AKP ភ្នំពេញ ថ្ងៃទី១០ ខែមីនា ឆ្នាំ២០២៦ -- ប្រធានាធិបតីសហរដ្ឋអាមេរិកលោក ដូណាល់ ត្រាំ (Donald Trump) និងនាយករដ្ឋមន្ត្រីចក្រភពអង់គ្លេសលោក គៀ ស្តារមឺ (Keir Starmer) បានថ្លែងកាលពីថ្ងៃអាទិត្យអំពីកិច្ចសហប្រតិបត្តិការយោធារវាងប្រទេសរបស់ពួកគេ រួមទាំងការប្រើប្រាស់មូលដ្ឋានទ័ពអាកាសអង់គ្លេស ដើម្បីគាំទ្រ «ការការពារខ្លួនរួមគ្នារបស់ដៃគូនៅក្នុងតំបន់»។

យោងតាមការិយាល័យរបស់លោក ស្តារមឺ នៅក្នុងសេចក្តីថ្លែងការណ៍មួយ បានឱ្យដឹងថា លោកក៏បានសម្តែងការចូលរួមរំលែកទុក្ខចំពោះការស្លាប់របស់សមាជិកយោធាអាម៉េរិកចំនួន ៦នាក់ផងដែរ។ 

សេចក្តីថ្លែងការណ៍បានបន្ថែមថា «ពួកគេទន្ទឹងរង់ចាំនិយាយម្តងទៀតក្នុងពេលឆាប់ៗនេះ»។ សេតវិមានមិនបានចេញសេចក្តីថ្លែងការណ៍ភ្លាមៗអំពីការហៅទូរស័ព្ទនេះទេ។

ការសន្ទនានេះបានកើតឡើងចំពេលមានជម្លោះសាធារណៈកាន់តែខ្លាំងឡើងរវាងមេដឹកនាំទាំងពីរ។ លោក ត្រាំ បានរិះគន់លោក ស្តារមឺ ចំពោះការបដិសេធដំបូងមិនគាំទ្រការវាយប្រហារដឹកនាំដោយសហរដ្ឋអាមេរិកលើអ៊ីរ៉ង់ ដោយលោកបានបង្ហាញថា ការចូលរួមរបស់ចក្រភពអង់គ្លេសនៅពេលក្រោយគឺមិនចាំបាច់។

លោក ត្រាំ បាននិយាយថា «យើងមិនត្រូវការមនុស្សដែលចូលរួមសង្គ្រាមបន្ទាប់ពីយើងបានឈ្នះរួចហើយនោះទេ»។

ក្រោយមក Downing Street បានអនុម័តការប្រើប្រាស់មូលដ្ឋានទ័ពអាកាសអង់គ្លេសមានកំណត់សម្រាប់ប្រតិបត្តិការការពារ ហើយយន្តហោះចម្បាំងរបស់កងទ័ពអាកាសអង់គ្លេសត្រូវបានដាក់ពង្រាយដើម្បីស្ទាក់ចាប់មីស៊ីល និងយន្តហោះគ្មានមនុស្សបើករបស់អ៊ីរ៉ង់ដែលកំណត់គោលដៅសម្ព័ន្ធមិត្តក្នុងតំបន់។

រដ្ឋមន្ត្រីការបរទេសចក្រភពអង់គ្លេស លោក អ៊ីវេតេ គូពឺ (Yvette Cooper) បាននិយាយកាលពីថ្ងៃអាទិត្យថា ចក្រភពអង់គ្លេសនឹងមិន «ផ្ទេរ»ការសម្រេចចិត្តគោលនយោបាយការបរទេសរបស់ខ្លួនឡើយ ដោយរុញច្រានការរិះគន់របស់លោក ត្រាំ។

ការវាយប្រហាររួមគ្នារវាងសហរដ្ឋអាមេរិក និងអ៊ីស្រាអែលលើអ៊ីរ៉ង់ដែលបានចាប់ផ្តើមកាលពីថ្ងៃសៅរ៍សប្តាហ៍មុនបានចូលដល់ថ្ងៃទី៩ ហើយត្រូវបានគេរាយការណ៍ថាបានសម្លាប់មនុស្សជាង ១.២០០នាក់ រួមទាំងមេដឹកនាំកំពូលអ៊ីរ៉ង់ លោក អាលី ខាមេណី (Ali Khamenei) ផងដែរ។

ទីក្រុងតេអេរ៉ង់បានសងសឹកដោយការវាយប្រហារដោយយន្តហោះគ្មានមនុស្សបើក និងមីស៊ីលដែលកំណត់គោលដៅលើអ៊ីស្រាអែល និងបណ្តាប្រទេសជាប់ឈូងសមុទ្រ ដែលជាទីតាំងសម្រាប់ទ្រព្យសម្បត្តិយោធាអាម៉េរិក៕

ដោយ៖ មូល មិនា (ប្រភព៖ AA-AKP)