AKP កណ្ដាល ថ្ងៃទី៨ ខែសីហា ឆ្នាំ២០២៦-- លោក នុត ពុធដារ៉ា អភិបាលរងខេត្តកណ្តាល និងលោក ជួរ រតនៈ អគ្គនាយករងនៃមូលនិធិជាតិជំនួយសង្គម (ម.ជ.ជ) បានអញ្ជើញជាអធិបតីក្នុងពិធីបើក «វគ្គរំលឹក ស្តីពីការអនុវត្តកម្មវិធីជាតិជំនួយសង្គមក្នុងកញ្ចប់គ្រួសារ» រយៈពេលមួយព្រឹក ជូនដល់លោក លោកស្រីមន្ត្រីទទួលបន្ទុក កម្មវិធីជាតិជំនួយសង្គមមូលដ្ឋានសុខាភិបាលសាធារណៈ និងលោក លោកស្រីមន្ត្រីទទួលបន្ទុកកម្មវិធីជាតិជំនួយសង្គមឃុំ សង្កាត់ ប្រមាណ ២៦៣នាក់ នៅថ្ងៃទី៧ ខែសីហា ឆ្នាំ២០២៦ ដែលបានរៀបចំឡើងនៅសាលាខេត្តកណ្តាល។

លោក នុត ពុធដារ៉ា បានថ្លែងអំណរគុណដល់សាខាមូលនិធិជាតិជំនួយសង្គម ខេត្ត មន្ទីរសង្គមកិច្ច អតីតយុទ្ធជន និងយុវនីតិសម្បទា មន្ទីរអប់រំ យុវជន និងកីឡា មន្ទីរសុខាភិបាល រដ្ឋបាលឃុំ សង្កាត់ និងមូលដ្ឋានសុខាភិបាលសាធារណៈ ដែលបានអនុវត្តតួនាទី និងភារកិច្ចប្រកបដោយការទទួលខុសត្រូវ និងសម្រេចបានលទ្ធផលគួរជាទីមោទនៈ។ រាជរដ្ឋាភិបាលបានចំណាយថវិកាយ៉ាងច្រើន ដើម្បីគាំទ្រដល់ការអនុវត្តកម្មវិធីជំនួយសង្គម ជាពិសេសជំនួយសង្គមជាសាច់ប្រាក់ ដើម្បីជួយដល់ប្រជាពលរដ្ឋដែលជួបការលំបាក និងងាយរងគ្រោះ ក្រោមការដឹកនាំរបស់ សម្តេចមហាបវរធិបតី ហ៊ុន ម៉ាណែត រាជរដ្ឋាភិបាលបានបន្តដាក់ចេញ និងអភិវឌ្ឍកម្មវិធីជាតិជំនួយសង្គមជាបន្តបន្ទាប់ ដោយផ្តោតលើការពង្រឹងប្រព័ន្ធគាំពារសង្គម និងការលើកកម្ពស់សុខុមាលភាពប្រជាពលរដ្ឋ។ រដ្ឋបាលខេត្តកណ្តាលបានបន្តគាំទ្រ ជំរុញ និងណែនាំដល់មន្ទីរ អង្គភាពពាក់ព័ន្ធ និងអាជ្ញាធរមូលដ្ឋាន ឱ្យយកចិត្តទុកដាក់ក្នុងការអនុវត្តកម្មវិធីជំនួយសង្គមឱ្យមានប្រសិទ្ធភាព ស័ក្តិសិទ្ធិភាព និងសម្រេចបានតាមគោលដៅ ជាមួយគ្នានេះ រដ្ឋបាលខេត្តក៏បានធ្វើការតាមដាន ពិនិត្យ និងសម្របសម្រួលដោះស្រាយបញ្ហាប្រឈមនានា ដើម្បីធានាថាគ្រួសារក្រីក្រ និងងាយរងគ្រោះទទួលបានការឧបត្ថម្ភគ្រប់គ្រាន់ និងត្រឹមត្រូវ។ រាជរដ្ឋាភិបាលកម្ពុជា នីតិកាលទី៧ បានបន្តផ្តោតការយកចិត្តទុកដាក់លើការកសាង និងពង្រឹងប្រព័ន្ធគាំពារសង្គមឱ្យមានលក្ខណៈប្រមូលផ្តុំ សង្គតិភាព និងប្រសិទ្ធភាព ដោយឈរលើស្មារតី មិនបោះបង់ពលរដ្ឋណាម្នាក់។ គោលនយោបាយនេះមានគោលដៅលើកកម្ពស់ការកសាង និងអភិវឌ្ឍមូលធនមនុស្ស សុខុមាលភាពប្រជាពលរដ្ឋ ជាពិសេសក្រុមដែលងាយរងគ្រោះ និងងាយប្រឈមនឹងហានិភ័យ ព្រមទាំងចូលរួមកាត់បន្ថយភាពក្រីក្រ និងជំរុញការអភិវឌ្ឍសេដ្ឋកិច្ចប្រកបដោយចីរភាព។

លោក ជួរ រតនៈ បានជំរុញ និងលើកទឹកចិត្តដល់សិក្ខាកាមទាំងអស់ ត្រូវយកចិត្តទុកដាក់ និងយកចំណេះដឹងទៅអនុវត្តឱ្យមានប្រសិទ្ធភាព សូមយកចិត្តទុកដាក់ខ្ពស់ក្នុងការសិក្សា ស្តាប់ការពន្យល់ និងចូលរួមពិភាក្សាឱ្យបានសកម្ម ពីព្រោះចំណេះដឹង និងបទពិសោធន៍ដែលទទួលបានពីវគ្គនេះ នឹងក្លាយជាមូលដ្ឋានសំខាន់សម្រាប់ការអនុវត្តកម្មវិធីនៅមូលដ្ឋាន ដើម្បីអាចធានាបានថា ការអនុវត្តប្រព្រឹត្តទៅដោយមិនមានភាពច្រឡំ ឬការអនុវត្តខុសពីគោលការណ៍ដែលបានកំណត់។

លោក វិន សារឿន ប្រធានសាខាមូលនិធិជាតិជំនួយសង្គមខេត្តកណ្តាល បានឱដឹងថា ក្នុងឆមាសទី១ ឆ្នាំ២០២៦នេះ សាខា ម.ជ.ជ. ខេត្តកណ្តាល បានសហការជាមួយអាជ្ញាធរឃុំ សង្កាត់ មូលដ្ឋានសុខាភិ បាលសាធារណៈ និងគ្រឹះស្ថានសិក្សាសាធារណៈ ចុះឈ្មោះ និងបើកប្រាក់ឧបត្ថម្ភប្រចាំខែជូនគ្រួសារដែលមាន ប័ណ្ណសមធម៌ ទទួលផលក្នុងកម្មវិធីជាតិជំនួយសង្គមក្នុងកញ្ចប់គ្រួសារ សរុបចំនួន ៤៤ ១៤១ គ្រួសារ ដែលមានមុខសញ្ញាជាជនងាយរងគ្រោះទទួលផលសរុប ៥១ ៨២៥ នាក់។ បានសហការជាមួយវិទ្យាស្ថានជាតិពហុបច្ចេកទេសតេជោសែន អនុវត្តកម្មវិធីជាតិជំនួយសង្គម ផ្នែកបណ្តុះបណ្តាលជំនាញវិជ្ជាជីវៈ និងបច្ចេកទេសសម្រាប់យុវជនមកពីគ្រួសារក្រីក្រ និងងាយរងហានិភ័យ ដែលកំពុងសិក្សាសរុបចំនួន ២០៩នាក់ ។ បានសហការជាមួយពន្ធនាគារខេត្ត ចុះឈ្មោះ និងបើកប្រាក់ឧបត្ថម្ភជូនជនជាប់ឃុំជាស្ត្រីមានផ្ទៃពោះ និងកុមារអាយុក្រោម ២ឆ្នាំ តាមម្តាយក្នុងពន្ធនាគារ សរុបចំនួន ១៣ នាក់៕

ដោយ ណយ នឿន (ប្រភព៖ រដ្ឋបាលខេត្តកណ្តាល)