AKP ព្រះសីហនុ ថ្ងៃទី០៣ ខែមិថុនា ឆ្នាំ២០២៦ -- លោក អ៊ី ធារិន អភិបាលនៃគណៈអភិបាលស្រុកព្រៃនប់ កាលពីព្រឹកថ្ងៃអង្គារ ទី០៣ ខែមិថុនា ឆ្នាំ២០២៦ បានអញ្ជើញដឹកនាំកិច្ចប្រជុំរឹតបន្តឹងការអនុវត្តច្បាប់លើការចែកចាយ និងប្រើប្រាស់ផលិតផលថ្នាំជក់ខុសច្បាប់ ព្រមទាំងបារីអេឡិចត្រូនិក ដែលកំពុងគំរាមកំហែងដល់សុខមាលភាពប្រជាពលរដ្ឋ និងសណ្តាប់ធ្នាប់សង្គម។

លោក អ៊ី ធារិន អភិបាលស្រុកព្រៃនប់ មានប្រសាសន៍បើកកិច្ចប្រជុំ ស្តីពី «សំណើសុំកិច្ចសហការ និងសម្របសម្រួលការចុះតាមដាន និងជំរុញការបង្ក្រាបផលិតផលថ្នាំជក់ខុសច្បាប់ និងក្លែងក្លាយ ព្រមទាំងបារីអេឡិចត្រូនិក» នៅក្នុងភូមិសាស្រ្តស្រុកព្រៃនប់ ព្រមទាំងជំរុញឱ្យមានការអនុវត្តវិធានការច្បាប់ឱ្យបានម៉ឺងម៉ាត់បំផុត ស្របតាមគោលនយោបាយរបស់រាជរដ្ឋាភិបាល ដើម្បីធានាការពារសុខមាលភាពរបស់ប្រជាពលរដ្ឋ និងលើកកម្ពស់បរិយាកាសរស់នៅក្នុងមូលដ្ឋានឱ្យប្រកបដោយសុវត្ថិភាព និងសុខភាពល្អ។

លោកអភិបាលស្រុក ក៏បានអំពាវនាវដល់បងប្អូនប្រជាពលរដ្ឋ អាជីវករ និងយុវជនទាំងអស់ត្រូវជៀសវាងការពាក់ព័ន្ធនឹងបារីអេឡិចត្រូនិក (E-cigarette/Vape) និងផលិតផលថ្នាំជក់ខុសច្បាប់ ហើយចូលរួមសហការផ្តល់ព័ត៌មានដល់អាជ្ញាធរ ប្រសិនបើជួបប្រទះករណីល្មើសទាំងនេះ ព្រោះបារីអេឡិចត្រូនិកបង្កផលប៉ះពាល់ដល់សុខភាព និងឈានទៅកាតប្រើប្រាស់សេពគ្រឿងញៀនថែមទៀតផង៕

ដោយ៖ ងូ សុមុនី