AKP ភ្នំពេញ ថ្ងៃទី១៧ ខែឧសភា ឆ្នាំ២០២៦---

ព្រឹត្តិការណ៍​ដង្ហែគោមឈូកព្រះពុទ្ធសាសនា «Lantern Parade/ Lotus Lantern Festival 2026»​ កណ្តាលទីក្រុងសេអ៊ូល​ សាធារណរដ្ឋ​កូរ៉េ​មានអ្នកចូលរួមយ៉ាងច្រើន រួមទាំងព្រះសង្ឃផងដែរ។

នៅរសៀលថ្ងៃទី ១៦ ខែឧសភា ឆ្នាំ២០២៦ ឯកឧត្តម ឃួន ផុនរតនៈ ឯកអគ្គរាជទូតកម្ពុជា ប្រចាំសាធារណរដ្ឋកូរ៉េ និងលោកជំទាវ ព្រមទាំងមន្ត្រីស្ថានទូត បានអញ្ជេីញចូលរួមកម្មវិធីដង្ហែគោមឈូកព្រះពុទ្ធសាសនា «Lantern Parade/ Lotus Lantern Festival 2026» ដែលរៀបចំដោយគណៈកម្មាធិការអភិរក្សគោមឈូកសាធារណរដ្ឋកូរ៉េ ក្រោមការឧបត្ថម្ភពីសាលាក្រុងសេអ៊ូល និង គណៈកម្មាធិការវត្តព្រះពុទ្ធសាសនាកូរ៉េឆូកេសា សាធារណរដ្ឋ​កូរ៉េ​ និងមានអ្នកចូលរួមទស្សនាកូរ៉េ​ និងភ្ញៀវទេសចរបរទេស​ នៅតាមបណ្តោយមហាវិថីធំៗកណ្តាលទីក្រុងសេអ៊ូល សរុបប្រមាណជាង ៥០​ ម៉ឺននាក់។

ក្បួនដង្ហែរបស់ប្រទេសកម្ពុជាបានដឹកនាំរៀបចំដោយព្រះតេជគុណ​ រិន សារ៉ូ ចៅអធិការវត្តខ្មែរហ្វាសង់ និងបងប្អូនសហគមន៍ខ្មែរនៅសាធារណរដ្ឋកូរ៉េ​ បានរៀបចំផែនក្បួនដង្ហែតាមបាវចនា ជាតិ សាសនា ព្រះមហាក្សត្រ និងអមដោយផែនប្រពៃណី។ ក្រៅពីបង្ហាញពីគោមផ្ការំដួលតាមលក្ខណៈព្រះពុទ្ធសាសនាខ្មែរ​ ក្បួនដង្ហែរកម្ពុជាក៏បានបង្ហាញនូវវប្បធម៌ដ៏សំបូរបែបរបស់ខ្លួន ដូចជាសម្លៀកបំពាក់ព្រះមហាក្សត្រ សម្លៀកបំពាក់អាពាហ៍ពិពាហ៍ របាំល្ខោនខោល ល្ខោនបាសាក់ និងរបាំល្ខោនស្បែកផងដែរ ដែលទទួលបានការស្វាគមន៍ និងធ្វើឱ្យអ្នកចូលរួមទស្សនាមានការកោតសរសើរ​ និងស្ញប់ស្ញែងយ៉ាងខ្លាំង​ ចំពោះវប្បធម៌ប្រពៃណីរបស់ប្រទេសកម្ពុជា៕

ដោយ៖ ប៊ុនរិទ្ធ