AKP កំពង់ធំ ថ្ងៃទី៨ ខែតុលា ឆ្នាំ២០២៦--លោកឧត្តមសេនីយ៍ទោ ហេង សុផល ស្នងការនគរបាលខេត្តកំពង់ធំកាលពីថ្ងៃទី៧ ខែតុលា ឆ្នាំ២០២៦ បានបន្តដឹកនាំក្រុមការងារ ចុះសាកសួរសុខទុក្ខ និងត្រួតពិនិត្យស្ថានភាពជាក់ស្តែងរបស់កងកម្លាំងនគរបាល ដែលកំពុងបំពេញភារកិច្ចនៅតាមប៉ុស្តិ៍នគរបាលរដ្ឋបាល ក្នុងភូមិសាស្ត្រស្រុកប្រាសាទសំបូរ ខេត្តកំពង់ធំ។

លោកឧត្តមសេនីយ៍ទោ ហេង សុផលបានលើកឡើងថា ប៉ុស្តិ៍នគរបាលរដ្ឋបាលគឺជាផ្ទះទី២របស់កងកម្លាំង សម្រាប់ស្នាក់នៅប្រចាំការរង់ចាំបម្រើសេវារដ្ឋបាលជូនប្រជាពលរដ្ឋ និងចូលរួមថែរក្សាសន្តិសុខ សណ្តាប់ធ្នាប់ និងសុវត្ថិភាពសង្គមនៅមូលដ្ឋាន។

លោកឧត្តមសេនីយ៍ទោស្នងការបានណែនាំដល់លោកនាយប៉ុស្តិ៍ ត្រូវរៀបចំផែនការសកម្មភាពការងារឱ្យបានច្បាស់លាស់ ដើម្បីជាត្រីវិស័យក្នុងការដឹកនាំ និងបំពេញភារកិច្ចជាប្រចាំថ្ងៃ ព្រមទាំងត្រូវបែងចែក និងផ្លាស់ប្តូរវេនប្រចាំការ ប្រគល់ភារកិច្ចជូនមន្ត្រីក្រោមឱវាទ សម្រាប់អនុវត្តឱ្យបានត្រឹមត្រូវ និងមានប្រសិទ្ធភាព។ត្រូវពង្រឹងរបៀបរបបកិច្ចប្រជុំប្រចាំអង្គភាព ដើម្បីផ្សព្វផ្សាយសភាពការណ៍ថ្មីៗ ពាក់ព័ន្ធនឹងព្រឹត្តិការណ៍ជាតិ និងអន្តរជាតិ ព្រមទាំងផ្សព្វផ្សាយគោលការណ៍ បទបញ្ជា និងសេចក្តីណែនាំរបស់ថ្នាក់ដឹកនាំ ដើម្បីឱ្យកម្លាំងនគរបាលយកទៅអនុវត្តប្រកបដោយប្រសិទ្ធភាព។ កិច្ចប្រជុំទៀតសោត គឺដើម្បីត្រួតពិនិត្យវាយតម្លៃលទ្ធផលការងារ ដែលអនុវត្តបាននាពេលកន្លងមក ស្វែងរកបញ្ហាប្រឈម ផ្លាស់ប្ដូរយោបល់ ចែករំលែកបទពិសោធន៍ លើកទិសដៅការងារ ឆ្ពោះទៅសម្រេចបានជោគជ័យបន្ថែមទៀត ចំពោះការងារដែលនៅសេសសល់ ។

ក្នុងឱកាសនោះដែរ លោក បានជម្រុញ ដល់កងកម្លាំងត្រូវបង្កើនផ្សព្វផ្សាយ របៀបប្រើប្រាស់កម្មវិធី App NoDrug ដែលមានរួចជាស្រេច ក្នុងកម្មវិធីទូរស័ព្ទដៃស្មាតហ្វូន ដល់បងប្អូនប្រជាពលរដ្ឋ សិស្សានុសិស្ស យុវវ័យគ្រប់ស្រទាប់វណ្ណៈឱ្យមានភាពទូលំទូលាយដើម្បីចូលរួមសហការផ្តល់ ព័ត៌មានពាក់ព័ន្ធនឹងការងារបង្ក្រាបបទល្មើសគ្រឿងញៀន ដោយរក្សាការសម្ងាត់និងរួមគ្នាការពារសុវត្ថិភាព ក្នុងសហគមន៍។

លោកឧត្តមសេនីយ៍ទោ ស្នងការបានណែនាំបន្ថែម ដល់កម្លាំងត្រូវពង្រឹងកិច្ចសហការជាមួយអាជ្ញាធរមូលដ្ឋាន ឃុំ សង្កាត់ និងមេភូមិ ដោយរៀបចំវេទិកាសាធារណៈនិងផ្សព្វផ្សាយលក្ខណៈសម្បត្តិទាំង៧យ៉ាង នៃគោលនយោបាយ «ភូមិ-ឃុំ-សង្កាត់មានសុវត្ថិភាព» ឱ្យបានទូលំទូលាយ ជាពិសេសនៅតាមគោលដៅងាយរងគ្រោះ ចំពោះការអនុវត្តការងារនគរបាល និងសហគមន៍ ត្រូវរក្សាការទំនាក់ទំនងយ៉ាងជិតស្និទ្ធ ជាមួយអ្នកពាក់ព័ន្ធចុះជួបជារៀងរាល់ខែ ដើម្បីផ្សព្វផ្សាយខ្លឹមសារដែលបានកំណត់ ។ត្រូវយកចិត្តទុកដាក់អនុវត្តអនុក្រឹត្យលេខ០៣ ស្តីពីការគ្រប់គ្រងសន្តិសុខតាមទីតាំងរស់នៅប្រមូលផ្តុំ ដើម្បីបង្ការ ទប់ស្កាត់ និងបង្ក្រាបបទល្មើសគ្រប់ប្រភេទ ជាពិសេសបទល្មើសតាមប្រព័ន្ធOnline Scamនិងល្បែងស៊ីសងខុសច្បាប់។

លោកឧត្តមសេនីយ៍ទោ ហេង សុផល ស្នងការនគរបាលខេត្តកំពង់ធំបានផ្តាំផ្ញើដល់កងកម្លាំងទាំងអស់ ត្រូវបន្តរក្សាសាមគ្គីភាព ឯកភាពផ្ទៃក្នុង ពង្រឹងវិន័យ ស្មារតីទទួលខុសត្រូវ និងកិច្ចសហការគ្នា ដើម្បីបំពេញតួនាទី ភារកិច្ចឱ្យបានល្អប្រសើរ និងរួមចំណែកកសាងអង្គភាពឱ្យមានការរីកចម្រើនជាបន្តបន្ទាប់។

សូមបញ្ជាក់ថា ប៉ុស្តិ៍នគរបាលរដ្ឋបាល ដែលលោកឧត្តមសេនីយ៍ទោស្នងការបាន ចុះត្រួតពិនិត្យរួមមាន៖១.ប៉ុស្តិ៍នគរបាលរដ្ឋបាលតាំងក្រសៅ,២.ប៉ុស្តិ៍នគរបាលរដ្ឋបាលស្រើង,៣.ប៉ុស្តិ៍នគរបាលរដ្ឋបាលឈូក,៤.ប៉ុស្តិ៍នគរបាលរដ្ឋបាលសំបូរ ក្នុងភូមិសាស្ត្រស្រុកប្រាសាទសំបូរ ព្រមទាំងត្រួតពិនិត្យវឌ្ឍនភាព នៃដំណើរការសាងសង់ប៉ុស្តិ៍នគរបាលរដ្ឋបាលស្រើង ៕

ដោយ ស៊ុម វណ្ណា