AKP បន្ទាយមានជ័យ ថ្ងៃទី០៩ ខែមេសា ឆ្នាំ២០២៦–ក្តីស្រមៃចង់បានសរសៃឈាមសេដ្ឋកិច្ចដ៏រឹងមាំរបស់ប្រជាពលរដ្ឋក្នុងស្រុកចំនួន ៤ នៃខេត្តបន្ទាយមានជ័យ កំពុងក្លាយជាការពិត ខណៈដែលក្រសួងអភិវឌ្ឍន៍ជនបទ បាននិងកំពុងសម្រុកជំរុញការសាងសង់ផ្លូវជនបទចំនួន ៥ ខ្សែ ប្រកបដោយគុណភាព និងភាពធន់ ដើម្បីតភ្ជាប់ជីវភាពជនបទទៅកាន់ទីផ្សារឱ្យកាន់តែខិតជិតគ្នា។

កាលពីថ្ងៃពុធ ទី០៨ ខែមេសា ឆ្នាំ២០២៦ ក្រោមការចង្អុលបង្ហាញផ្ទាល់ពី ឯកឧត្ដម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ, លោក ទូច ស៊ីផាតអគ្គនាយករងរដ្ឋបាល និងហិរញ្ញវត្ថុ និងជាប្រធានគ្រប់គ្រងគម្រោង SAAMBAT បានដឹកនាំក្រុមការងារបច្ចេកទេស ចុះពិនិត្យដោយផ្ទាល់នូវវឌ្ឍនភាពការងារសាងសង់ ដែលមានលក្ខណៈបច្ចេកទេសទំនើប និងភាពហ្មត់ចត់បំផុត។

តាមការបញ្ជាក់ពីលោក ជា យុទ្ធារុណ ប្រធានមន្ទីរអភិវឌ្ឍន៍ជនបទខេត្តបន្ទាយមានជ័យ គម្រោងអភិវឌ្ឍន៍ដ៏ធំនេះគ្របដណ្តប់លើទីតាំងសំខាន់ៗ រួមមានស្រុកថ្មពួកខ្សែផ្លូវបន្ទាយឆ្មារ-ព្រំប្រទល់ឧត្តរមានជ័យ (៤.២៤ គ.ម) និងផ្លូវសំរោងកើត (៤.៥៤ គ.ម) ដែលជាច្រកសេដ្ឋកិច្ចរវាងខេត្ត។ស្រុកស្វាយចេកផ្លូវតាដួល តភ្ជាប់ភូមិស្វាយសរ ទៅភូមិប្រាសាទវៀន (៣.៧១ គ.ម) រួមមានស្ពានបេតុងប្រវែង ៣៩ ម៉ែត្រ។ក្រុងសិរីសោភ័ណ និងស្រុកព្រះនេត្រព្រះ ផ្លូវតភ្ជាប់ភូមិឈូក ទៅភូមិសូត្រមន្ត (៦.៨៨ គ.ម)។ស្រុកមង្គលបូរីផ្លូវត្រាង ចាប់ពីផ្លូវជាតិលេខ៥ ដល់ភូមិពោធិពីរដើម (៣.៨១ គ.ម)។

មិនត្រឹមតែជាតួលេខនៃគីឡូម៉ែត្រផ្លូវនោះទេ ប៉ុន្តែវាគឺជាការផ្លាស់ប្តូរជីវិតពិតៗ។ លោកស្រី សយ សុខនកសិករក្នុងឃុំបន្ទាយឆ្មារ បានបង្ហាញអារម្មណ៍រំភើបទាំងទឹកមុខញញឹមថា “ពីមុនឱ្យតែដល់រដូវវស្សា ដឹកកសិផលទៅលក់ម្តងៗពិបាកណាស់ ផ្លូវជាប់ភក់ រទេះរុញសឹងមិនរួច។ តែឥឡូវឃើញគេមកធ្វើផ្លូវស្អាត មានលូបង្ហូរទឹកត្រឹមត្រូវបែបនេះ ខ្ញុំសប្បាយចិត្តរកលេខដាក់គ្មាន។ ផ្លូវនេះមិនត្រឹមតែជួយឱ្យយើងយកស្រូវទៅលក់បានលឿនទេ តែសូម្បីតែកូនចៅទៅរៀនក៏លែងប្រឡាក់ខោអាវដែរ។

ចំណែកឯលោក មាស សារ៉នអ្នករត់ម៉ូតូឌុបនៅតំបន់ស្រុកស្វាយចេក បានលើកឡើងថា “ការមានស្ពានបេតុង និងផ្លូវល្អ ជួយសន្សំសំចៃពេលច្រើនណាស់។ ពីមុនជិះវាងឆ្ងាយ ឥឡូវតភ្ជាប់គ្នាជិតបង្កើយ។ ខ្ញុំជឿថាពេលផ្លូវរួចរាល់ ១០០% ជីវភាពអ្នកភូមិយើងនឹងធូរធារជាងមុន ព្រោះអ្នកទិញនឹងចូលមកដល់ក្នុងភូមិផ្ទាល់តែម្តង។”

ក្នុងដំណើរចុះពិនិត្យនេះ លោក ទូច ស៊ីផាត បានសង្កត់ធ្ងន់ និងណែនាំយ៉ាងម៉ឺងម៉ាត់ដល់ក្រុមហ៊ុនសាងសង់ ឱ្យប្រកាន់ខ្ជាប់នូវបទដ្ឋានបច្ចេកទេស។ លោកបានបញ្ជាក់ថា ផ្លូវទាំងនេះមិនមែនធ្វើឡើងគ្រាន់តែឱ្យតែរួចពីដៃនោះទេ ប៉ុន្តែត្រូវតែជា ផ្លូវដែលមានភាពធន់នឹងការប្រែប្រួលអាកាសធាតុ ដើម្បីធានាបាននូវការប្រើប្រាស់យូរអង្វែង ឆ្លើយតបទៅនឹងតម្រូវការដឹកជញ្ជូនដែលកំពុងកើនឡើង។

គម្រោង SAAMBAT (គម្រោងគាំទ្រនិរន្តរភាពហេដ្ឋារចនាសម្ព័ន្ធជនបទ ដើម្បីទីផ្សារកសិករ និងពាណិជ្ជូបនីយកម្មកសិកម្ម) កំពុងក្លាយជាកាតាលីករយ៉ាងសំខាន់ ក្នុងការជម្រុញសេដ្ឋកិច្ចគ្រួសារនៅតាមទីជនបទ តាមរយៈការកាត់បន្ថយចំណាយដឹកជញ្ជូន និងការបង្កើនប្រសិទ្ធភាពនៃខ្សែច្រវាក់តម្លៃកសិកម្មក្នុងខេត្តបន្ទាយមានជ័យទាំងមូល៕

ដោយ៖ ឈុន សារ៉ាត