AKPបន្ទាយមានជ័យ ថ្ងៃទី២១ ខែមេសា ឆ្នាំ២០២៦ --សុខុមាលភាព និងជីវភាពរស់នៅរបស់បងប្អូនប្រជាពលរដ្ឋភៀសសឹក កាន់តែត្រូវបានយកចិត្តទុកដាក់ខ្ពស់ តាមរយៈការផ្ដល់ជូននូវប្រព័ន្ធទឹកស្អាតសម្រាប់បរិភោគដែលស្របតាមស្ដង់ដារបច្ចេក ទេស។

នៅព្រឹកថ្ងៃទី២១ ខែមេសា ឆ្នាំ២០២៦ នេះលោក ឃ្លោក នួយ អភិបាលរងខេត្តបន្ទាយមានជ័យ តំណាងដ៏ខ្ពង់ខ្ពស់ ឯកឧត្ដម អ៊ុ រាត្រីអភិបាលនៃគណៈអភិបាលខេត្ត បានអញ្ជើញចុះសម្រ បសម្រួលផ្ទាល់ជូនក្រុមការងាររបស់ លោក សុខ គឹមនិតតា អគ្គនាយកក្រុមហ៊ុន MSA ក្នុងការដំឡើងម៉ាស៊ីនចម្រោះទឹកស្អាតខ្នាតធំ ជូនដល់បងប្អូនប្រជាពលរដ្ឋភៀសសឹក ដែលកំពុងស្នាក់នៅបណ្ដោះអាសន្ន ក្នុងផ្ទះអតីតយុទ្ធជន ស្ថិតក្នុងភូមិស្លក្រាម ឃុំស្លក្រាម ស្រុកស្វាយចេក។  
ម៉ាស៊ីនចម្រោះទឹកស្អាតដែលបានដំឡើងជូននាពេលនេះ មានសមត្ថភាពខ្ពស់ដែលអាចផលិតទឹកស្អាតសម្រាប់បរិភោ គបានរហូតដល់ ៧០០ លីត្រ ក្នុងមួយម៉ោង។ នេះគឺជាចំណែកយ៉ាងសំខាន់ក្នុងការជួយកាត់បន្ថយការចំណាយ និងធានាបាននូវសុខភាពល្អ បង្ការជំងឺផ្សេងៗដែលបង្កឡើងពីការប្រើប្រាស់ទឹកមិនស្អាត។    
ក្នុងឱកាសនោះ លោក ឃ្លោក នួយ បានមានប្រសាសន៍លើកឡើងថា ការនាំយកសមិទ្ធផលនាពេលនេះ គឺជាការស្ដែងឱ្យឃើញពីការគិតគូរខ្ពស់បំផុតរបស់ប្រមុខរាជរដ្ឋាភិបាលកម្ពុជា ចំពោះសុខទុក្ខរបស់បងប្អូនប្រជាពលរដ្ឋភៀសសឹក។ 

លោកបានបញ្ជាក់ថា រាជរដ្ឋាភិបាលមិនដែលបោះបង់បងប្អូនណាម្នាក់ចោលឡើយ ទោះស្ថិតក្នុងកាលៈទេសៈណាក៏ដោយ។ ការផ្ដល់ម៉ាស៊ីនចម្រោះទឹកស្អាតនេះ គឺជាសក្ខីភាពមួយបង្ហាញពីការយកចិត្តទុកដាក់លើសុខមាលភាពជាចម្បង ដើម្បីឱ្យបងប្អូនមានទឹកស្អាតប្រើប្រាស់គ្រប់គ្រាន់ និងមានអនាម័យខ្ពស់។

ជាមួយគ្នានេះ លោកអភិបាលរងខេត្ត ក៏បានថ្លែងអំណរគុណយ៉ាងជ្រាលជ្រៅចំពោះក្រុមហ៊ុន MSA ដែលបានចូលរួមចំណែកជាមួយរដ្ឋបាលខេត្ត ក្នុងកិច្ចការមនុស្សធម៌ដ៏មានសារៈសំខាន់នេះ។ លោកក៏បានផ្ដាំផ្ញើដល់បងប្អូនប្រជា ពលរដ្ឋទាំងអស់ត្រូវរួមគ្នាថែរក្សាសមិទ្ធ ផលនេះឱ្យបានល្អ ដើម្បីប្រើប្រាស់បានយូរអង្វែង។

  បន្តអនុវត្តវិធានការអនាម័យ «រស់នៅស្អាត ហូបស្អាត ផឹកស្អាត»។ជឿជាក់លើការដឹកនាំរបស់អាជ្ញាធរដែនដី ដែលតែងតែនៅក្បែរបងប្អូនគ្រប់ពេលវេលា។     
លោកអភិបាលរងខេត្តបន្ទាយមានជ័យបានញ្ជាក់ថា ផ្ទះបណ្តោះអាសន្នរបស់សមាគមអតីតយុទ្ធជន និងនិវត្តជនកម្ពុជាសម្រាប់ប្រជាពលរដ្ឋភៀសសឹក ត្រូវបានរាជរដ្ឋាភិបាលយកចិត្តទុកដាក់ខ្ពស់ពីការរៀបចំហេដ្ឋារចនាសម្ព័ន្ធ ផ្លូវ ទឹក ភ្លើង សាលារៀន និងរៀបចំដីកសិកម្មសម្រាប់ជំរុញសកម្មភាពកសិកម្មទាំងលក្ខណៈគ្រួសារ និងសហគមន៍ ដើម្បីបង្កើតឱកាសការងារ និងប្រាក់ចំណូល ព្រមទាំងអាចគាំទ្រដល់ជីវភាពរស់នៅប្រចាំថ្ងៃ។

ឆ្លៀតក្នុងឱកាសនេះ លោកឃ្លោកនួយ បានជួបសំណេះសំណាលជាមួយប្រជាពលរដ្ឋភៀសសឹក ដើម្បីនាំយកការផ្តាំផ្ញើសាកសួរសុខទុក្ខពីប្រមុខរាជរដ្ឋា ភិបាល និងសំណូមពរដល់ប្រជាពលរដ្ឋភៀសសឹក ក្នុងករណីមានតម្រូវការបន្ទាន់ សូមរាយការណ៍ទៅកាន់អាជ្ញាធរ និងសមត្ថកិច្ច។    
សកម្មភាពនេះ បានធ្វើឱ្យបងប្អូនប្រជាពលរដ្ឋភៀសសឹកដែលស្នាក់នៅទីនោះ សម្ដែងនូវក្ដីត្រេកអរជាខ្លាំង និងបានថ្លែងអំណរគុណដល់ថ្នាក់ដឹកនាំគ្រប់លំដាប់ថ្នាក់ ដែលតែងតែផ្ដល់ភាពកក់ក្ដៅ និងដោះស្រាយរាល់ការលំបាកជូនពួកគាត់ទាន់ពេលវេលា៕

ដោយ ៖ឈុនសារ៉ាត