AKP ភ្នំពេញ ថ្ងៃទី២៨ ខែឧសភា ឆ្នាំ២០២៦--លោកជំទាវ ស្រូយ សុជាតិ អគ្គនាយក នៃអគ្គនាយកដ្ឋានយុវជន ថ្ងៃទី២៧ ខែឧសភា ឆ្នាំ២០២៦ បានដឹកនាំក្រុមការងារអគ្គនាយកដ្ឋានចុះសួរសុខទុក្ខ និងគាំទ្រសាលាបឋមសិក្សាតេជោបុស្បូវ ស្ថិតនៅស្រុកជាំក្សាន្ត ខេត្តព្រះវិហារ ដែលទើបបានផ្លាស់ទីពីជំរំបាក់កាំមកកាន់ទីតាំងថ្មី (ជំរំបៃតង)។

ក្នុងឱកាសនោះ លោកជំទាវអគ្គនាយក ក្រុមការងារអគ្គនាយកដ្ឋាន និងក្រុមការងារសាលារៀនអន្តរជាតិវេស្ទឡាញន៍ បានជួបសំណេះសំណាល សួរសុខទុក្ខ និងលើកទឹកចិត្តដល់សិស្សានុសិស្សទាំងអស់ ដែលកំពុងបន្តការសិក្សានៅក្នុងថ្នាក់រៀនបណ្ដោះអាសន្ន ព្រមទាំងបាននាំមកនូវតង់ថ្នាក់រៀនបណ្ដោះ អាសន្នចំនួន១០ សម្ភារសិក្សា សម្លៀកបំពាក់ តុក្កតា សម្ភារអនាម័យ រួមទាំងថវិកាមួយចំនួន ដើម្បីជួយសម្រួល និងជំរុញទឹកចិត្តដល់សិស្សានុសិស្ស និងក្រុមគ្រួសាររបស់ពួកគេ ដោយសកម្មភាពនេះបានបង្ហាញពីការយកចិត្តទុកដាក់ និងស្មារតីសាមគ្គីក្នុងការគាំទ្រកុមារ និងវិស័យអប់រំ ទោះស្ថិតក្នុងស្ថានភាពលំបាកក៏ដោយ ដើម្បីធានាថាកុមារគ្រប់រូបនៅតែទទួលបានឱកាសសិក្សាបន្តប្រកបដោយសុវត្ថិភាព និងក្ដីសង្ឃឹម៕

ដោយ៖ ចាន់ សុភឿន (ប្រភព៖ ក្រសួងអប់រំ)