AKP តាកែវ ថ្ងៃទី២៥ ខែកក្កដា ឆ្នាំ២០២៦--

ដើម្បីលើកកម្ពស់សោភ័ណភាព បរិស្ថាន និងធានាបាននូវសុវត្ថិភាពចរាចរណ៍ជូនប្រជាពលរដ្ឋ។លោក សាយ វណ្ណៈ អភិបាលនៃគណៈអភិបាលស្រុកបាទី បានដឹកនាំក្រុមការងារចម្រុះរួមមាន លោកអភិបាលរងស្រុកបាទី មន្ត្រីការិយាល័យជំនាញពាក់ព័ន្ធ អាជ្ញាធរឃុំចំបក់ និងកងកម្លាំងប្រដាប់អាវុធចម្រុះ ចុះរៀបចំសណ្ដាប់ធ្នាប់សាធារណៈ និងអប់រំណែនាំដោយផ្ទាល់ដល់បងប្អូនអាជីវករលក់ដូរ និងម្ចាស់រោងចក្រសហគ្រាស ឱ្យរៀបចំការដាក់តាំងលក់ដូរ ដោយរក្សាសណ្តាប់ធ្នាប់សាធារណៈនៅតាមបណ្តោយផ្លូវជាតិលេខ២ក្នុងស្រុកបាទី។ការចុះត្រួតពិន្យនេះធ្វើឡើងនៅតាមបណ្ដោយផ្លូវជាតិលេខ២ ស្ថិតនៅក្នុងភូមិសាស្ត្រឃុំចំបក់ ស្រុកបាទី ខេត្តតាកែវ កាលពីព្រឹកថ្ងៃសុក្រ ទី២៤ ខែកក្កដា ឆ្នាំ២០២៦។

ក្នុងឱកាសចុះពិនិត្យនោះ លោក សាយ វណ្ណៈ អភិបាលនៃគណៈអភិបាលស្រុកបាទី បានធ្វើការណែនាំយ៉ាងយកចិត្តទុកដាក់ ដល់បងប្អូនអាជីវករលក់ដូរ និងប្រជាពលរដ្ឋដែលប្រកបអាជីវកម្មនៅតាមដងផ្លូវ ត្រូវរៀបចំទំនិញ និងតូបលក់ដូរឱ្យមានរបៀបរៀបរយ។ដោយដាច់ខាតមិនត្រូវលក់ដូរ រំលោភលើចិញ្ចើមផ្លូវ ឬទ្រូងផ្លូវសាធារណៈឡើយ។ការអនុវត្តន៍វិធានការនេះ គឺធ្វើឡើង ដើម្បីសម្រួលដល់ការធ្វើដំណើរ ធានាសុវត្ថិភាពចរាចរណ៍ កាត់បន្ថយគ្រោះថ្នាក់ និងលើកកម្ពស់សោភណភាព បរិស្ថាន ក្នុងមូលដ្ឋានឱ្យកាន់តែមានរបៀបរៀបរយល្អប្រសើរ។

លោក សាយ វណ្ណៈ ក៏បានអំពាវនាវដល់ម្ចាស់រោងចក្រ សហគ្រាស អាជីវករ និងប្រជាពលរដ្ឋទាំងអស់ ឱ្យបន្តចូលរួមសហការជាមួយអាជ្ញាធរមូលដ្ឋាន។ដោយគោរពតាមការណែនាំ និងរួមគ្នាថែរក្សាអនាម័យ បរិស្ថាន និងសណ្តាប់ធ្នាប់សាធារណៈ ដើម្បីឱ្យតាមបណ្តោយផ្លូវជាតិលេខ២ មានសោភ័ណភាព សុវត្ថិភាព និងបង្កភាពងាយស្រួល ដល់ការធ្វើដំណើររបស់បងប្អូនប្រជាពលរដ្ឋ និងអ្នកដំណើរគ្រប់រូប។

លោក សាយ វណ្ណៈ បានមានប្រសាសន៍បន្តថា ការរៀបចំសណ្ដាប់ធ្នាប់សាធារណៈនេះ មិនមែនជាការរឹតត្បិត ការរកស៊ីរបស់បងប្អូនឡើយ។ប៉ុន្តែវាជាការរួមគ្នាកសាងភាពរៀបរយ ដើម្បីទាក់ទាញម៉ូយនិងអ្នកទេសចរណ៍ ឱ្យចូលមកទិញទំនិញរបស់បងប្អូនកាន់តែច្រើន។ដែលជាប្រភពចំណូលដ៏ល្អ សម្រាប់លើកស្ទួយជីវភាពគ្រួសាររបស់បងប្អូន កាន់តែរីកចម្រើនបន្ថែមទៀត។

លោក សាយ វណ្ណៈ បានបញ្ជាឱ្យកម្លាំងជំនាញ របស់រដ្ឋបាលស្រុកទាំងអស់ ត្រូវបន្តចុះអប់រំណែនាំ ដល់ម្ចាស់រោងចក្រសហគ្រាស និងអាជីវករលក់ដូរទាំងអស់ជាប្រចាំ។ដោយឈរលើគោលការណ៍អប់រំ និងយោគយល់គ្នាទៅវិញទៅមក ដើម្បីចៀសវាងការបង្កផលប៉ះពាល់ ដល់ការធ្វើដំណើររបស់បងប្អូនប្រជាពលរដ្ឋ និងការលក់ដូរប្រចាំថ្ងៃរបស់បងប្អូនអាជីវករ៕

ដោយ អ៊ុច សៀង