AKP ភ្នំពេញ ថ្ងៃទី០៨ ខែសីហា ឆ្នាំ២០២៦ — សូមប្អូនៗបេក្ខជនដែលត្រូវប្រឡងសញ្ញាបត្រមធ្យមសិក្សាទុតិយភូមិ សម័យប្រឡង៖ ១០ សីហា ២០២៦ ទៅមើលឈ្មោះ លេខតុ លេខបន្ទប់ និងបទប្បញ្ញត្តិនានានៃការប្រឡង នៅមណ្ឌលប្រឡងដោយផ្ទាល់ម្តងទៀតនៅថ្ងៃទី០៩ ខែសីហា ឆ្នាំ២០២៦ ចាប់ពីម៉ោង ៩:០០ព្រឹកតទៅ។ នេះជាការបញ្ជាក់របស់ក្រសួងអប់រំ យុវជន និង កីឡា សម្រាប់បេក្ខជនដើម្បីកុំឱ្យមានការថ្លោះធ្លោយ ដែលអាចធ្វើឱ្យខូចការសម្រាប់ការប្រឡងរបស់បេក្ខជន។

ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា ក្នុងសន្និសីទសារព័ត៌មាន ស្តីពីដំណើរការរៀបចំប្រឡងសញ្ញាបត្រមធ្យមសិក្សាទុតិយភូមិ សម័យប្រឡង៖ ១០ សីហា ២០២៦ កាលពីពេលថ្មីៗកន្លងទៅនេះ បានគូសបញ្ជាក់ថា ការពិនិត្យមើលឈ្មោះ និងមណ្ឌលប្រឡងរបស់បេក្ខជន គឺជាការសំខាន់ និងចាំបាច់ខ្លាំងណាស់ ដោយនៅថ្ងៃទី០៣ ខែសីហា ក្រសួងបានបិទបញ្ជីឈ្មោះដើម្បីឱ្យបេក្ខជនបានដឹងថាខ្លួនត្រូវប្រឡងនៅមណ្ឌលណា ហើយនៅថ្ងៃទី០៩ សីហា ពោលគឺមុនថ្ងៃប្រឡង ១ថ្ងៃ មានការបិទបញ្ជីឈ្មោះម្ដងទៀតនៅតាមមណ្ឌលប្រឡងទាំង២៤៤ ដើម្បីឱ្យបេក្ខជនពិនិត្យមើលលេខតុ និងបន្ទប់ប្រឡងជាក់ស្តែង។ ហេតុដូច្នេះ នៅថ្ងៃប្រឡង បេក្ខជនត្រូវតែរៀបចំពេលវេលា និងការធ្វើដំណើរឱ្យបានសមស្របទៅនឹងម៉ោងពេលនៃការប្រឡង ជាពិសេសការធ្វើដំណើរត្រូវមានការប្រុងប្រយ័ត្នខ្ពស់ជានិច្ច ជៀសវាងការគ្រោះថ្នាក់ចរាចរណ៍ដោយប្រការណាមួយ ដែលនាំឱ្យខកខានដល់ការប្រឡង។

បេក្ខជនត្រូវគិតពីទីតាំងដែលខ្លួនកំពុងរស់នៅ និងទីតាំងមណ្ឌលប្រឡងឱ្យបានច្បាស់លាស់ ដោយត្រូវទៅដល់មណ្ឌលប្រឡងយ៉ាងតិច ១ម៉ោងមុនពេលប្រឡង ឬលឿនជាងនេះកាន់តែល្អ ដើម្បីជៀសវាងការស្ទះចរាចរណ៍ ឬការមកយឺត។ ដោយសារជារដូវភ្លៀង បេក្ខជនត្រូវរៀបចំអាវភ្លៀង និងខ្ចប់សម្ភារប្រើប្រាស់ឱ្យបានត្រឹមត្រូវដើម្បីការពារកុំឱ្យទទឹក។ ត្រូវភ្ញាក់ពីព្រលឹម និងរម្លឹកមេរៀនបន្ថែមមុនពេលចេញទៅមណ្ឌលប្រឡង។

សូមជម្រាបថា ការប្រឡងសញ្ញាបត្រមធ្យមសិក្សាទុតិយភូមិ សម័យប្រឡង៖ ១០ សីហា ២០២៦ ខាងមុខនេះនឹងមានដំណើរការសំណេរ ប្រព្រឹត្តទៅរយៈពេល ២ថ្ងៃ គឺថ្ងៃទី១០-១១ ខែសីហា ឆ្នាំ២០២៦ ដំណើរការកំណែ ប្រព្រឹត្តទៅចាប់ពីថ្ងៃទី១៣ ដល់ថ្ងៃទី១៩ ខែសីហា ឆ្នាំ២០២៦ ដំណើរការស្រង់ បូកពិន្ទុដោយកុំព្យូទ័រ និងផ្ទៀងផ្ទាត់ពិន្ទុ ប្រព្រឹត្តទៅចាប់ពីថ្ងៃទី២០ ដល់ថ្ងៃទី៣០ ខែសីហា ឆ្នាំ២០២៦ ដំណើរការបោះពុម្ពលទ្ធផលប្រឡង ប្រព្រឹត្តទៅនៅថ្ងៃទី០១ ខែកញ្ញា ឆ្នាំ២០២៦។ រីឯលទ្ធផលប្រឡងនឹងត្រូវប្រកាសនៅថ្ងៃទី០២ ខែកញ្ញា ឆ្នាំ២០២៦ តាមមណ្ឌលសំណេរនៃរាជធានី ខេត្តទាំង២៥ ទូទាំងប្រទេស។ ការប្រឡងនេះមានបេក្ខជនចុះឈ្មោះសរុប ១៥១.២៣៨នាក់ (ស្រី ៨៤.៧៣៥នាក់) ក្នុងនោះ បេក្ខជនថ្នាក់វិទ្យាសាស្ត្រ មានចំនួន ៣៧.៤៤៥នាក់ (ស្រី ២២.១៩៣នាក់) បេក្ខជនថ្នាក់វិទ្យាសាស្ត្រសង្គម មានចំនួន ១១៣.៧៩៣នាក់ (ស្រី ៦២.៥៤២នាក់)៕

ដោយ៖ ចាន់ សុភឿន