AKP ភ្នំពេញ ថ្ងៃទី០៣ ខែកក្កដា ឆ្នាំ២០២៦-- សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា បានសម្រេចចាត់ឱ្យលោកវេជ្ជបណ្ឌិត អ៊ុយ សំអុន ប្រធាននាយកដ្ឋានគ្រប់គ្រងគ្រោះមហន្តរាយនៃកាកបាទក្រហមកម្ពុជា និងក្រុមការងារ នាថ្ងៃទី០៣ ខែកក្កដា ឆ្នាំ២០២៦នេះ អញ្ជើញចុះសួរសុខទុក្ខ និងចែកអំណោយជូនប្រជាជនងាយរងគ្រោះបំផុតចំនួន ៨០០គ្រួសារ មកពី ស្រុកក្រូចឆ្មារ ខេត្តត្បូងឃ្មុំ ដោយពិធីនេះធ្វើឡើងនៅបរិវេណវត្តឧប្បលវតី ភូមិឈូក ឃុំឈូក ស្រុកក្រូចឆ្មារ ខេត្តត្បូងឃ្មុំ។

លោកវេជ្ជបណ្ឌិត អ៊ុយ សំអុន បាននាំយកនូវប្រសាសន៍សាកសួរសុខទុក្ខប្រកបដោយសេចក្តីនឹករលឹក និងមនោសញ្ចេតនាស្រឡាញ់យ៉ាងជ្រាលជ្រៅពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ដែលជានិច្ចកាលតែងតែគិតគូរពីសុខទុក្ខ និងជីវភាពរបស់បងប្អូនប្រជាពលរដ្ឋដោយមិនទុកនរណាម្នាក់ចោលឡើយ ហើយអំណោយទាំងអស់ដែលយកមកចែកជូនពេលនេះគឺបានមកពីការបរិច្ចាគរបស់សប្បុរសជនក្នុងឱកាសទិវាពិភពលោកកាកបាទក្រហម និងអឌ្ឍចន្ទក្រហម ៨ ឧសភា។

សូមជម្រាបជូនថា ក្រៅពីការផ្តល់ជំនួយជាស្បៀងអាហារនិងថវិកា ព្រឹត្តិការណ៍នេះជាយុទ្ធនាការផ្សព្វផ្សាយអប់រំដ៏មានសំខាន់មួយ ដើម្បីលើកកម្ពស់ការយល់ដឹងពីសុខភាពមាតានិងទារក ការបង្ការជំងឺរ៉ាំរ៉ៃ និងការត្រៀមលក្ខណៈបន្ស៊ាំខ្លួនទៅនឹងការប្រែប្រួលអាកាសធាតុដ៏ក្តៅហួតហែង (បាតុភូត El Niño) ក្នុងឆ្នាំ២០២៦ នេះផងដែរ។

អំណោយផ្ដល់ជូនក្នុងមួយគ្រួសារទទួលបាន អង្ករ៣០គីឡូក្រាម មី១កេស ត្រីខ១០កំប៉ុង ទឹកស៊ីអ៊ីវ៦ដប ប្រេងឆា២ដប សាប៊ូកក់សក់២ដប ឃីត១កញ្ចប់ និងថវិកា២០.០០០រៀល។

ក្រុមការងារក៏បាននាំនូវទេយ្យវត្ថុ និងបច្ច័យសម្រាប់ប្រគេនព្រះសង្ឃគង់នៅវត្តឧប្បលវតី ភូមិឈូកមាន អង្ករ២០០គីឡូក្រាម មី៥កេស ត្រីខ១កេស ប្រេងឆា២កេស ទឹកត្រី៤យួរ ទឹកស៊ីអ៊ីវ ៤យួរ ទឹកដោះគោប្រអប់៥កេស ទឹកក្រូច៥កេស ទឹកបរិសុទ្ធ៥កេស ព្រមទាំងបច្ច័យចំនួន៥លានរៀល។ ប្រគេនព្រះគ្រូចៅអធិការវត្តបច្ច័យ២លានរៀល និងព្រះសង្ឃ១២អង្គ ក្នុងមួយអង្គបច្ច័យ៤០ម៉ឺនរៀល។ យាយជី តាជី ដែលបានចូលរួមក្នុងពិធីនោះ ក៏ទទួលបានក្រណាត់ស ១ដុំ (អំណោយរបស់សម្តេចកិត្តិព្រឹទ្ធបណ្ឌិត និងសម្តេចតេជោ) ព្រមទាំងថវិកាមួយចំនួនផងដែរ៕

ដោយ៖ ពេជ្រ សំអឿន (ប្រភព៖ កាកបាទក្រហមកម្ពុជា)