AKP ភ្នំពេញ ថ្ងៃទី១២ ខែមីនា ឆ្នាំ២០២៦ -- យោងតាមរបាយការណ៍ប្រព័ន្ធផ្សព្វផ្សាយបានឱ្យដឹងថា ឯកអគ្គរដ្ឋទូតអ៊ីរ៉ង់ប្រចាំអង្គការសហប្រជាជាតិបាននិយាយកាលពីថ្ងៃពុធថា ជនស៊ីវិលជាង ១.៣៤៨នាក់ត្រូវបានសម្លាប់ និងជាង ១៧.០០០នាក់បានរងរបួស ចាប់តាំងពីការចាប់ផ្តើមនៃការវាយប្រហារដែលធ្វើឡើងដោយអ៊ីស្រាអែល និងសហរដ្ឋអាមេរិកប្រឆាំងនឹងប្រទេសរបស់លោក។

លោក អាមៀ សាអេដ អ៊ីរ៉ាវ៉ានី (Amir Saeid Iravani) បាននិយាយក្នុងអំឡុងពេលកិច្ចប្រជុំមួយនៅអង្គការសហប្រជាជាតិថា ការវាយប្រហារយោធាដែលកំពុងបន្តបានបណ្តាលឱ្យមានអ្នកស្លាប់ និងរបួសយ៉ាងច្រើនដល់ជនស៊ីវិល ដោយបន្ថែមពីលើការខូចខាតយ៉ាងធ្ងន់ធ្ងរដល់ហេដ្ឋារចនាសម្ព័ន្ធនៅក្នុងតំបន់ជាច្រើននៅទូទាំងប្រទេស។

លោកបានបន្ថែមថា ការវាយប្រហារទាំងនេះ តាមទស្សនៈរបស់លោកគឺជាការរំលោភលើច្បាប់អន្តរជាតិ និងធម្មនុញ្ញអង្គការសហប្រជាជាតិ ដោយលោកបានអំពាវនាវឱ្យសហគមន៍អន្តរជាតិចាត់វិធានការដើម្បីបញ្ឈប់ប្រតិបត្តិការយោធា៕

ដោយ៖ មូល មិនា (ប្រភព៖ AA-AKP)