AKP បន្ទាយមានជ័យ ថ្ងៃទី០៣ ខែកក្កដា ឆ្នាំ២០២៦-- ក្នុងគោលបំណងកាត់បន្ថយភាពក្រីក្រ និងលើកកម្ពស់ជីវភាពប្រជាពលរដ្ឋតាមរយៈការផ្ដល់ការងារធ្វើដោយផ្ទាល់ រដ្ឋបាលស្រុកថ្មពួក សហការជាមួយទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្តុះបណ្តាលវិជ្ជាជីវៈ បានរៀបចំ «វេទិកាការងារ» យ៉ាងកក្រើកនៅបរិវេណសាលាស្រុកថ្មពួក ខេត្តបន្ទាយមានជ័យ នាព្រឹកថ្ងៃទី០៣ ខែកក្កដា ឆ្នាំ២០២៦។ ព្រឹត្តិការណ៍នេះ មិនត្រឹមតែជាការជួបជុំរវាងនិយោជក និងអ្នកស្វែងរកការងារធ្វើប៉ុណ្ណោះទេ ប៉ុន្តែថែមទាំងជាសក្ខីភាពបញ្ជាក់ពីការយកចិត្តទុកដាក់ខ្ពស់របស់រាជរដ្ឋាភិបាលកម្ពុជា ក្នុងការដោះស្រាយបញ្ហាការងារជូនប្រជាពលរដ្ឋដល់មូលដ្ឋាន។

ថ្លែងក្នុងពិធីបើកវេទិកានេះ ឯកឧត្តម សាន គឹមហុង អនុរដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈបានគូសបញ្ជាក់យ៉ាងច្បាស់អំពីយុទ្ធសាស្ត្ររបស់រាជរដ្ឋាភិបាលថា រាជរដ្ឋាភិបាលកម្ពុជា មិនដែលទុកចោលប្រជាពលរដ្ឋណាម្នាក់ឱ្យនៅឯកោឡើយ។ វេទិកាការងារនេះ គឺជាស្ពានចម្លងដ៏សំខាន់ដែលនាំយកឱកាសការងារ និងជំនាញបច្ចេកទេសឥតគិតថ្លៃ មកដាក់ដល់មុខផ្ទះបងប្អូនប្រជាពលរដ្ឋ ដើម្បីឱ្យបងប្អូនមានជម្រើសក្នុងការជ្រើសរើសអាជីពដែលខ្លួនស្រឡាញ់ និងសមស្របនឹងសមត្ថភាព។

ឯកឧត្តមបានបន្តទៀតថា ការបណ្តុះបណ្តាលជំនាញបច្ចេកទេស និងវិជ្ជាជីវៈ (TVET) គឺជាឆ្អឹងខ្នងថ្មីសម្រាប់សេដ្ឋកិច្ចកម្ពុជា ដែលជួយឱ្យពលករមានជំនាញច្បាស់លាស់ មានចំណូលសមរម្យ និងមានភាពធន់នឹងការប្រែប្រួលទីផ្សារការងារ។ យោងតាមរបាយការណ៍ពីវេទិកានេះ មានអ្នកចូលរួមសរុបចំនួន ៦១៤នាក់ (ស្រី ២៨៥នាក់) ដែលរួមមានយុវជន សិស្ស-និស្សិត អតីតពលករ និងប្រជាពលរដ្ឋក្នុងមូលដ្ឋាន។ លទ្ធផលនៃវេទិកាគឺមានភាពវិជ្ជមានគួរឱ្យកត់សម្គាល់ ដោយមានអ្នកចុះឈ្មោះស្វែងរកការងារធ្វើ និងទទួលបានការយល់ព្រមជ្រើសរើសជាបឋមពីសំណាក់ក្រុមហ៊ុនសហគ្រាសចំនួន ១១៦នាក់ (ស្រី ៦៣នាក់)។

គួរជម្រាបជូនថា វេទិកានេះមានការអញ្ជើញចូលរួមពីថ្នាក់ដឹកនាំ និងភ្ញៀវកិត្តិយសជាច្រើនរូប រួមមាន លោក យឹម សំណាង អភិបាលរងខេត្តបន្ទាយមានជ័យ, លោក កាក់ វឿន តំណាងទីភ្នាក់ងារជាតិមុខរបរ និងការងារ, លោក សុខ ប្រកប អនុប្រធានមន្ទីរការងារ និងបណ្តុះបណ្តាលវិជ្ជាជីវៈខេត្ត, លោក រ័ត្ន ដាស៊ីណង់ អភិបាលស្រុកថ្មពួក រួមជាមួយមេបញ្ជាការកងកម្លាំងប្រដាប់អាវុធ មន្ត្រីរាជការ មេឃុំ និងតំណាងក្រុមហ៊ុនឯកជននានា។

ការរៀបចំវេទិកានេះបង្ហាញឱ្យឃើញថា ការដោះស្រាយបញ្ហាការងារមិនមែនជារឿងរបស់ស្ថាប័នណាមួយនោះទេ ប៉ុន្តែជាការចូលរួមចំណែកយ៉ាងសកម្មពីគ្រប់ភាគីពាក់ព័ន្ធ ទាំងរដ្ឋបាលថ្នាក់ក្រោមជាតិ និងវិស័យឯកជន ដើម្បីជំរុញឱ្យយុវជនកម្ពុជាមានការងារធ្វើប្រកបដោយកិត្តិយស និងមានសមត្ថភាពវិជ្ជាជីវៈខ្ពស់ ដើម្បីចូលរួមអភិវឌ្ឍន៍សេដ្ឋកិច្ចជាតិឱ្យកាន់តែរឹងមាំ៕

ដោយ ឈុន សារ៉ាត