AKP ថ្ងៃទី២៨ ខែមិថុនា ឆ្នាំ២០២៦--

ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ និងឯកឧត្តមបណ្ឌិត ជាម ច័ន្ទសោភ័ណ អភិបាលខេត្តកំពង់ស្ពឺ បានអញ្ជើញដឹកនាំប្រតិភូ ចុះត្រួតពិនិត្យផ្ទាល់នៅ តំបន់សហគមន៍ទេសចរណ៍ទឹកធ្លាក់ចំបក់ ស្ថិតនៅក្នុងស្រុកភ្នំស្រួច ខេត្តកំពង់ស្ពឺ។

ដំណើរចុះពិនិត្យនេះ ក្នុងគោលបំណងសំខាន់គឺពិនិត្យ ជំរុញសក្តានុពល វាយតម្លៃការអភិវឌ្ឍន៍វិស័យទេសចរណ៍ធម្មជាតិ និងអេកូទេសចរណ៍ក្នុងតំបន់។ ពង្រឹងសេវាកម្ម ពិនិត្យលើហេដ្ឋារចនាសម្ព័ន្ធ បដិសណ្ឋារកិច្ច និងសុវត្ថិភាពដើម្បីទទួលភ្ញៀវទេសចរ ក្នុងរដូវកាលបៃតង (Green Season)។ គាំទ្រសហគមន៍ ជួបសំណេះសំណាល និងលើកទឹកចិត្តដល់បងប្អូនប្រជាសហគមន៍ផ្ទាល់ ក្នុងការចូលរួមថែរក្សាព្រៃឈើ និងបង្កើតចំណូលមូលដ្ឋាន។

គួរបញ្ជាក់ផងដែរថា៖ ទឹកធ្លាក់ចំបក់ នៅតែជាគោលដៅទេសចរណ៍ធម្មជាតិដ៏ទាក់ទាញ មិនអាចរំលងបានរបស់ខេត្តកំពង់ស្ពឺ ភ្ញៀវទេសចរជាតិ និងអន្តរជាតិ នឹងទទួលបានអារម្មណ៍ស្រស់ស្រាយជាមួយខ្យល់អាកាសបរិសុទ្ធ សម្រស់ព្រៃព្រឹក្សា និងទឹកធ្លាក់ត្រជាក់ស្រេប៕

ដោយ៖ ម៉ែន ប៊ុនធីម