AKP កំពង់ស្ពឺ ថ្ងៃទី៩ ខែសីហា ឆ្នាំ២០២៦-- ឯកឧត្តម យឹម សុខុម ប្រធានក្រុមប្រឹក្សាខេត្ត ឯកឧត្តមបណ្ឌិត ជាម ច័ន្ទសោភ័ណ អភិបាលខេត្តកំពង់ស្ពឺ បានអញ្ជើញចូលរួមក្នុងព្រឹត្តិការណ៍រត់ដើម្បីក្តីស្រឡាញ់ រត់ដើម្បីទេសចរណ៍ រត់ដើម្បីសប្បុរសធម៌ ដែលរៀបចំឡើងដោយរដ្ឋបាលខេត្តកំពង់ស្ពឺនិងក្រុមហ៊ុន ហ្គែនស៍ប៊ឺគ, សហភាពសហព័ន្ធយុវជនកម្ពុជា (ស.ស.យ.ក.) សហព័ន្ធកីឡាអត្តពលកម្មខ្មែរ, មន្ទីរទេសចរណ៍ខេត្តកំពង់ស្ពឺ និងក្រុមការងារស្ម័គ្រចិត្តជាច្រើនរូបទៀត។

ក្នុងឱកាសនោះដែរ ឯកឧត្តមបណ្ឌិត អភិបាលខេត្តកំពង់ស្ពឺ បានមានប្រសាសន៍ថា ព្រឹត្តិការណ៍ដ៏មានសារៈសំខាន់នេះ ប្រារព្ធឡើងក្នុងគោលបំណងលើកកម្ពស់សុខមាលភាព បណ្តុះបណ្តាលទម្លាប់ហាត់ប្រាណដើម្បីសុខភាពមាំមួន និងកាត់បន្ថយភាពតានតឹង បង្ហាញពីកម្លាំងឯកភាពជាតិ និងស្មារតីចេះជួយគ្នាទៅវិញទៅមក ក្នុងនាមជាមហាគ្រួសារខ្មែរតែមួយ រួមគ្នាដើម្បីកំពង់ស្ពឺ ពិសេសជម្រុញការចូលរួមរបស់យុវជនក្នុងការងារសង្គម និងសកម្មភាពសប្បុរសធម៌ ដើម្បីបង្កើតផលវិជ្ជមានជូនសង្គម។

ឯកឧត្តមបណ្ឌិតបានបញ្ជាក់ទៀតថាកម្មវិធី GANZBERG Run for Unity 2026 ជាចលនារបស់ប្រជាជនខ្មែរ ដែលមកជួបជុំគ្នាដើម្បីបង្ហាញពី សាមគ្គីភាព ក្តីស្រឡាញ់ និងបេះដូងសប្បុរសធម៌។ មួយជំហានរត់របស់អ្នក មានន័យលើសពីការឈានទៅមុខ។ វាជាជំហានដើម្បី៖ ផ្សព្វផ្សាយសក្តានុពលទេសចរណ៍ខេត្តកំពង់ស្ពឺ បង្ហាញពីការរួបរួមសាមគ្គីរបស់ “ខ្មែរតែមួយ” ចូលរួមជួយសហគមន៍ និងគាំទ្រសកម្មភាពសប្បុរសធម៌ បង្កើតអនុស្សាវរីយ៍ដ៏អស្ចារ្យជាមួយអ្នករត់រាប់ពាន់នាក់ ហើយការចុះឈ្មោះរបស់អ្នក មិនត្រឹមតែធ្វើឱ្យអ្នកក្លាយជាអ្នករត់ប៉ុណ្ណោះទេ ប៉ុន្តែធ្វើឱ្យអ្នកក្លាយជាផ្នែកមួយនៃការផ្លាស់ប្តូរសង្គម និងជាវីរបុរសដែលកំពុងចែករំលែកក្តីស្រឡាញ់ទៅកាន់អ្នកដទៃ។

គួរបញ្ជាក់ផងដែរថា ក្នុងព្រឹត្តិការណ៍ព្រឹត្តិការណ៍រត់ដើម្បីក្តីស្រឡាញ់ រត់ដើម្បីទេសចរណ៍ រត់ដើម្បីសប្បុរសធម៌ នាឱកាសនេះដែរមានអ្នកចូលរួមរត់ប្រមាណ៧០០០នាក់ និងទទួលបានថវិការមូលនិធិបានចំនួន ៥០លានរៀលផងដែរ។

ដោយ ម៉ែន ប៊ុនធីម