AKP ភ្នំពេញ ថ្ងៃទី០៣ ខែកក្កដា ឆ្នាំ២០២៦ -- យោធាប៉ាគីស្ថានបាននិយាយកាលពីថ្ងៃពុធថា ខ្លួនបានបាញ់ទម្លាក់យន្តហោះគ្មានមនុស្សបើកចំនួន៤គ្រឿងដែលបាញ់ចេញពីប្រទេសអាហ្វហ្គានីស្ថាន ខណៈដែលទីក្រុងកាប៊ុលអះអាងថា ខ្លួនបាន «បាញ់ទម្លាក់គ្រាប់» លើជំរំ ISIS (Daesh) នៅក្នុងប្រទេសប៉ាគីស្ថានដោយជោគជ័យ។

ការវិវត្តទាំងនេះកើតឡើងចំពេលមានភាពតានតឹងចុងក្រោយបំផុតរវាងប្រទេសជិតខាងទាំងពីរ បន្ទាប់ពីការវាយប្រហាររបស់ពួកសកម្មប្រយុទ្ធលើទីតាំងសន្តិសុខមួយនៅក្នុងទីក្រុងការ៉ាជី ភាគខាងត្បូងប្រទេសប៉ាគីស្ថាននិងការវាយប្រហារតាមអាកាសជាបន្តបន្ទាប់កាលពីសប្តាហ៍មុន ដោយទីក្រុងអ៊ីស្លាម៉ាបាដ បានវាយប្រហារជំរំភេរវករនៅក្នុងប្រទេសអាហ្វហ្គានីស្ថាន។

នៅក្នុងសេចក្តីថ្លែងការណ៍មួយ កងទ័ពប៉ាគីស្ថានបាននិយាយថាបណ្តាញការពារដែនអាកាសរបស់ខ្លួន «បានរកឃើញ» និងទប់ស្កាត់តាមផ្លូវអាកាសដែលបាញ់បង្ហោះដោយកងកម្លាំងសន្តិសុខអាហ្វហ្គានីស្ថានកាលពីថ្ងៃអង្គារនៅភាគនិរតីនៃខេត្តបាឡូជីស្ថាន «ជាផ្នែកមួយនៃការគាំទ្រនិងសហការរបស់ពួកគេចំពោះក្រុមភេរវករដែលប្រតិបត្តិការពីខាងក្នុងទឹកដីដែលគ្រប់គ្រងរបស់ពួកគេ»។

សេចក្តីថ្លែងការណ៍បានបន្ថែមថា «ប្រសិនបើពួកតាលីបង់អាហ្វហ្គានីស្ថានបន្តបង្កហេតុមកលើប្រទេសប៉ាគីស្ថាន ពួកគេនឹងទទួលបានការឆ្លើយតបសមស្របដែលនឹងធ្វើឱ្យពួកគេខាតបង់យ៉ាងច្រើន»។

សេចក្តីថ្លែងការណ៍នេះមិនបាននិយាយអំពីអ្នកស្លាប់ និងរបួសនោះទេ ប៉ុន្តែកាសែតប្រចាំថ្ងៃភាសាអង់គ្លេសក្នុងស្រុក Dawn ដោយដកស្រង់ប្រភពព័ត៌មានបានរាយការណ៍ថា ស្ត្រីម្នាក់ត្រូវបានសម្លាប់ និងមនុស្ស ៦នាក់ផ្សេងទៀតបានរងរបួសនៅក្នុងការវាយប្រហារដោយយន្តហោះគ្មានមនុស្សបើកនៅទីក្រុងប៉េសាវ៉ា រដ្ឋធានីនៃខេត្តឃីបឺប៉ាក់ទុនវ៉ា ភាគពាយ័ព្យ កាលពីយប់ថ្ងៃអង្គារ។

អ្នកនាំពាក្យក្រសួងការពារជាតិអាហ្វហ្គានីស្ថាន លោក ស៊ីដឌីគូលឡាហ៍ នូស្រាត (Siddiqullah Nusrat) បាននិយាយថា កងទ័ពអាកាសអាហ្វហ្គានីស្ថានបានធ្វើការវាយប្រហារតាមអាកាសលើជំរំ ISIS ដែលត្រូវបានចោទប្រកាន់នៅក្នុងខេត្តបាឡូជីស្ថាន និងខេត្តឃីបឺប៉ាក់ទុនវ៉ា ដោយបង្កឱ្យមាន «អ្នកស្លាប់ និងរបួសយ៉ាងធ្ងន់ធ្ងរ និងការខាតបង់សម្ភារៈ» លើក្រុមភេរវករ។

ទំនាក់ទំនងរវាងប្រទេសជិតខាងទាំងពីរមានភាពតានតឹងបន្ទាប់ពីការវាយប្រហាររបស់ពួកសកម្មប្រយុទ្ធជាច្រើននៅក្នុងប្រទេសប៉ាគីស្ថានក្នុងរយៈពេលប៉ុន្មានឆ្នាំចុងក្រោយនេះ ដែលបាននាំឱ្យមានការប៉ះទង្គិចគ្នាជាច្រើននៅតាមព្រំដែន៕

ដោយ៖ មូល មិនា (ប្រភព៖ AA-AKP)