AKP ប៉េកាំង ថ្ងៃទី១២ ខែមីនា ឆ្នាំ២០២៦ — សម័យប្រជុំលើកទី៤ នៃសមាជប្រជាជនជាតិចិនលើកទី១៤ ឆ្នាំ២០២៦ (NPC) ដែលបានប្រារព្ធឡើងកាលពីថ្ងៃទី០៤ ខែមីនា ឆ្នាំ២០២៦ កំពុងធ្វើពិធីបិទនារសៀលថ្ងៃទី១២ ខែមីនា ឆ្នាំ២០២៦ នេះ នៅសាលធំប្រជាជនចិន ក្មុងទីក្រុងប៉េកាំង ក្រោមអធិបតីភាពរបស់ប្រធានាធិបតីចិន លោក ស៊ី ជីនពីង (Xi Jinping) ដោយនឹងអនុម័តទៅលើរបាយការណ៍របស់រដ្ឋាភិបាល និងច្បាប់សំខាន់ៗមួយចំនួន។

នៅក្នុងពិធីសម័យប្រជុំលើកទី៤ នៃ NPC លើកទី១៤ នេះបានបោះឆ្មោតអនុម័តទៅលើរបាយការណ៍ និងច្បាប់សំខាន់ៗរួមមាន ផែនការប្រាំឆ្នាំលើកទី១៥ (ឆ្នាំ២០២៦-២០៣០) សម្រាប់ការអភិវឌ្ឍសេដ្ឋកិច្ច និងសង្គមជាតិ ក្រមបរិស្ថាន និងអេកូឡូស៊ី ច្បាប់ស្តីពីឯកភាពជនជាតិភាគតិច និងលើកកម្ពស់វឌ្ឍនភាព ច្បាប់ស្តីពីផែនការអភិវឌ្ឍន៍ជាតិ សេចក្តីសម្រេចមួយលើការអនុវត្តផែនការអភិវឌ្ឍន៍សេដ្ឋកិច្ច និងសង្គមជាតិឆ្នាំ២០២៥ និងផែនការអភិវឌ្ឍន៍សេដ្ឋកិច្ច និងសង្គមជាតិឆ្នាំ២០២៦ ព្រមទាំងបានអនុម័តផែនការឆ្នាំ២០២៦។

លើសពីនេះទៀត អង្គនីតិបញ្ញតិចិនក៏បានបោះឆ្នោតអនុម័តសេចក្តីសម្រេចមួយ ស្តីពីការអនុវត្តថវិកាកណ្តាល និងមូលដ្ឋានសម្រាប់ឆ្នាំ២០២៥ និងថវិកាកណ្តាល និងមូលដ្ឋានសម្រាប់ឆ្នាំ២០២៦ ព្រមទាំងបានអនុម័តថវិកាកណ្តាលសម្រាប់ឆ្នាំ២០២៦ ផងដែរ៕

ដោយ: យា ចិន្តាខន្តី (រូបភាព: ស៊ីនហួ)