AKP ភ្នំពេញ ថ្ងៃទី០២ ខែកក្កដា ឆ្នាំ២០២៦–សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា​​ និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត នាព្រឹកថ្ងៃទី០២ ខែកក្កដា ឆ្នាំ២០២៦នេះ នឹងអញ្ជើញជាអធិបតីក្នុងពិធីអបអរខួប៣០ឆ្នាំរបស់អង្គការដើម្បីភាពញញឹមនៃកុមារ និងពិធីប្រគល់  សញ្ញាបត្រជូនដល់សិស្ស-និស្សិតរបស់វិទ្យាស្ថាន ប៉េ អេស អឺ សម្រាប់ឆ្នាំសិក្សា ២០២១-២០២៤ ស្ថិតនៅផ្ទះលេខ​ ៤០២ ភូមិទ្រា​ សង្កាត់ស្ទឹងមានជ័យ ខណ្ឌមានជ័យ ភ្នំពេញ ៣។

និស្សិតជ័យលាភីចូលរួមសរុបចំនួន៥០០ នាក់ (ស្រី៣១៩ នាក់) ក្នុងកម្រិតបរិញ្ញាបត្របច្ចេកទេស សញ្ញាបត្រជាន់ខ្ពស់បច្ចេកទេស និងសញ្ញាបត្របច្ចេកទេស និងវិជ្ជាជីវៈ៣​ (C3)។ ១០០%នៃនិស្សិតជ័យលាភីដែលមានវត្តមានថ្ងៃនេះមានការងារធ្វើ និង៨៨%ទទួលបានប្រាក់ចំណូលច្រើនជាង​២៥០$ ក្នុងមួយខែ។ ក្នុងនោះ១%បម្រើការក្នុងវិស័យសាធារណៈ ៥%បើកអាជីវកម្មផ្ទាល់ខ្លួន និង៩៤%បម្រើការក្នុងវិស័យឯកជននានា។

វត្តមានរបស់​ សម្ដេចមហាបវរធិបតី និងលោកជំទាវបណ្ឌិតនាពេលនេះ គឺជាមហាកិត្តិយស និងជាការលើកទឹកចិត្តដ៏ថ្លៃថ្លាបំផុត សម្រាប់កុមារ យុវជន ក្រុមគ្រួសារ បុគ្គលិក ក្រុមការងារ អ្នកស្ម័គ្រចិត្ត និងភាគីពាក់ព័ន្ធទាំងអស់ ដែលបានរួមគ្នាបំពេញបេសកកម្មប្រកបដោយស្មារតីទទួលខុសត្រូវ និងការលះបង់ខ្ពស់ រហូតធ្វើឱ្យអង្គការដើម្បីភាពញញឹមនៃកុមារ អាចបន្តបេសកកម្មរបស់ខ្លួនប្រកបដោយជោគជ័យ និងនិរន្តរភាព  អស់រយៈពេល ៣០ ឆ្នាំកន្លងមក។

អង្គការដើម្បីភាពញញឹមនៃកុមារ ហៅកាត់ជាភាសាបារាំងថា PSE ត្រូវបានបង្កើតឡើងក្នុងប្រទេស​កម្ពុជា​នៅក្នុងឆ្នាំ១៩៩៦ ដោយលោក និងលោកស្រី Christian និង Marie-France Des Pallières។ ដើម្បី​បំពេញបេសកកម្មក្នុងប្រទេសកម្ពុជា និងបានចុះអនុស្សរណៈជាមួយក្រសួងការបរទេស និងសហប្រតិបត្តិការ​អន្តរជាតិ ក្រសួងអប់រំយុវជន និងកីឡា ក្រសួងការងារ និងបណ្តុះបណ្តាលវិជ្ជាជីវៈ ក្រសួងសុខាភិបាល និង​ក្រសួងសង្គមកិច្ច អតីតយុទ្ធជន និងយុវនីតិសម្បទា ព្រមទាំងទទួលបានការសហការយ៉ាងជិតស្និទ្ធជាមួយរដ្ឋបាលមូលដ្ឋាន។

ចាប់តាំងពីឆ្នាំ១៩៩៦មក អង្គការបានជួយកុមារ និងយុវជនដែលមកពីគ្រួសារទីទ័លក្រ និងមិនបាន​ទទួល​​ការ​អប់រំដែលស្ថិតនៅរាជធានីភ្នំពេញ ខេត្តសៀមរាប និងខេត្តព្រះសីហនុ តាមរយៈកម្មវិធីប្រតិបត្តិ​ចំនួន​៦​ធំ​ៗគឺ៖ ទី១ កម្មវិធី​អាហារ ទី២ កម្មវិធីសុខភាព ទី៣ កម្មវិធីការពារនិងការស្នាក់នៅ ទី៤ កម្មវិធី​អប់រំ​ចំណេះ​ទូទៅ ទី៥ កម្មវិធី​បណ្តុះបណ្តាលវិជ្ជាជីវៈនិងឧត្តមសិក្សា និងទី៦ កម្មវិធីផ្តល់ជំនួយដល់គ្រួសារ។ កម្មវីធី​ទាំងអស់​នេះ គឺជាការចូលរួមចំណែកជាមួយនឹងគោលនយោបាយរបស់រាជរដ្ឋាភិបាល។

រយៈពេលជាង៣០ឆ្នាំកន្លងមកនេះ មាន​កុមារនិងយុវជនក្រីក្រនិងងាយ​រងគ្រោះ​ជាង ១៥០០០ នាក់ បាន​នឹង​កំពុង​​ទទួលបានការអប់រំចំណេះទូទៅ ការបណ្តុះបណ្តាលវិជ្ជាជីវៈ និងទទួលបានការ​គាំទ្រផ្សេងៗ។ ក្នុង​នោះ​មានសិស្ស-និស្សិត​ជាង ៨០០០នាក់ បា​នបញ្ចប់ការសិក្សាវិជ្ជាជីវៈ និង​កំពុងចូលរួមចំណែកនៃ​កម្លាំង​ពលកម្ម​ជំនាញ​លើគ្រប់វិស័យការងារទូទាំងប្រទេសកម្ពុជា និង​បាន​​​ក្លាយជាបុគ្គលគំរូនៅក្នុងសហគមន៍របស់​ពួកគេ​ផង​ដែរ។ ​នា​ពេល​​បច្ចុប្បន្ននេះ ​អង្គការនៅតែបន្ត​បេសកកម្ម​អប់រំ ការបណ្តុះបណ្តាល​វិជ្ជាជីវៈ​ និង​ការ​គាំទ្រផ្សេង​ៗដល់​កុមារ និង​យុវជន​ក្រីក្រ និង​ងាយរងគ្រោះជិត​ ៧០០០នាក់​​ ជា​រៀង​រាល់ឆ្នាំ។

ខណៈពេលដែល​រាជរដ្ឋាភិបាល​កម្ពុជា បាននិងកំពុងជំរុញឱ្យសម្រេចបាននូវចក្ខុវិស័យ​ជាតិសម្រាប់​ឆ្នាំ​២០៣០​ និង​២០៥០ ​ការ​កសាង​មូលធន​មនុស្ស​​ និងការអភិវឌ្ឍ​កម្លាំង​ពលកម្មជំនាញដែលជាទិសដៅ​ស្នូល​ដ៏​សំខាន់​​មួយ​ក្នុង​ការ​ពង្រឹ​ង​សេដ្ឋកិច្ច​ជាតិ​ប្រកបដោយ​ចីរភាព។ ក្នុងបរិបទនេះ ពិធីអបអរខួបទី៣០ឆ្នាំរបស់​អង្គការ​ដើម្បី​ភាពញញឹមនៃកុមារនៅក្នុងឆ្នាំនេះ មិនត្រឹម​តែ​​​ជាព្រឹត្តិការណ៍​អបអរសាទរ​លើភាព​ជោគ​ជ័យ​​នៃ​បេសកម្ម​របស់​អង្គការតែប៉ុណ្ណោះ​ទេ ប៉ុន្តែវាក៏ជាការបង្ហាញនូវវឌ្ឍនភាពនៃការចូលរួមចំណែកក្នុងការអភិវឌ្ឍមូលធនមនុស្ស ដែលឆ្លើយតបនឹងតម្រូវការទីផ្សារជំនាញអាទិភាពសម្រាប់សេដ្ឋកិច្ចជាតិ នាពេល៣០ឆ្នាំកន្លងមកនេះផងដែរ។ ក្នុង​​ឱកាស​​​នេះ ក៏ជាការបង្ហាញពីការបេ្តជ្ញាចិត្តរបស់អង្គការទាំងមូល ក្នុងការបន្តចូលរួម​ចំណែកក្នុងដំណើរ​​ឈានទៅរក​ទិសដៅ​​​​អាទិភាព​អភិវឌ្ឍន៍​ជាតិឆ្នាំ២០៣០ និង២០៥០ ក្នុងការអភិវឌ្ឍ​កម្លាំងពលកម្ម​ជំនាញ​ជាតិសម្រាប់​ពង្រឹង​សេដ្ឋកិច្ចជាតិប្រកប​ដោយ​ចីរភាព៕

ដោយ៖ គង់ សិរីរ័ត្ន