AKP ភ្នំពេញ ថ្ងៃទី៣០ ខែកក្កដា ឆ្នាំ២០២៦ -- ការវាយប្រហារតាមអាកាសរបស់សហរដ្ឋអាមេរិកបានកំណត់គោលដៅលើតំបន់មួយនៅជិតទីក្រុងពីរ៉ាន់ស្សា នៅភាគខាងលិចអ៊ីរ៉ង់ ដែលនៅជិតព្រំដែនអ៊ីរ៉ាក់។ នេះបើយោងតាមការចុះផ្សាយរបស់ប្រព័ន្ធផ្សព្វផ្សាយរដ្ឋអ៊ីរ៉ង់ IRIB កាលពីថ្ងៃពុធ។

យោងតាមប្រព័ន្ធផ្សព្វផ្សាយ បានឱ្យដឹងថា ការវាយប្រហារនេះបានធ្វើឡើងទៅលើទីតាំងមួយនៅក្នុងខេត្តអាស៊ែបៃហ្សង់ខាងលិច ហើយត្រូវបានរាយការណ៍ថា ត្រូវបានអនុវត្តដោយសហរដ្ឋអាមេរិក។

មិនមានរបាយការណ៍ភ្លាមៗអំពីអ្នកស្លាប់ និងរបួស ឬការខូចខាតនោះទេ។

ការវាយប្រហារដែលបានរាយការណ៍នេះ បានកើតឡើងចំពេលដែលមានភាពតានតឹងក្នុងតំបន់កាន់តែខ្លាំងឡើង។ ភាពស្ងប់ស្ងាត់ដ៏ផុយស្រួយបានគ្របដណ្ដប់យ៉ាងខ្លាំងចាប់តាំងពីថ្ងៃសុក្រ បន្ទាប់ពីការផ្លាស់ប្តូរការវាយប្រហារចុងក្រោយរបស់សហរដ្ឋអាមេរិកលើអ៊ីរ៉ង់ និងការវាយប្រហារសងសឹករបស់អ៊ីរ៉ង់បានថយចុះ។

លោកប្រធានាធិបតី ដូណាល់ ត្រាំ បានប្រកាសពីការបញ្ចប់បទឈប់បាញ់នៅថ្ងៃទី០៨ ខែកក្កដា បន្ទាប់ពីការវាយប្រហារលើនាវាដឹកប្រេងនៅច្រកសមុទ្រហ័រមុស ដែលទីក្រុងវ៉ាស៊ីនតោនបានស្តីបន្ទោសទៅលើទីក្រុងតេអេរ៉ង់។

ក្នុងអំឡុងពេលនៃការកើនឡើងនេះ សហរដ្ឋអាមេរិកបានធ្វើការវាយប្រហារនៅខាងក្នុងអ៊ីរ៉ង់ដោយកំណត់គោលដៅលើហេដ្ឋារចនាសម្ព័ន្ធយោធា ប្រព័ន្ធឃ្លាំមើលឆ្នេរសមុទ្រ ទីតាំងមីស៊ីល និងយន្តហោះគ្មានមនុស្សបើក ទ្រព្យសម្បត្តិកងទ័ពជើងទឹក និងទីតាំងភស្តុភារ។ នេះបើយោងតាមបញ្ជាការកណ្តាលសហរដ្ឋអាមេរិក (CENTCOM)។

អ៊ីរ៉ង់បានឆ្លើយតបដោយកំណត់គោលដៅទៅលើអ្វីដែលខ្លួនពិពណ៌នាថា ជាទីតាំង និងឧបករណ៍យោធារបស់សហរដ្ឋអាមេរិកនៅក្នុងបណ្តាប្រទេសអារ៉ាប់ជាច្រើន។

អរិភាព​ចុងក្រោយ​បំផុត​បាន​ផ្ទុះឡើង បើ​ទោះបីជា​មាន​អនុស្សរណៈ​យោគយល់​គ្នា​ដែលត្រូវបាន​ចុះហត្ថលេខា​ដោយ​ទីក្រុង​វ៉ាស៊ីនតោន​ និង​ទីក្រុង​តេអេរ៉ង់កាលពី​ក្នុង​ខែមិថុនា​ ដោយ​អំពាវនាវ​ឱ្យ​បញ្ចប់​ការប្រយុទ្ធ​គ្នា​និង​ចាប់ផ្តើម​កិច្ចចរចា​លើ​កិច្ចព្រមព្រៀង​ទូលំទូលាយ​មួយ​ ដើម្បី​បញ្ចប់​សង្គ្រាម​ដែល​បាន​ចាប់ផ្តើម​ជាមួយនឹង​ការវាយប្រហារ​របស់​អ៊ីស្រាអែល​ និង​សហរដ្ឋអាមេរិក​នៅ​ថ្ងៃទី២៨ ខែកុម្ភៈ ​ក៏ដោយ​៕

ដោយ៖ យា ចិន្ដាខន្ដី (ប្រភព៖ AA-AKP)