AKP ភ្នំពេញ ថ្ងៃទី១៣ ខែកក្កដា ឆ្នាំ២០២៦ -- ក្រសួងពាណិជ្ជកម្ម (MoT) របស់ប្រទេសឥណ្ឌូណេស៊ី បានប្រកាសពីការអនុវត្តយុទ្ធសាស្ត្រសំខាន់ៗចំនួនបី ដើម្បីជំរុញការនាំចេញរបស់ប្រទេសនេះ ដោយគាំទ្រដល់កំណើនសេដ្ឋកិច្ចជាតិ ចំពេលដែលមានភាពមិនប្រាកដប្រជាទូទាំងពិភពលោក។

ក្រសួងពាណិជ្ជកម្មបាននិយាយនៅក្នុងសេចក្តីថ្លែងការណ៍មួយថាយុទ្ធសាស្ត្រទីមួយ គឺពង្រីកការចូលទីផ្សារ ដោយធ្វើឱ្យប្រសើរឡើងនូវកិច្ចព្រមព្រៀងពាណិជ្ជកម្មសេរី (FTA) ចំនួន២៥ ដែលមានស្រាប់។

ក្រោមយុទ្ធសាស្ត្រទីពីរ ក្រសួងប្តេជ្ញាបង្កើនភាពប្រកួតប្រជែងរបស់អ្នកនាំចេញ ជាពិសេសសហគ្រាសមីក្រូ ខ្នាតតូច និងមធ្យម (MSMEs) តាមរយៈជំនួយនាំចេញ ការផ្គូផ្គងធុរកិច្ច និងការលើកកម្ពស់ពាណិជ្ជកម្ម។

ទន្ទឹមនឹងនេះ យុទ្ធសាស្ត្រទីបី គឺផ្តោតសំខាន់ទៅលើការធ្វើពិពិធកម្មទីផ្សារនាំចេញ និងផលិតផល ដោយពង្រីកទៅកាន់តំបន់ដែលមានសក្តានុពលដូចជា អាស៊ីខាងត្បូង មជ្ឈិមបូព៌ា អាហ្វ្រិក និងអាម៉េរិកឡាទីន ដោយកាត់បន្ថយការពឹងផ្អែកលើទីផ្សារប្រពៃណី។

ដោយសំដៅទៅលើវិធានការគាំទ្រជាក់លាក់ អគ្គនាយកអភិវឌ្ឍន៍នាំចេញជាតិនៃក្រសួងពាណិជ្ជកម្ម លោកស្រី ហ្វាចារីនី ពុនតូដេវី បាននិយាយថា ក្រសួងពាណិជ្ជកម្មបន្តផ្តល់ព័ត៌មានទីផ្សារ និងធ្វើការយ៉ាងជិតស្និទ្ធជាមួយអាជីវកម្ម ដើម្បីជួយពួកគេឆ្លើយតបយ៉ាងឆាប់រហ័សចំពោះការប្រែប្រួលនៃតម្រូវការសកលលោក។

យោងតាមក្រសួង បានឱ្យដឹងថា ការនាំចេញសរុបរបស់ប្រទេសឥណ្ឌូណេស៊ីបានឈានដល់ ១១៥,៣៦ពាន់លានដុល្លារអាម៉េរិកក្នុងរយៈពេលប្រាំខែដំបូងនៃឆ្នាំ២០២៦ ដែលកើនឡើង ៣,០២% ពីមួយឆ្នាំទៅមួយឆ្នាំ ដែលភាគច្រើនជំរុញដោយផលិតផលមិនមែនប្រេង និងឧស្ម័ន។

ក្រសួងនេះរំពឹងថា យុទ្ធសាស្ត្រទាំងនេះនឹងជួយរក្សាកំណើននាំចេញដែលអាចឱ្យវិស័យនេះនៅតែជាកម្លាំងចលករសំខាន់នៃការបង្កើតការងារនិងប្រាក់ចំណូលប្តូរប្រាក់បរទេស៕

ដោយ៖ យា ចិន្ដាខន្ដី (ប្រភព៖ VNA)