AKP ភ្នំពេញ ថ្ងៃទី១២ ខែមីនា ឆ្នាំ២០២៦ -- ប្រធានាធិបតីបារាំង លោក អេម៉ានូអែល ម៉ាក្រុន (Emmanuel Macron) កាលពីថ្ងៃអង្គារ បានអំពាវនាវដល់វិស័យសាធារណៈ និងឯកជន ឱ្យបង្កើនការវិនិយោគលើការអភិវឌ្ឍថាមពលនុយក្លេអ៊ែរស៊ីវិល។

លោក ម៉ាក្រុន បានធ្វើការកត់សម្គាល់នេះក្នុងអំឡុងពេលថ្លែងសុន្ទរកថារបស់លោកនៅក្នុងកិច្ចប្រជុំកំពូលថាមពលនុយក្លេអ៊ែរលើកទី២ នៅទីក្រុងប៉ារីស។ លោកបាននិយាយថា ថាមពលនុយក្លេអ៊ែរគឺជាគន្លឹះក្នុងការផ្សះផ្សាឯករាជ្យភាព និងអធិបតេយ្យភាពថាមពល ការសម្រេចបាននូវការកាត់បន្ថយកាបូន និងអព្យាក្រឹតភាពកាបូននៅឆ្នាំ២០៥០ និងពង្រឹងភាពប្រកួតប្រជែងផ្នែកសេដ្ឋកិច្ច ហើយបានបង្កើតការងារ។

លោកក៏បានព្រមានផងដែរថា បរិបទភូមិសាស្ត្រនយោបាយបច្ចុប្បន្នបង្ហាញថា ការពឹងផ្អែកខ្លាំងពេកលើអ៊ីដ្រូកាបូនអាចក្លាយជាឧបករណ៍នៃសម្ពាធ និងអស្ថិរភាព។

ថ្លែងនៅក្នុងកិច្ចប្រជុំកំពូល ប្រធានគណៈកម្មការអឺរ៉ុប លោកស្រី យូស៊ូឡា វ៉ុន ដឺឡេយេន (Ursula von der Leyen) បាននិយាយថា អគ្គិសនីរបស់សហភាពអឺរ៉ុបមានតម្លៃខ្ពស់ពេក ដោយលោកស្រីបានបន្ថែមថា វិបត្តិតំបន់មជ្ឈិមបូព៌ាបច្ចុប្បន្នគឺជាការរំលឹកយ៉ាងច្បាស់អំពីភាពងាយរងគ្រោះរបស់ទ្វីបនេះ ក្នុងនាមជាអ្នកនាំចូលឥន្ធនៈហ្វូស៊ីល។

លោកស្រីបានកត់សម្គាល់ថា ការកាត់បន្ថយចំណែកនៃថាមពលនុយក្លេអ៊ែរគឺជា «កំហុសយុទ្ធសាស្ត្រ» សម្រាប់សហភាពអឺរ៉ុប ខណៈដែលលោកស្រីបានប្រកាសពីការធានាចំនួន ២០០ លានអឺរ៉ូ (២៣៣លានដុល្លារអាម៉េរិក) ដោយសហភាពអឺរ៉ុប ដើម្បីគាំទ្រដល់ការវិនិយោគឯកជនក្នុងបច្ចេកវិទ្យានុយក្លេអ៊ែរប្រកបដោយភាពច្នៃប្រឌិត៕

ដោយ៖ មូល មិនា (ប្រភព៖ ភីបផលដេលី)