AKP បន្ទាយមានជ័យ ថ្ងៃទី២១ ខែមេសា ឆ្នាំ២០២៦--  ក្នុងស្មារតីសាមគ្គីភាព និងការមិនបោះបង់ពលរដ្ឋណាម្នាក់ឱ្យនៅឯកោក្នុងគ្រាលំបាក សាខាកាកបាទក្រហមកម្ពុជាខេត្តបន្ទាយមានជ័យបានចុះអន្តរាគមន៍ភ្លាមៗ ដើម្បីនាំយកអំណោយមនុស្សធម៌ និងកម្លាំងចិត្តជូនដល់គ្រួសាររងគ្រោះដោយខ្យល់កន្ត្រាក់ និងអគ្គិភ័យ ក្នុងសង្កាត់និមិត្ត ក្រុងប៉ោយប៉ែត។

  កាលពីថ្ងៃទី២០ ខែមេសា ឆ្នាំ២០២៦ ក្រោមការចង្អុលបង្ហាញផ្ទាល់ពី ឯកឧត្តម អ៊ុ រាត្រី ប្រធានគណៈកម្មាធិការសាខាកាកបាទក្រហមកម្ពុជាខេត្តបន្ទាយមានជ័យ លោក បឹង គឹមសឹង អនុប្រធានគណៈកម្មាធិការសាខា បានដឹកនាំក្រុមការងារ  ចុះសួរសុខទុក្ខ និងផ្ដល់ជំនួយដល់គ្រួសាររងគ្រោះសរុប ២៤គ្រួសារ (ក្នុងនោះ ២៣គ្រួសារ រងគ្រោះដោយខ្យល់កន្ត្រាក់ និង ០១ គ្រួសាររងគ្រោះដោយអគ្គិភ័យឆេះផ្ទះទាំងស្រុង)។

  នាឱកាសនោះ លោកអនុប្រធានសាខា បានពាំនាំនូវប្រសាសន៍សាកសួរសុខទុក្ខ និងសេចក្ដីនឹករឭកយ៉ាងជ្រាលជ្រៅពីសំណាក់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ឯកឧត្តម ឌិត ទីណា ប្រធានកិត្តិយសសាខាខេត្ត   និងឯកឧត្តម អ៊ុ រាត្រី ប្រធានគណៈកម្មាធិការសាខាខេត្ត។
  លោកបានសង្កត់ធ្ងន់ថា ទោះស្ថិតក្នុងកាលៈទេសៈណាក៏ដោយ កាកបាទក្រហមកម្ពុជាតែងតែនៅក្បែរបងប្អូនជានិច្ច ស្របតាមពាក្យស្លោក «កាកបាទក្រហមកម្ពុជាមានគ្រប់ទីកន្លែង សម្រាប់គ្រប់ៗគ្នា មិនទុកនរណាម្នាក់ចោល»។  ក្រៅពីការផ្ដល់ជំនួយ លោកអនុប្រធានក៏បានសង្កត់ធ្ងន់លើចំណុចសំខាន់ៗមួយចំនួនដើម្បីសុវត្ថិភាពសហគមន៍ ត្រូវពិនិត្យ និងចងរឹតបន្ថែមរចនាសម្ព័ន្ធផ្ទះសម្បែង ដើម្បីទប់ទល់នឹងបាតុភូតខ្យល់កន្ត្រាក់ដែលកើតមានជាយថាហេតុក្នុងរដូវប្រែប្រួលអាកាសធាតុ។ បង្កើនការប្រុងប្រយ័ត្នខ្ពស់ក្នុងការប្រើប្រាស់ចរន្តអគ្គិសនី និងភ្លើងចង្ក្រាន ពិសេសក្នុងរដូវក្ដៅ។ បន្តអនុវត្តន៍វិធានការការពារជំងឺឆ្លង និងយកចិត្តទុកដាក់លើរបបអាហារ កាត់បន្ថយប្រៃ-ផ្អែម-ខ្លាញ់ ដើម្បីបង្ការជំងឺមិនឆ្លង។

  ដើម្បីសម្រាលការលំបាកចំពោះមុខ គ្រួសារនីមួយៗទទួលបាននូវសម្ភារសំណង់ ស័ង្កសី (ផ្ដល់ជូនតាមទំហំនៃការខូចខាតជាក់ស្ដែង)។ ស្បៀងអាហារ អង្ករ ២៥ គីឡូក្រាម, មី ២៥ កញ្ចប់, ត្រីខ ១០ កំប៉ុង, ទឹកស៊ីអ៊ីវ ១ យួររួមនិង ថវិកាមួយចំនួនសម្រាប់ជួយដោះស្រាយជីវភាពបណ្ដោះអាសន្ន។

  សកម្មភាពនេះ បានបង្ហាញយ៉ាងច្បាស់ពីការយកចិត្តទុកដាក់របស់រាជរដ្ឋាភិបាល ក៏ដូចជាកាកបាទក្រហមកម្ពុជា ដែលមិនត្រឹមតែជួយសង្គ្រោះផ្នែកស្បៀងអាហារប៉ុណ្ណោះទេ ប៉ុន្តែថែមទាំងផ្ដល់នូវការអប់រំ និងស្មារតីរឹងមាំដល់ប្រជាពលរដ្ឋក្នុងមូលដ្ឋានទៀតផង៕

ដោយឈុនសារ៉ាត