AKP ភ្នំពេញ ថ្ងៃទី១២ ខែមីនា ឆ្នាំ២០២៦ -- ប្រធានាធិបតីកូរ៉េខាងត្បូង លោក លី ជេម្យុង (Lee Jae Myung) បានជួបពិភាក្សាកំពូលជាមួយប្រធានាធិបតីហ្គាណា លោក ចន ដ្រាម៉ានី ម៉ាហាម៉ា (John Dramani Mahama) កាលពីថ្ងៃពុធ ហើយបានយល់ព្រមពង្រីកកិច្ចសហប្រតិបត្តិការទ្វេភាគីក្នុងវិស័យពាណិជ្ជកម្ម សន្តិសុខដែនសមុទ្រ ការប្រែប្រួលអាកាសធាតុ និងកសិកម្ម។

នៅក្នុងកិច្ចពិភាក្សារបស់ពួកគេ លោក លី បានកត់សម្គាល់ពីទំនាក់ទំនងពាណិជ្ជកម្ម និងវិនិយោគដែលកំពុងកើនឡើងរវាងប្រទេសទាំងពីរ និងបានសម្តែងក្តីសង្ឃឹមក្នុងការពង្រីកកិច្ចសហប្រតិបត្តិការបន្ថែមទៀតនៅក្នុងវិស័យផ្សេងៗ ដោយលើកឡើងអំពីប្រទេសហ្គាណាថាជាច្រកទ្វារដ៏សំខាន់មួយទៅកាន់ទីផ្សារអាហ្វ្រិក។

លោក លី បានមានប្រសាសន៍នៅក្នុងសុន្ទរកថាបើករបស់លោកថា «ប្រទេសហ្គាណាគឺជាប្រទេសដែលយើងដឹងគុណ ព្រោះប្រទេសនេះបានសហការយ៉ាងសកម្មក្នុងការធានាសុវត្ថិភាពរបស់ជនជាតិកូរ៉េនៅក្នុងឈូងសមុទ្រហ្គីណេ ជាកន្លែងដែលមានការគំរាមកំហែងពីចោរសមុទ្រនៅតែបន្តកើតមាន»។

លោកបានបន្ថែមថា «ក្នុងនាមជាប្រទេសដែនសមុទ្រដែលមានព្រំប្រទល់ជាប់ប្រទេសអាហ្វ្រិកខាងលិចចំនួន ៣ប្រទេស ប្រទេសហ្គាណាក៏បម្រើជាច្រកទ្វារដែលអាចទុកចិត្តបានសម្រាប់ការនាំចេញរបស់សាធារណរដ្ឋកូរ៉េទៅក្នុងទីផ្សារអាហ្វ្រិកផងដែរ»។

លោក ម៉ាហាម៉ា បានមកដល់ប្រទេសកូរ៉េខាងត្បូងកាលពីថ្ងៃអង្គារ សម្រាប់ដំណើរទស្សនកិច្ចការងាររយៈពេល ៥ថ្ងៃ ដែលបានក្លាយជាមេដឹកនាំអាហ្វ្រិកដំបូងគេដែលបានមកទស្សនកិច្ចប្រទេសនេះចាប់តាំងពីលោក លី ឡើងកាន់តំណែងនៅក្នុងខែមិថុនា ឆ្នាំ២០២៥។

ប្រទេសហ្គាណាត្រូវបានចាត់ទុកថាជាប្រទេសប្រជាធិបតេយ្យឈានមុខគេមួយរបស់ទ្វីបអាហ្វ្រិក និងបម្រើការជាមជ្ឈមណ្ឌលពាណិជ្ជកម្ម និងភស្តុភារកម្មនៅតំបន់អាហ្វ្រិកខាងលិច ដោយធ្វើជាម្ចាស់ផ្ទះនៃលេខាធិការដ្ឋាននៃតំបន់ពាណិជ្ជកម្មសេរីទ្វីបអាហ្វ្រិកដែលបានបើកដំណើរការនៅឆ្នាំ២០២១។

កិច្ចសហប្រតិបត្តិការសន្តិសុខដែនសមុទ្រគឺជាវិស័យមួយក្នុងចំណោមវិស័យដែលប្រទេសទាំងពីរបានធ្វើការ ដោយសារនាវិកកូរ៉េខាងត្បូងធ្លាប់ត្រូវបានចាប់ពង្រត់ពីកប៉ាល់នៅឯឆ្នេរសមុទ្រហ្គាណាដោយសារតែចោរសមុទ្រនៅឈូងសមុទ្រហ្គីណេ ដែលជាផ្លូវពាណិជ្ជកម្មដឹកជញ្ជូន និងថាមពលដ៏សំខាន់មួយ។

ប្រទេសទាំងពីរក៏បានចុះហត្ថលេខាលើអនុស្សរណៈនៃការយោគយល់គ្នាមួយផ្សេងទៀត ស្តីពីកិច្ចសហប្រតិបត្តិការក្នុងគម្រោងទាក់ទងនឹងបច្ចេកវិទ្យា ការចូលប្រើឌីជីថល បញ្ញាសិប្បនិម្មិត និងការបណ្តុះបណ្តាលយុវជន៕

ដោយ៖ មូល មិនា (ប្រភព៖ យ៉ុនហាប់)