AKP ភ្នំពេញ ថ្ងៃទី២៥ ខែមិថុនា ឆ្នាំ២០២៦--ក្រុមហ៊ុនសាជីវកម្មស្ពាន និងថ្នល់ចិន (CRBC) និងក្រុមហ៊ុន ហ្វូណន តេជោ ខូស្តាល់-អ៊ីនលែន វ៉ធើរវ៉េ (Funan Techo Coastal–Inland Waterway Co., Ltd) បានរួមគ្នារៀបចំ បទឧទ្ទេសនាមមួយ នារសៀលថ្ងៃព្រហស្បតិ៍ នៅវិទ្យាស្ថានបច្ចេកវិទ្យាកម្ពុជា ក្នុងរាជធានីភ្នំពេញ ដែលជាផ្នែកមួយនៃ «បទឧទ្ទេសនាមអន្តរជាតិ៖ ក្តីស្រមៃហ្វូណន (Funan Dream)» ដោយបានបង្ហាញពីផែនទីបង្ហាញផ្លូវលម្អិត និងអត្ថប្រយោជន៍យុទ្ធសាស្ត្រនៃគម្រោងខ្នាតយក្សរបស់កម្ពុជាមួយនេះ។
បទឧទ្ទេសនាមនេះ គឺជាការចាប់ផ្តើមដំបូងនៃស៊េរីថ្មីមួយក្នុងការចុះជួបសហគមន៍ ដែលមានគោលបំ​ណង​​ស្វែងយល់ឱ្យបានស៊ីជម្រៅពីបទពិសោធន៍ និងចំណេះដឹងដែលបានប្រមូលផ្តុំក្នុងអំឡុងពេលដំណើរការសាងសង់គម្រោងព្រមទាំងលើកកម្ពស់ការផ្លាស់ប្តូរវប្បធម៌ និងរវាងប្រជាជននិងប្រជាជន ចិន-កម្ពុជា ឈាន​ទៅដល់សហគមន៍មូលដ្ឋាន គាំទ្រដល់ការអភិវឌ្ឍយុវជន និងបង្កើនការយល់ដឹងជាសាធារណៈអំពីគម្រោងនេះ។
តាមរយៈការបង្ហាញស្លាយ (Slides) និងចលនាគំនូរជីវចលក្លែងធ្វើបែប 3D Simulation អ្នកជំនាញបានពន្យល់ណែនាំដល់សមាជិកគណៈគ្រប់គ្រង សាស្ត្រាចារ្យ និស្សិតនៃវិទ្យាស្ថានបច្ចេកវិទ្យាកម្ពុជា ព្រមទាំងតំណាងមកពីក្រសួងសាធារណការ និងដឹកជញ្ជូនកម្ពុជា សរុបជាង ៤០០នាក់។

ក្នុងឱកាសនោះ លោក Liu Zhaowei អគ្គនាយកនៃគម្រោងនេះ បានប្រាប់និស្សិតថា គម្រោងនេះគឺជាគំនិតផ្តួចផ្តើមហេដ្ឋារចនាសម្ព័ន្ធដ៏សំខាន់បំផុតមួយរបស់កម្ពុជា។ លោកបានមានប្រសាសន៍ថា ក្រុមហ៊ុន CRBC នឹងប្រកាន់ខ្ជាប់នូវគោលការណ៍សុវត្ថិភាព ការពារបរិស្ថាន និងការសាងសង់ប្រកបដោយការទទួលខុសត្រូវខ្ពស់ពេញមួយដំណើរការ ដើម្បីកាត់បន្ថយផលប៉ះពាល់ណាមួយដល់ជីវភាពរស់នៅប្រចាំថ្ងៃរបស់សហគមន៍មូលដ្ឋាន។
លោក Liu បានបន្ថែមថា៖ «CRBC នឹងពង្រឹងទំនាក់ទំនងយ៉ាងសកម្មជាមួយអាជ្ញាធររដ្ឋាភិបាល គ្រឹះស្ថានអប់រំ និងសាធារណជន បំពេញកាតព្វកិច្ចសង្គមរបស់សាជីវកម្ម និងធ្វើការរួមដៃគ្នាជាមួយភាគីពាក់ព័ន្ធទាំងអស់ ដើម្បីកសាងគម្រោងដ៏សំខាន់នេះ ដែលនឹងជួយពង្រឹងចំណងមិត្តភាពចិន-កម្ពុជា និងលើកកម្ពស់សុខុមាលភាពរបស់ប្រជាជន»។​

គម្រោងនេះមានប្រវែង ១៧២,៦ គីឡូម៉ែត្រ ដោយលាតសន្ធឹងចាប់ពីព្រែកតាកែវនៃទន្លេមេគង្គ ក្នុងខេត្តកណ្តាលភាគខាងត្បូង រហូតដល់សមុទ្រក្នុងខេត្តកែបភាគនិរតី ដោយឆ្លងកាត់ខេត្តតាកែវ និងខេត្តកំពត។
ការសាងសង់គម្រោងគ្រប់គ្រងធនធានទឹកចម្រុះ ហ្វូណនតេជោ ត្រូវបានបែងចែកជាពីរផ្នែក៖
• ផ្នែកទី១៖ មានប្រវែង ២១ គីឡូម៉ែត្រ បានបើកការដ្ឋានសាងសង់ក្នុងខែសីហា ឆ្នាំ២០២៤។
• ផ្នែកទី២៖ មានប្រវែង ១៥១,៦ គីឡូម៉ែត្រ បានចាប់ផ្តើមការសាងសង់ក្នុងខែមេសា ឆ្នាំ២០២៦។
នៅពេលដែលផ្នែកទាំងពីរត្រូវបានបញ្ចប់ទាំងស្រុងក្នុងឆ្នាំ២០២៨ គម្រោងនេះនឹងក្លាយជាផ្លូវទឹកដំបូងគេបង្អស់របស់ព្រះរាជាណាចក្រកម្ពុជា ដែលតភ្ជាប់ប្រព័ន្ធទន្លេមេគង្គទៅកាន់សមុទ្រ។

លោក Chang Heanglong អគ្គនាយករងនៃក្រុមហ៊ុន ហ្វូណន តេជោ ខូស្តាល់-អ៊ីនលែន វ៉ធើរវ៉េ បានថ្លែងក្នុងព្រឹត្តិការណ៍នោះថា គម្រោងនេះគឺជាគំនិតផ្តួចផ្តើមយុទ្ធសាស្ត្រជាតិនៅក្នុងប្រទេសកម្ពុជា ដែលវិនិយោ​គ​រួមគ្នាដោយភាគីពាក់ព័ន្ធចិន និងកម្ពុជា ហើយទទួលបានការយកចិត្តទុកដាក់ និងគាំទ្រយ៉ាងខ្លាំងពីប្រជាជនកម្ពុជា។
លោកបានបន្ថែមថា ការគាំទ្រការអភិវឌ្ឍយុវជននៅកម្ពុជា តែងតែជាអាទិភាពគន្លឹះមួយ ដែលត្រូវបានសង្កត់ធ្ងន់ជាបន្តបន្ទាប់ដោយអ្នកវិនិយោគទាំងសងខាង។ លោកបានមានប្រសាសន៍ថា៖ «បទឧទ្ទេសនាមអន្តរជាតិ៖ ក្តីស្រមៃហ្វូណន គឺជាសមាសភាគដ៏សំខាន់ក្នុងការអនុវត្តជាក់ស្តែងនៃប្តេជ្ញាចិត្តនេះ»។

គម្រោងជាប្រវត្តិសាស្ត្រនេះ នឹងនាំមកនូវអត្ថប្រយោជន៍យ៉ាងធំធេងដល់កម្ពុជា លើវិស័យនានាដូចជា ការគ្រប់គ្រងធនធានទឹក កសិកម្ម អេកូទេសចរណ៍ និងការដឹកជញ្ជូនតាមផ្លូវទឹក។ វាក៏នឹងបង្កើតឱកាសការងារ និងលើកកម្ពស់ការអភិវឌ្ឍជំនាញវិជ្ជាជីវៈសម្រាប់យុវជន ដែលស្របតាមយុទ្ធសាស្ត្របញ្ចកោណ-ដំណាក់កាលទី១ របស់រាជរដ្ឋាភិបាលកម្ពុជា ជាពិសេសក្នុងវិស័យអភិវឌ្ឍន៍មូលធនមនុស្ស៕
ដោយ៖ គង់ សិរីរ័ត្ន, រូបថត៖ សួស សាវី