AKP បន្ទាយមានជ័យ ថ្ងៃទី០៦ ខែកក្កដា ឆ្នាំ២០២៦--បញ្ហាខ្វះខាតទឹកប្រើប្រាស់សម្រាប់ជីវភាពប្រចាំថ្ងៃរបស់បងប្អូនប្រជាពលរដ្ឋភៀសសឹកដែលកំពុងស្នាក់នៅបណ្ដោះអាសន្ន (ផ្ទះអតីតយុទ្ធជន) ក្នុងភូមិរង់ចាំ ឃុំស្លក្រាម ស្រុកស្វាយចេក ខេត្តបន្ទាយមានជ័យ ត្រូវបានដោះស្រាយជាជំហានៗយ៉ាងយកចិត្តទុកដាក់ តាមរយៈគម្រោងតភ្ជាប់បណ្ដាញទឹកស្អាតទ្រង់ទ្រាយធំ ដើម្បីលើកកម្ពស់គុណភាពជីវិត និងសុខុមាលភាពជូនពលរដ្ឋ។

កាលពីរសៀលថ្ងៃទី០៥ ខែកក្កដា ឆ្នាំ២០២៦ លោក ឃ្លោក នួយ អភិបាលរងខេត្តបន្ទាយមានជ័យ តំណាងដ៏ខ្ពង់ខ្ពស់របស់ឯកឧត្តម អ៊ុំ រាត្រី អភិបាលនៃគណៈអភិបាលខេត្ត បានដឹកនាំក្រុមការងារជំនាញ ចុះពិនិត្យដោយផ្ទាល់នូវដំណើរការតភ្ជាប់បណ្តាញទឹកស្អាតជូនដល់ខ្នងផ្ទះប្រជាពលរដ្ឋនៅក្នុងមូលដ្ឋានខាងលើ។

ក្នុងឱកាសចុះពិនិត្យនោះ លោក ឃ្លោក នួយ បានបញ្ជាក់យ៉ាងច្បាស់ពីគោលជំហររបស់រាជរដ្ឋាភិបាលដែលមានរដ្ឋបាលខេត្តជាសេនាធិការថា ការផ្តល់សេវាទឹកស្អាតមិនមែនជារឿងធម្មតានោះទេ ប៉ុន្តែគឺជាការឆ្លើយតបទៅនឹងភាពចាំបាច់ និងការយកចិត្តទុកដាក់ដ៏ជ្រាលជ្រៅរបស់ថ្នាក់ដឹកនាំរាជរដ្ឋាភិបាលអាជ្ញាធរខេត្ត ចំពោះសុខទុក្ខ និងជីវភាពរស់នៅរបស់បងប្អូនប្រជាពលរដ្ឋ។

លោកអភិបាលរងខេត្តបានគូសបញ្ជាក់ថា ការចុះពិនិត្យនៅថ្ងៃនេះគឺជាការបង្ហាញពីការយកចិត្តទុកដាក់យ៉ាងខ្លាំងរបស់ប្រមុខរាជរដ្ឋាភិបាលដែលមានសម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រីក៏ដូចឯកឧត្តម អ៊ុំ រាត្រី អភិបាលខេត្ត ចំពោះជីវភាពរស់នៅរបស់បងប្អូនប្រជាពលរដ្ឋភៀសសឹកដែលកំពុងស្នាក់នៅទីនេះ។ យើងមិនអាចទុកឱ្យបងប្អូនជួបការលំបាកដោយសារកង្វះទឹកប្រើប្រាស់នោះទេ ព្រោះទឹកគឺជាធនធានដ៏សំខាន់សម្រាប់ជីវិត និងសុខភាព។ ការចុះត្រួតពិនិត្យនេះ គឺដើម្បីធានាថាការតភ្ជាប់បណ្ដាញទឹកត្រូវបានអនុវត្តទៅតាមបច្ចេកទេស និងមានប្រសិទ្ធភាពខ្ពស់ ដែលរួមមានការតភ្ជាប់បណ្ដាញទឹកតាមខ្នងផ្ទះថ្មីចំនួន៥១៣ខ្នងផ្ទះ ដែលបានដាក់សំណើថ្មី។ ការតភ្ជាប់កុងទ័រទឹក ចំនួន ២,៨០៥ ខ្នងផ្ទះ ដែលនឹងជួយសម្រួលដល់ការគ្រប់គ្រង និងការប្រើប្រាស់ទឹកប្រកបដោយសមធម៌ និងតម្លាភាព។ តាមរយៈការតភ្ជាប់ទាំងនេះនឹងមានខ្នងផ្ទះសរុបជាង ៣,៣០០ ខ្នងផ្ទះ នៅក្នុងភូមិរង់ចាំ ដែលនឹងទទួលបានទឹកស្អាតប្រើប្រាស់គ្រប់គ្រាន់ ដែលនេះគឺជាសមិទ្ធផលដ៏ធំមួយក្នុងការលើកកម្ពស់ជីវភាពរស់នៅរបស់ប្រជាពលរដ្ឋក្នុងមូលដ្ឋាន។

លោក ឃ្លោក នួយ បានដាក់បទបញ្ជាដល់ក្រុមការងារជំនាញ និងក្រុមហ៊ុនផ្គត់ផ្គង់ទឹក ត្រូវពន្លឿនការងារនេះឲ្យបានឆាប់រហ័ស ដើម្បីឱ្យបងប្អូនប្រជាពលរដ្ឋបានប្រើប្រាស់ទឹកស្អាតជាប្រចាំ។ លោកក៏បានអំពាវនាវដល់បងប្អូនប្រជាពលរដ្ឋ សូមចូលរួមថែរក្សាបណ្តាញចែកចាយទឹក និងប្រើប្រាស់ទឹកដោយសន្សំសំចៃ ដើម្បីធានាបាននូវនិរន្តរភាពនៃការផ្គត់ផ្គង់។

សកម្មភាពចុះពិនិត្យផ្ទាល់របស់រដ្ឋបាលខេត្តបន្ទាយមានជ័យនៅពេលនេះ បានឆ្លុះបញ្ចាំងយ៉ាងច្បាស់ថា ទោះបីជាក្នុងកាលៈទេសៈណាក៏ដោយ ក៏រាជរដ្ឋាភិបាល និងអាជ្ញាធរខេត្ត នៅតែបន្តឈរជើងរួមសុខរួមទុក្ខជាមួយប្រជាពលរដ្ឋ ដើម្បីធានាថាគ្មាននរណាម្នាក់ត្រូវបានទុកចោលឡើយ៕

ដោយ ឈុន សារ៉ាត