ និងអ្នកប្រមូលទិញ អាជីវករ ដើម្បីបង្កើតប្រព័ន្ធផលិតកម្មមួយដែលមានតម្លាភាព និងទំនុកចិត្តខ្ពស់។

ការរៀបចំសិក្ខាសាលានេះគឺជាជំហានយុទ្ធសាស្ត្រមួយទៀតរបស់អាជ្ញាធរជំនាញខេត្តបន្ទាយមានជ័យ ក្នុងការប្រែក្លាយកសិកម្មបែបប្រពៃណី ឱ្យទៅជាកសិកម្មពាណិជ្ជកម្មទំនើប ធានាបាននូវសុវត្ថិភាពអ្នកបរិភោគ និងបង្កើនប្រាក់ចំណូលជូនកសិករក្នុងតំបន់ប្រកបដោយចីរភាព៕

ដោយ ឈុន សារ៉ាត