AKP ភ្នំពេញ ថ្ងៃទី១ ខែកក្កដា ឆ្នាំ២០២៦--ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានលើកឡើងថា ការអភិវឌ្ឍន៍មូលធនមនុស្សគឺត្រូវចាប់ផ្តើមពីដំណាក់កាលដំបូង ពោលគឺត្រូវចាប់ផ្តើមចំពោះក្មេងតាំងពីក្នុងរយៈពេល ១០០០ថ្ងៃដំបូងនៃអាយុរបស់ពួកគេ ដែលជាពេលវេលាខួរក្បាលកុមារលូតលាស់រហូតដល់ ៩០% ទាមទារឱ្យមានការយកចិត្តទុកដាក់ខ្ពស់ និងអាហារូបត្ថម្ភល្អគឺជាការសំខាន់។

ក្នុងពិធីប្រគល់សញ្ញាបត្រជូនដល់សិស្សានុសិស្សកម្រិតមត្តេយ្យសិក្សា បឋមសិក្សា និងមធ្យមសិក្សាបឋមភូមិ នៃសាលាអន្តរជាតិ ខេ ស៊ី អ៊ី (KCE International School) នាថ្ងៃទី៣០ ខែមិថុនា ឆ្នាំ២០២៦ ឯកឧត្តមបណ្ឌិតសភាចារ្យ ហង់ជួន ណារ៉ុន បានគូសបញ្ជាក់ថា ការអប់រំកម្រិតមត្តេយ្យសិក្សា មិនមែនត្រឹមតែជាការរៀនអក្សរប៉ុណ្ណោះទេ ថែមទាំងជាការបណ្តុះនូវឯករាជ្យភាព ការគ្រប់គ្រងអារម្មណ៍ និងបំណិនដោះស្រាយបញ្ហាតាមរយៈការលេង ដែលជាមូលដ្ឋានគ្រឹះដ៏រឹងមាំសម្រាប់ការសិក្សានៅកម្រិតបឋមសិក្សា និងកម្រិតសិក្សាបន្តបន្ទាប់ទៀត។ បន្ថែមលើចំណេះដឹងទូទៅ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានជំរុញឱ្យមានការបន្តបណ្តុះបំណិនសតវត្សទី២១ ដល់សិស្សានុសិស្ស ដូចជាសមត្ថភាពដោះស្រាយបញ្ហា ការគិតបែបស៊ីជម្រៅ និងភាពជាអ្នកដឹកនាំជាដើម តាមរយៈវិធីសាស្ត្របង្រៀនដែលជួយឱ្យសិស្សានុសិស្សមានការចង់ដឹងចង់ឃើញ និងពង្រឹងស្មារតីចេះរៀនដោយខ្លួនឯង ដើម្បីក្លាយជាអ្នកសិក្សាពេញមួយជីវិត។

ក្នុងឱកាសនេះ ឯកឧត្តមបណ្ឌិតសភាចារ្យ ឧបនាយករដ្ឋមន្ត្រី បានអបអរសាទរដល់ក្មួយៗសិស្សានុសិស្សជ័យលាភីទាំង ១១០នាក់ ដែលបានខិតខំរៀនសូត្ររហូតបញ្ចប់ការសិក្សាតាមកម្រិតថ្នាក់នីមួយៗដោយជោគជ័យ ដែលលទ្ធផលនេះមិនត្រឹមតែបញ្ជាក់អំពីសមត្ថភាពសិក្សារបស់ក្មួយៗប៉ុណ្ណោះទេ ថែមទាំងឆ្លុះបញ្ចាំងពីការខិតខំប្រឹងប្រែង ភាពអត់ធ្មត់ តស៊ូជម្នះការលំបាកជាច្រើនរបស់ក្មួយៗ ព្រមទាំងការគាំទ្របង្កប់ដោយសេចក្តីស្រឡាញ់ពីលោកគ្រូ អ្នកគ្រូ និងមាតាបិតាអាណាព្យាបាលផងដែរ។ ជាមួយគ្នានេះ ឯកឧត្តមបានវាយតម្លៃខ្ពស់ចំពោះកម្មវិធីសិក្សានៃសាលាអន្តរជាតិ ខេ ស៊ី អ៊ី ដែលមានទាំងកម្មវិធីសិក្សាជាតិ និងអន្តរជាតិ ក្នុងការចូលរួមចំណែកយ៉ាងសកម្មជាមួយរាជរដ្ឋាភិបាល ដើម្បីលើកកម្ពស់គុណភាពវិស័យអប់រំ និងការបណ្តុះបណ្តាលធនធានមនុស្សនៅកម្ពុជា៕

ដោយ ចាន់ សុភឿន (ប្រភព៖ ក្រសួងអប់រំ)