AKP ភ្នំពេញ ថ្ងៃទី១៦ ខែមីនា ឆ្នាំ២០២៦ -- រដ្ឋមន្ត្រីការបរទេសចិន លោក វ៉ាង យី (Wang Yi) បានជួបជាមួយរដ្ឋមន្ត្រីការបរទេសវៀតណាម លោក ឡេ ហយទ្រុង (Le Hoai Trung) នៅទីក្រុងហាណូយ កាលពីថ្ងៃអាទិត្យ។

ក្នុងអំឡុងពេលនៃកិច្ចប្រជុំនេះ លោក វ៉ាង ដែលជាសមាជិកនៃការិយាល័យនយោបាយនៃគណៈកម្មាធិការកណ្តាលបក្សកុម្មុយនិស្តចិន បានកត់សម្គាល់ថា បន្ទាប់ពីសមាជជាតិលើកទី១៤របស់បក្សកុម្មុយនិស្តវៀតណាម (CPV) ក្នុងខែមករាឆ្នាំនេះ ថ្នាក់ដឹកនាំកំពូលនៃគណបក្សទាំងពីរបានយល់ព្រមធ្វើកិច្ចប្រជុំរដ្ឋមន្ត្រីលើកដំបូងនៃកិច្ចសន្ទនាយុទ្ធសាស្ត្រ «៣បូក៣» ចិន-វៀតណាម ស្តីពីការទូត ការពារជាតិ និងសន្តិសុខសាធារណៈ និងកិច្ចប្រជុំលើកទី១៧ នៃគណៈកម្មាធិការដឹកនាំកិច្ចសហប្រតិបត្តិការទ្វេភាគីចិន-វៀតណាម។

លោក វ៉ាង បាននិយាយថា ស្របតាមការឯកភាពគ្នាជាយុទ្ធសាស្ត្រដែលសម្រេចបានដោយថ្នាក់ដឹកនាំកំពូល យន្តការសំខាន់ទាំងពីរនេះគួរតែត្រូវបានប្រើប្រាស់ដើម្បីស្វែងយល់យ៉ាងស៊ីជម្រៅអំពីការសម្របសម្រួលនៃបញ្ហាធំៗពីរគឺការអភិវឌ្ឍ និងសន្តិសុខ ដែលបញ្ជាក់ពីវិធានការសំខាន់ៗសម្រាប់ការដើរតាមមាគ៌ាសង្គមនិយម និងជាសញ្ញាវិជ្ជមានដល់សហគមន៍អន្តរជាតិនៃសាមគ្គីភាពចិន-វៀតណាម ការជឿទុកចិត្តគ្នាទៅវិញទៅមក និងវឌ្ឍនភាពរួមគ្នា។

ដោយបញ្ជាក់ថា ឆ្នាំនេះគឺជាការចាប់ផ្តើមនៃផែនការប្រាំឆ្នាំលើកទី១៥ របស់ប្រទេសចិន និងយុគសម័យថ្មីសម្រាប់ការអភិវឌ្ឍជាតិរបស់ប្រទេសវៀតណាមសម្រាប់បុព្វហេតុសង្គមនិយមនៃប្រទេសទាំងពីរ លោក វ៉ាង បាននិយាយថា គុណសម្បត្តិនៃប្រព័ន្ធសង្គមនិយមរបស់ប្រទេសចិន និងវៀតណាមកំពុងកាន់តែលេចធ្លោឡើងៗ ហើយតម្លៃយុទ្ធសាស្ត្រនៃសហគមន៍ចិន-វៀតណាម ដែលមានអនាគតរួមគ្នានៅតែបន្តកើនឡើង។

ចំពោះលោក ទ្រុង ដែលជាសមាជិកនៃការិយាល័យនយោបាយនៃគណៈកម្មាធិការកណ្តាលបក្ស CPV  បាននិយាយថា ការដឹកនាំដោយស្មារតីសមមិត្ត និងបងប្អូនរវាងវៀតណាម និងចិន ភាគីទាំងពីរប្រាកដជាអាចអនុវត្តន៍ការឯកភាពគ្នាជាយុទ្ធសាស្ត្រដែលសម្រេចបានដោយមេដឹកនាំកំពូលនៃគណបក្សទាំងពីរ។

លោក Trung បានបន្ថែមថា ក្នុងនាមជាប្រទេសជិតខាង សមមិត្ត និងបងប្អូនដ៏រួសរាយរាក់ទាក់ ប្រទេសវៀតណាមតែងតែមានឆន្ទៈគាំទ្រដល់ការអភិវឌ្ឍ និងការរីកចម្រើនរបស់ប្រទេសចិន ការលើកកម្ពស់ឋានៈអន្តរជាតិរបស់ខ្លួន និងការរួមចំណែកកាន់តែច្រើនរបស់ខ្លួនចំពោះបុព្វហេតុសង្គមនិយម ក៏ដូចជាសន្តិភាព ស្ថិរភាព និងការអភិវឌ្ឍពិភពលោក៕

ដោយ៖ មូល មិនា (ប្រភព៖ ភីបផលដេលី)