AKP ភ្នំពេញ ថ្ងៃទី២៣ ខែកក្កដា ឆ្នាំ២០២៦ -- ការផ្តល់សច្ចាប័នលើកិច្ចព្រមព្រៀងក្របខ័ណ្ឌបទប្បញ្ញត្តិសុវត្ថិភាពចំណីអាហារអាស៊ាន (AFSRFA) អាចជំរុញតុល្យភាពពាណិជ្ជកម្មចំណីអាហាររបស់ប្រទេសឥណ្ឌូណេស៊ីរហូតដល់ ៦៣៤,៨៣លានដុល្លារអាម៉េរិក។ នេះបើយោងតាមការលើកឡើងរបស់រដ្ឋមន្ត្រីក្រសួងពាណិជ្ជកម្មឥណ្ឌូណេស៊ី លោក ប៊ូឌី សាន់តូសូ។

ទីភ្នាក់ងារសារព័ត៌មានជាតិឥណ្ឌូណេស៊ី Antara បានរាយការណ៍ថាកិច្ចព្រមព្រៀងនេះត្រូវបានគេរំពឹងថានឹងសម្រេចបាននូវគោលដៅនេះដោយការសម្របសម្រួលស្តង់ដារសុវត្ថិភាពចំណីអាហារ ដោយធ្វើឱ្យលំហូរពាណិជ្ជកម្ម និងវិនិយោគនៅទូទាំងតំបន់អាស៊ានមានភាពរលូន។

ក្នុងអំឡុងពេលកិច្ចប្រជុំជាមួយគណៈកម្មការទី៦ នៃសភាតំណាងរាស្ត្រ(DPR) ដែលត្រូវបានត្រួតពិនិត្យតាមប្រព័ន្ធអនឡាញនៅទីក្រុងហ្សាការតាកាលពីពេលថ្មីៗនេះ លោក ប៊ូឌី បានកត់សម្គាល់ថា កិច្ចព្រមព្រៀងនេះក៏ត្រូវបានគេព្យាករផងដែរថា នឹងបង្កើតប្រាក់ចំណូលសុខុមាលភាពជាតិចំនួន២៥២,១៧លានដុល្លារអាម៉េរិក។

លោករដ្ឋមន្ត្រីបានកត់សម្គាល់ថា «យោងតាមការសិក្សាមួយដែលធ្វើឡើងដោយក្រសួងពាណិជ្ជកម្ម បានឱ្យដឹងថា កិច្ចព្រមព្រៀងនេះនឹងជំរុញលំហូរវិនិយោគទៅក្នុងវិស័យចំណីអាហារ ដោយកាត់បន្ថយថ្លៃដើមអនុលោមភាព ធ្វើឱ្យតម្លៃចំណីអាហារក្នុងស្រុកមានស្ថេរភាព និងបង្កើនអំណាចទិញរបស់ឥណ្ឌូណេស៊ី»។

ជាមួយនឹងកិច្ចព្រមព្រៀងនេះ លោកបានបន្ថែមថា ប្រទេសឥណ្ឌូណេស៊ីត្រូវបានគេព្យាករថានឹងឃើញនូវកំណើននាំចេញនៅក្នុងក្រុមទំនិញសំខាន់ៗមួយចំនួន រួមទាំងផលិតផលកសិកម្ម ប្រេងបន្លែ និងខ្លាញ់ និងផលិតផលចំណីអាហារកែច្នៃ។

លោកបានពន្យល់ថា កិច្ចព្រមព្រៀង AFSRFA បង្កើតទិដ្ឋភាពបច្ចេកទេស និងកិច្ចសហប្រតិបត្តិការសម្រាប់ការអនុវត្តគោលនយោបាយសុវត្ថិភាពចំណីអាហារអាស៊ាន (AFSP)។ យោងតាមរូបលោក បានឱ្យដឹងថា គោលបំណងចម្បងនៃកិច្ចព្រមព្រៀងនេះ គឺដើម្បីបង្កើនការការពារសុខភាពអ្នកប្រើប្រាស់ ខណៈដែលសម្រួលដល់ការធ្វើពាណិជ្ជកម្មចំណីអាហារដែលមានសុវត្ថិភាពនៅទូទាំងតំបន់អាស៊ាន តាមរយៈការសម្របសម្រួលបទប្បញ្ញត្តិ និងលុបបំបាត់ឧបសគ្គបច្ចេកទេស។

ដើម្បីធានាបាននូវការអនុវត្តកិច្ចព្រមព្រៀងប្រកបដោយប្រសិទ្ធភាពរដ្ឋាភិបាលឥណ្ឌូណេស៊ីបានរៀបចំវិធានការកាត់បន្ថយជាច្រើន រួមទាំងការរៀបចំ និងតម្រឹមច្បាប់ និងបទប្បញ្ញត្តិ ដើម្បីបម្រើជាមូលដ្ឋានច្បាប់។លើសពីនេះទៀត ខ្លួននឹងបង្កើតប្រព័ន្ធស្វ័យប្រវត្តិសម្រាប់វិញ្ញាបនបត្រប្រភពដើម ដើម្បីអនុញ្ញាតឱ្យអ្នកនាំចេញប្រើប្រាស់ដោយស្វ័យប្រវត្តិនូវមធ្យោបាយពន្ធអនុគ្រោះក្រោមកិច្ចព្រមព្រៀងពាណិជ្ជកម្មផ្សេងៗ។

វាក៏នឹងពង្រឹងគោលនយោបាយពាណិជ្ជកម្ម និងអភិបាលកិច្ច ដើម្បីការពារឧស្សាហកម្មក្នុងស្រុក បង្កើនការផ្សព្វផ្សាយដល់ភាគីពាក់ព័ន្ធដើម្បីធានាថា អត្ថប្រយោជន៍នៃកិច្ចព្រមព្រៀងត្រូវបានបង្កើនឱ្យដល់កម្រិតអតិបរមា និងពន្លឿនការធ្វើឌីជីថលូបនីយកម្មនៃប្រព័ន្ធសុវត្ថិភាពចំណីអាហារដែលមានមូលដ្ឋានលើការតាមដាន ដើម្បីគាំទ្រដល់ការធ្វើសមាហរណកម្មរបស់ប្រទេសឥណ្ឌូណេស៊ីទៅក្នុងបណ្តាញពាណិជ្ជកម្មចំណីអាហារអាស៊ាន៕

ដោយ៖ យា ចិន្ដាខន្ដី (ប្រភព៖ VNA)